Төв аймгийн Жаргалант суманд нэг айлын гурван бяцхан охин гэртэйгээ шатаж, амиа алдсан харамсалтай хэрэг гарчээ.

Онцгой байдлын газраас мэдээлснээр, Төв аймгийн Жаргалант сумын Өгөөмөр багт (аймгийн төвөөс баруун хойд зүгт 170 км-т, сумын төвд, Сэлэнгэ аймгийн Баянгол сумаас 56 км-т) байшин шатаж хажуугийн байшин руу тархан шатаж байна гэсэн дуудлагыг дөрөвдүгээр сарын 21-ний өдрийн 15:25 цагт хүлээн авсан байна.

Сэлэнгэ аймгийн Онцгой байдлын газрын Баянгол сум дахь 40 дүгээр ангийн алба хаагчдыг очиход иргэн Б-гийн 7х8 метрийн хэмжээтэй байшин шатаж байсныг ажиллаж унтраасан. Уг гал түймэрт Э (5 настай, эмэгтэй), Б (4 настай, эмэгтэй), Г (2 настай, эмэгтэй) нар өртөж нас баржээ.

Хаврын улиралд гал түймрийн эрсдэл өндөр тул холбогдох албаныхан иргэддээ аюулаас сэргийлж, үргэлж анхаарал болгоомжтой байхыг анхааруулж байна.

Б.ЖАРГАЛ