Зураг: Өвчтөний биед ходоодны дуран оруулж буй нь

МЭДЭЭ.МН сайт энэ удаа уншигч та бүхэндээ цөсний хүүдий авах мэс ажилбарыг орчин үеийн техник тоног төхөөрөмж ашиглан хэрхэн хийдэг болсон талаар сурвалжлага бэлтгэн хүргэж байна.

Сонгдо эмнэлгийн Ерөнхий болон дурангийн мэс заслын эмч Б.Баярсайхан энэ удаа бидэнд цөсний хүүдий авах хагалгаа хэрхэн хийдэг болохыг танилцуулахаар боллоо.

Өглөөний 09:00 цагт эхлэх хагалгаанд сувилагчид өглөөний 07-08 цагаас эхлэн бэлдэж, нойрсуулагч эмч өвчтөнг нойрсуулсан байв.

Зураг: Сувилагч нар дараагийн хагалгаанд бэлдэж буй нь

-АРИУТГАСАН ШИРЭЭ, ХАЛАДАНД ЭМЧ Ч ХҮРЭХГҮЙ ДҮРЭМТЭЙ-

Б.Баярсайхан эмч хэлэхдээ

“Энэ удаагийн хагалгаа цөсний хүүдий авах жирийн хагалгаа биш. Хоёр хагалгаа нэг дор орно. Өвчтөн цөсний хүүдийндээ маш их чулуутай байна гээд хагалгаанд орохоор ирсэн. Тэгтэл цөсний ерөнхий суваг гэж тусдаа зүйлд ямар нэгэн асуудал байна гэдгийг бид шинжилгээ хийгээд урьдчилж мэдсэн. Энэ оношлогооны дүнд зөвхөн чулуутай болсон хүүдийг нь авч болохгүй юм байна, харин дурангийн тусламжтайгаар ерөнхий сувгаас чулуу авах, ерөнхий сувагт нь гуурс байрлуулах хагалгаа түрүүлж хийсэн нь дээр юм гэдэг шийдэлд хүрсэн. Ингээд энэ хагалгааны дараа хэвлийн дурангаар цөсний хүүдий авах хагалгааг манай багийнхан хийх юм”

гэлээ.

09:00 цаг болж эмч нар хагалгааны өрөө рүү явлаа. Хагалгааны өрөө хамгийн ариун газар байх ёстой бөгөөд эмч нар орохын өмнө гараа тусгай зориулалтын хөл крант бүхий угаалтуурт угааж ариутгаад өрөө рүү орно. Ингэхдээ хаалганы бариуланд хүрч гарт нян бактер наалдахаас сэрмжилж мөн л хөл мэдэрч онгойдог хаалгаар орж гарна. Эмч нарыг ороход өндөр даралт бүхий ариутгагч өрөөнөөс ирсэн цэвэр халад тавьсан ширээ угтах бөгөөд энэ ширээнд хэн ч хүрч, ойртож болохгүй гэж хариуцсан сувилагч сануулах аж. Ариутгасан халадыг зөвхөн хариуцсан сувилагч нь эмчид өмсгөж, эмч ч гараа хүргэлгүй өмсөөд, резинэн бээлий гарт нь углахад сая нэг чөлөөтэй хөдөлж эхэлнэ.

