Г.Батхүү агсны гэр бүлээс МАН-ын бүлгийн гишүүд, бүлгийн дарга Д.Тогтохсүрэнд нээлттэй захидал бичжээ

Aдмин / Улстөр

УИХ ДАХЬ МОНГОЛ АРДЫН НАМЫН БҮЛГИЙН НИЙТ ГИШҮҮД,
БҮЛГИЙН ДАРГА Д.ТОГТОХСҮРЭН ТАНАА

Нээлттэй захидал

Г.Батхүү агсны гэр бүлээс МАН-ын бүлгийн гишүүд, бүлгийн Д.Тогтохсүрэнд хандаж бичсэн нээлттэй захидлыг бүрэн эхээр нь хүргэж байна. Монгол Улсын Их Хурлын 2016 оны сонгуулиар ард түмнийхээ итгэлийг хүлээж, ялалт байгуулан, УИХ-ын гишүүнээр сонгогдсон Та бүхэн ард иргэдийнхээ аж амьдралыг сайжруулах, улс орноо хөгжүүлэх бодлогыг амжилттай тодорхойлж, олон жил шийдвэрлэж чадахгүй байсан Үндсэн хуульд нэмэлт, өөрчлөлт оруулах, нийслэлийн агаарын бохирдлыг бууруулах, уул уурхайн баялгийг эзэд болох ард түмэнд илүү хүртээмжтэй болгох, өндөр настан, ахмадуудын тэтгэвэрийн зээлийг тэглэх зэрэг олон асуудлыг зоригтойгоор, цаг хугацаа алдалгүй, богино хугацаанд үр дүнтэй шийдвэрлэж байгаа нь ард иргэд бидний талархлыг зүй ёсоор хүлээж байгаа билээ.

Эдгээр үр өгөөжтэй, хөгжлийн хувьд асар их ач холбогдолтой Та бүхний батлан гаргасан бодлогын олон шийдэл, санаачилгыг өндөр үнэлэхээс илүүтэйгээр Та бүхний нийгэмд шударга ёсыг тогтоохын төлөө тэмцэж буй хичээл зүтгэлийг эрх чөлөө, шударга ёсыг эрхэмлэдэг Монголын ард түмэн онцгойлон талархан дэмжиж, хууль шүүхийн өмнө иргэн бүр албан тушаал, хөрөнгө орлогын хэмжээнээс үл шалтгаалан ижил тэгш эрхтэй байх жишгийг нийгэмд тогтоон төлөвшүүлж буйг дэмжиж, Та бүхнийг шударга ёсны үлгэр жишээ байх ёстой хэмээн итгэл найдвар тавин харж байна.

Хууль зөрчиж, гэмт хэрэг үйлдсэн байж болзошгүй хөрөнгө мөнгөтэй хүмүүс нь хууль, шүүхийн асуудлыг мөнгөөр шийдвэрлэдэг, намын томилгоотой нь намаараа хамгаалуулдаг, хууль хүчний байгууллагынхан бие биендээ найр тавин өөрсдийгөө хамгаалан, асуудлыг шийддэг тэр цаг үе дуусгавар болж байна гэдгийг сүүлийн жилүүдэд энгийн иргэд бид амьдрал дээрээ мэдэрч, шударга ёсыг тогтоох үйлсэд Та бүхний манлайлал дор нэгдэн, улс эх орныхоо хөгжил цэцэглэлтийн төлөө итгэл төгс урагшлан тэмцэж байна.

Нийгмийн шударга ёсыг тогтоох аливаа тэмцэл үе шат бүхэндээ эсэргүүцэл, сорилттой тулгарч, даван туулж ирснийг бидний монголчуудын түүх бэлхэнээ гэрчилнэ.


Сонгогч бидний итгэлийг авч, төрийн эрх барих дээд байгууллагад сонгогдсон эрхэм төрийн түшээд маань гэмт хэрэг үйлдсэн байж болзошгүй олон тохиолдолд албан тушаалын халдашгүй байдлаараа халхавч хийн, хууль хүчний байгууллагуудын мөрдөн шалгах үйл ажиллагаанд ноцтой саад учруулж, хэргийг удаашруулж, улмаар мөрдөн шалгах боломжгүй болгох, хуулийн хөөн хэлэлцэх хугацааг дуусгах, хэргийг хэрэгсэхгүй болгох талаар албан тушаал, эрх мэдлийн байдлаа ашиглан нөлөөлөх зэрэг оролдлого нь иргэдийн төрдөө итгэх итгэлийг хөсөрдүүлж, хууль шүүхийн өмнө иргэн бүр тэгш байх төрт ёсны суурь зарчмыг уландаа гишгэж, төрийн эрх барих дээд байгууллагын нэр хүндийг өмнө нь хэзээ ч байгаагүйгээр унагаж байна.

