Дэлхийн эрүүл мэндийн байгууллагаас АНУ-ыг гаргах болно гэж Ерөнхийлөгч Дональд Трамп удаа дараа мэдэгдэж байсан бол энэ удаад албан ёсоор гарах мэдэгдлийг Конгресст хүргүүлжээ.

Энэ талаар Ардчилсан намын гишүүн, сенатч Роберт Менендес өөрийн Твиттертээ бичсэн байна.

Тэрбээр “Цар тахлын дэгдэлтийн үед Нэгдсэн Улсын Ерөнхийлөгч АНУ-ыг ДЭМБ-аас гаргах мэдэгдлийг Конгресст хүргүүллээ. COVID-ийн эсрэг Трампын барьж байгаа хариу арга хэмжээ эмх замбараагүй, уялдаа холбоогүй байна. Энэ шийдвэр АНУ-ын ашиг сонирхлыг ч, америкчуудын амь амьдралыг ч хамгаалахгүй. Америкчууд өвчтэй хэвээрээ, харин Америк ганцаараа үлдэнэ” хэмээн бичжээ.

Өнгөрсөн тавдугаар сарын 29-ний өдөр Вашингтон ДЭМБ-тай харилцаагаа бүрэн таслах талаар Трамп мэдэгдсэн. Тухайн үед тэрбээр ДЭМБ-ыг Хятадын хяналт дор ажилласан хэмээн буруутгасан юм. АНУ-ын Ерөнхийлөгчийн үзэж буйгаар БНХАУ-ын эрх баригчид болон ДЭМБ-ын удирдлага шинэ коронавирусийн халдвар дэгдэх үед шаардлагатай арга хэмжээ аваагүй гэнэ.

Эх сурвалж: ТАСС