“Эрдэнэт” үйлдвэрийг Монгол Улсын “саалийн үнээ” гэж санаатай, санаагүй саадаг байсан үе улиран одож. Саалийн үнээгээ зуун жил хэрэглэх нойлын цаас шахах зэргээр янз бүрээр саадаг байсан. Бас зарим эрх мэдэлтнүүд гадаадын банкинд саалийн үнээгээ сав суулгатай, данс тооцоотой нь барьцаалж байсан гашуун түүх ч бий. Тэгвэл “Эрдэнэт” үйлдвэрийн өмнөх удирдлагууд оффшор бүсээр дамжуулан мөнгө угаасан байж болзошгүй гэсэн яриа олны амны салхиар тарах боллоо. Олны үг ортой нь тодрох биз. “Эрдэнэт” үйлдвэрийн хуучин орлогч болон газрын дарга нар 2006-2018 онд оффшор бүсээр дамжуулан мөнгө угааж байсныг илрүүлсэн гэж эх сурвалж өгүүлж байгаа. Мөнгө угаагчид Их Британи болон Виржина аралд компани байгуулан, уг компаниараа дамжуулан “Эрдэнэт” үйлдвэрт бараа шахдаг байжээ.

Шахсан барааныхаа ашиг болох найман сая гаруй ам.доллараа олон сая болгоод Латви улсаас Эстони болон Литва улсын банкинд хадгалдаг байсан байж болзошгүй нөхцөл байдал тогтоогдоод байгаа гэх. Угаасан мөнгөө Монгол Улс руу оруулж ирэхдээ хоёр машин, дөрвөн орон сууц болгон оруулж ирсэн байна. Мөн үлдэгдлийг нь холбогдох банкинд одоо хүртэл хадгалж байгаа аж. Эх сурвалжийн мэдээлснээр тэд Хонконгт ч хадгаламж нээгээд амжсан бололтой. Мөнгө угаасан байж болзошгүй энэхүү хэргийг хуулийнхан илрүүлэн мөрдөн шалгах ажиллагааг эхлүүлжээ. Манай хууль хяналтынхан улсын мөнгөөр гараа угаасан дарга сэтэртнүүдийн хэргийг удахгүй ил болгож эхлэхээр шамдах нь тодорхой юм.