Төрийн эрх барих дээд байгууллагад ажиллаж байгаа гэмт хэрэг үйлдсэн байж болзошгүй эрх баригч намын гишүүд нь сайн дураараа албан тушаалын халдашгүй байдлаасаа татгалзаж эсхүл хуулийн дагуу албан тушаалын халдашгүй байдлыг нь түдгэлзүүлж, жирийн иргэдийн адил хууль, шүүхийн өмнө ижил тэгш байлгаж, хуулийн байгууллага шалгаж үнэн мөнийг цаг тухайд нь тодорхойлж байж сая шударга ёс тогтож, сайн сайхан цаг ирэх учиртай.


Монгол Ардын Намаас нэр дэвшиж, УИХ-ийн гишүүнээр сонгогдсон, Засгийн газрын гишүүнээр ажиллаж байсан Н.Номтойбаярт нь 3 зүйл ангиар эрүүгийн хэрэг үүсгэж, УИХ-ын гишүүний бүрэн эрхийг нь түдгэлзүүлэх саналыг Улсын Ерөнхий Прокуророос УИХ-д 2020 оны 1 дүгээр сарын 16-нд хүргүүлсэн байна. Үүний дагуу УИХ дахь Халдашгүй байдлын дэд хороо хуралдаж эхэлсэн боловч ирц бүрэлдээгүй гэх шалтгаанаар түр завсарласан талаар хэвлэлд мэдээлжээ.

Н.Номтойбаярын бүрэн эрхийг нь түдгэлзүүлэхээр гаргасан 3 зүйл ангийн нэг нь бидний хайрт хүү, нөхөр, аав, ах Г.Батхүү агсны талаар худал мэдүүлэг өгсөнтэй холбоотой болохыг Н.Номтойбаярын хийсэн хэвлэлд өгсөн ярилцлагаас олж мэдлээ. Бидний хайрт хүн Г.Батхүү агсан Төрийн ордонд учир битүүлгээр амь эрсдэхэд хамгийн сүүлд уулзсан хүн нь УИХ-ын гишүүн Н.Номтойбаяр байсан бөгөөд энэ талаараа ч тухайн үедээ өөрөө хэвлэлийн бага хурал хийж мэдэгдэж байсан.

Монгол төрийн төлөө зүтгэж явсан эрдэнэт хүний амь нас Төрийн ордонд учир битүүлгээр үрэгдээд даруй 8 сар гаруй хугацаа өнгөрчээ. Энэ хугацаанд хэргийн учиг тайлагдаж, үнэн мөнөөр шийдэгдэх болов уу хэмээн үрээ алдсан өндөр настай эцэг эх, нөхрөө алдсан авааль гэргий, ааваасаа өнчирч үлдсэн 4 хүүхэд, ахыгаа алдсан дүү нар нь төрийн болон хууль хүчний байгууллагад итгэж, горьдлого тээсээр өдийг хүрлээ.
Хууль хүчний байгууллага уг хэргийг богино хугацаанд үнэн зөвөөр шийдвэрлэхэд саад болж буй УИХ-ын гишүүний бүрэн эрхийг түдгэлзүүлэх асуудлыг хуулийн дагуу шийдвэрлэхэд эрх баригч МАН манлайлан, удирдан чиглүүлж, хууль шүүхийн өмнө иргэн бүр тэгш байх нөхцөлийг хангаж, шударга ёсоор цангасан ард иргэдийнхээ хүсэл зоригт нийцсэн шийдвэр гаргахыг хичээнгүйлэн хүсч байна.

УИХ-ын гишүүн Н.Номтойбаярын согтууруулах ундаа хэтрүүлэн хэрэглэсэн үедээ хийсэн олон удаагийн танхайн сэдэлтэй гэмт үйлдлүүд, албан тушаалын байдлаа урвуулан ашиглаж, төсвийн мөнгийг шамшигдуулсан болон түүнийгээ мөнгөөр шийдэж, хэрэгсэхгүй болгосон талаар хэвлэл мэдээллийн хэрэгсэл, нийгмийн сүлжээгээр сүүлийн жилүүдэд тасралтгүй гарч, олон түмний жигшил, дургүйцлийг ихээр хүргэж байсан.

Түүний хамгийн сүүлийн хүний эрх чөлөөнд халдаж, танхайрч буй зодооны бичлэг нийгмийн сүлжээгээр тарж, түүнийг номхруулах, шударга шийтгэл оногдуулах төр, хууль, хүчний байгууллага байхгүй юм байна гэдэг ойлголт олон түмний дунд түгэж, зөвхөн хувь хүнийх нь хувьд биш, эрх барьж буй МАН, төрийн эрх барих дээд байгууллага УИХ-д итгэл алдаж харуусах, эсэргүүцэн тэмцэх уур амьсгал ард орны дунд давамгайлж эхлэх бодит аюул байна.

Алдсан хүн арван тамтай гэдэг. Хайрт хүнээ алдсан бидэнд газар хатуу, тэнгэр хол байна. Бид зөвхөн үнэн зөв, шударга ёсыг л хүсч байна. Энэ асуудлыг хэрхэн шийдвэрлэх нь зөвхөн эрх баригч намын дотор шударга ёсыг тогтоох төдий бус Монголын нийгэмд шударга ёсыг тогтоох хамгийн эгзэгтэй сорилт шалгуур болох юм. Эрх баригч МАН Монголын ард түмнийхээ талд байж, хатуу хэцүүг туулж, шударга ёсыг тогтоож чадна гэдэгт гүнээ итгэж байна.

Талийгаач Гаваагийн Батхүү агсны эцэг эх, эхнэр, үр хүүхдүүд, дүү нар нь

2020 оны 1 дүгээр сарын 22


Сэтгэгдэл

Иргэн [66.181.161.37] 2020-01-26 18:39:54

Мэдэхгүй юм да яасан ч байж магдгүй Нямдорж ёстой ажла хийхгүй юма тэгж байгаад замхрана биз энэ сайдийг байхад амархан илэрхгүй ээ

sghkk [202.126.89.215] 2020-01-23 10:07:29

huu n yamar zewuun nowsh we.sahal usende barigdsan taalagdahgui ba. nomtoibayariig alsan geed bgaa wum yy. uheh morooroo uhehgui hund gai boloh wum. mongoliig arhin dalaid shiwuulsen myyhai hun. toroos torson terbymtan

Зочин [202.9.46.52] 2020-01-22 18:59:35

Ганц дагздуулаал , амь нь ч хаа байсын

Иргэн [202.55.188.90] 2020-01-22 16:10:53

Номтойбаяр тийм яахаа алдсан муу хүн юм уу?Энэ нэг залуу руу л дайрцгаагад байх юмаа.Уг нь сайн хүмүүс ийн үр сад юм шиг л дуулддаг юм.Гэхдээ хуулийн дагуу тогтоох л биздээ. Улс орондоо юм хийж яваа залуу хүн гэж ойлгодог шүү.

ЗОЧИН [139.5.217.192] 2020-01-22 15:23:15

БАТХҮҮТЭЙ ХАМГИЙН СҮҮЛД УУЛЗСАН ХҮН НОМТОЙБАЯР АЖ,ТҮҮНИЙ ЭРХИЙГ НЬ ТҮДГЭЛЗҮҮЛЖ ӨГӨӨЧ ГЭЖ ГУЙЖ БУЙ ЮМ БНА,ТЭД НОМТОЙБАЯРЫН ӨРӨӨНД УУЛЗААД ТАЛИЙГААЧ АХ НЬ АЖИЛТАЙ ГЭЭД ТҮРҮҮЛЖ ГАРААД ЯВСАН,НОМТОЙБАЯР ДАРАА НЬ ГАРЧ БҮЛГИЙН ХУРАЛРУУ ЯВСАН БАЙДАГ АЖ,УУЛЗААД НОМТОЙБАЯР ТҮҮНИЙГ ТЭР НҮХЭЭР ӨӨРӨӨ УНАЖ ҮХЭХ НЭГ НУУЦ ЮМ ХИЙСЭН ҮҮ,ЭСВЭЛ НОМТОЙБАЯР,ЭСВЭЛ ХЭН НЭГ ХҮН ТҮҮНИЙГ ТЭР НҮХРҮҮ ТҮЛХСЭН,АВЧ ШИДСЭН ҮҮ,ЭСВЭЛ УХААНГҮЙ СОГТООД ӨӨРӨӨ ОЙЧСОНУУ,ГЭР БҮЛИЙНХЭН НЬ ЭНЭ ҮХЭЛ НОМТОЙБАЯРТАЙ ХОЛБООТОЙ,ТЭР ТҮҮНИЙГ НҮХРҮҮ УНАГАСАН,ЭСВЭЛ НОМТОЙБАЯРТАЙ АРХИ УУГААД УХААНГҮЙ СОГТООД ӨӨРӨӨ УНАСАН ГЭЖ БУЙ ЮМУУ ДАА,ТЭГВЭЛ ТҮҮНИЙГ НЬ ХЭН, ХААНА,ЯАЖ НОТЛОВ,ӨРӨӨНД НЬ АРХИ УУСАН БАЙСАН Ч НОМТОЙБАЯР ТЭР НҮХРҮҮ ТҮЛХЭЭГҮЙ, АВЧ ШИДЭЭГҮЙ Л БОЛ ОРДОНД ХАМТ АРХИ УУСАН ГЭЖ,БАТХҮҮ АГСАН СОГТСОН БАЙСАН ГЭЖ ЭРҮҮГИЙН ХАРИУЦЛАГА ХҮЛЭЭХГҮЙ,АРХИ УУСАН БОЛ ЁС ЗҮЙН,ТОРГУУЛИЙН Ч ЮМУУ ХАРИУЦЛАГА БОЛ ХҮЛЭЭНЭ,ТАЛИЙГААЧ ЯАЖ ТЭР НҮХЭЭР УНАСНИЙГ ХӨДЛӨШГҮЙ БАРИМТААР НОТЛОХ,ҮҮНД ХЭН НЭГ ХҮН ЯМАР ХЭМЖЭЭГЭЭР БУРУУТАЙ ЮУ ГЭДГИЙГ ТОГТООХ ЁСТОЙ.

Зочин [202.9.46.212] 2020-01-22 15:03:19

Захидал захиалгаар бичигдээгүй л байгаасай даа. Энэ залууг хазайхаар нь түлхэлцэх гээд байгаа юм биш биз ээ. 8 сар дуугүй байж байгаад яагаад өнөөдөр дуу гарч эхлэв. Хуулийнхан шалгаж тогтоогоод хөдлөшгүй баримтаар нотолбол захидалтай захидалгүй шийдэх биз ээ....

Зочин [66.181.171.34] 2020-01-22 14:51:04

Нэг их ариун хүн байгаа ч үгүй л дээ.

ЗОЧИН [66.181.187.66] 2020-01-22 14:43:29

АПУ н Батсайхан номтойбаяраас үхтэлээ айх юмдаа адилхан л мөнгө байна том компани байна тэгсэн мөртлөө далдирч гүйгээд байхийн

иргэн [192.82.66.151] 2020-01-22 14:41:44

энэ захидлыг гайхаж байна.Яагаад 1 хүнрүү дайраад байгаа.Төрийн ордонд яг хүн цохиж амь насыг хохироох тийм зоригтой хүн байх уу.Ингэж одоо бүр МАН-ханыг хүртэл өөрсдынхөө талд оруулах гэж улайрч байгаа чинь шударга зүйл мөн үү.Энэ жүжиглэлтийг хийж байгаа нөхдүүд удахгүй нүгэл нь ил болж таараа.Хайртай хүнийхээ ясыг ингэж өндөлзүүлэх хэрэг эдэнд байгаад гайхаж харамсаж байна.Дотны хүнээ алдах хэцүү нөхж барахгүй гарз.Энэ гарзаа ийм аргаар олж нөхөж авна гэж бодож байгаа бол хармсалтай байна.Үүнийхээ оронд 1ч гэсэн буян хийж хүн баярлуулах нь үнэнд ойрхондоо.

Зочин [103.111.68.3] 2020-01-22 14:32:13

ЭНЭ УЛСАД ЭЗЭН БАЙНА УУ? ТӨРӨӨР ТОГЛОСОН ХЭДЭН ХУЛГАЙЧЫН УЛС БОЛЛОО....


10 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
10 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.