Зураг: Ходоод руу дуран оруулж, дэлгэцээр хянаж буй нь

-ЦӨСНИЙ ХҮҮДИЙ АВАХАД 1СМ БҮХИЙ ХОЁР, 0.5 СМ БҮХИЙ ХОЁР НҮХ Л ГАРГАДАГ БОЛСОН-

Хагалгаа эхэлж, ханан дээрх цаг явж эхлэв. Эхний хагалгаанд унтуулгын эмч, түүний туслах эмч, сувилагч, дурангийн хоёр эмч, сувилагч, рентген техникч бусад туслах ажилтнууд оролцоно. Тэд ходоодны дуран өвчтөний амаар оруулан цөсний ерөнхий суваг руу орсон чулууг тусгай багажаар түүн авч, гуурс суулгав. Эмч нар хүний бие доторх чулууг авч байгаа ч нэг ч зүсэлт хийлгүй, зөвхөн дурангийн камер ашиглан дэлгэцэн дээр хөдөлгөөнийг нь хянан бүх үйлдлүүдээ хийж байна. Гэрэл унтарч рентген туяа асах бөгөөд рентген туяаны хорт нөхцөлөөс эмч нар өөрсдийгөө хамгаалахын тулд дунджаар 4 кг орчим хамгаалалтын хормогч халадан дотуур зүүж, бүтэн цаг гаруй зогсоогоор ажиллаа. Эхний хагалгаа амжилттай болов.

Гэрэл асч сувилагчид дараагийн хагалгаанд бэлдэж эхэллээ. Цөсний суваг дотор байсан чулууг авсан тул одоо цөсний хүүдий авах хагалгаанд орно. Хагалгааны өрөө хормын дотор танигдахын аргагүй өөр болж, рентген техник, ашиглаж байсан багаж хэрэгслүүдийг солив. Энэ хооронд өвчтөн унтаж байгаа тул тэд хором секунд ч хүлээлгэж болохгүй гэж дор дороо гүйлдэнэ.

Хоёр дахь хагалгаанд Б.Баярсайхан эмчээр ахлуулсан баг ажиллахаар орж ирэв. Ерөнхий эмч, хоёр туслах эмч, унтуулгын эмч, түүний сувилагч болон бусад туслах сувилагч нар. Тэд рентген туяанаас хамгаалах хамгаалалтын хормогчоо тайлж, ариутгах өрөөнөөс ирсэн ариун халадыг ахин авч ирж, задлав. Эмч мөн л гараа хүргэлгүй, сувилагчаар халадаа өмсүүлж, бээлийгээ өмсөв. Энэ удаа зүсэлт хийх тул мэс ажилбарт ашиглах багажууд өрсөн “ариун ширээ” хагалгааны өрөөнд авч ирэв. Ариун ширээнд ч мөн хүрч, ойртож болохгүй гэдгийг эмч, сувилагчид дор бүрнээ ухамсарлажээ.

Мэс ажилбар эхэллээ. Өвчтөний биед зүсэлт хийх хэсгийг тамаденаар арчиж, ариутгал хийлээ. Сувилагч ариутгасан хутга “ариун ширээ”-нээс эмчид авч өгч зүсэлт хийв. Нийт дөрвөн газарт буюу хоёр ширхэг 1 см, хоёр ширхэг 0.5 см нүх гаргав. Ингээд зүсэлт хийсэн газруудад тусгай гуурс суулган, суулгасан гуурсаар дамжуулан дуран бүхий камер оруулж, цөсний хүүдий хэсэгт хүрэв. Ингэснээр мэс ажилбар хянах дэлгэцээр үргэлжлэх боллоо. Эмч нар хянах дэлгэцийг харж, хүүдийг авахаар хайчилбар хийнэ. Хайчилбар хийх тоолонд хийгээр үлээлгэх бөгөөд үүнээс болоод тэр үү мэс ажилбарын үед зүсэхээс бусдаар огт цус үзэгдсэнгүй. Эрхтэнд бэхлэгдсэн цөсний хүүдийг салгаж авсны дараа, биед мэс ажилбарт зориулсан уут оруулан цөсний хүүдийг уутлан авав. Ууталсан цөсний хүүдий тэр чигтээ 1 см орчим нүхээр гарч багтахгүй тул эмч чулууг нь нэг нэгээр нь түүн гаргаж ирж байснаа, нилээд багасах үед нь ууттай нь татаж авснаар мэс ажилбарын гол ажил нугалагдлаа.

Харин одоо мэс заслын туслах эмч нар оёо хийж, сувилагч цөсний хүүдий болон чулууг ялган савлав. Мэс ажилбар дуусч, ханын цагаа унтраав.

Зураг: Рентген аппарат байршуулж буй нь

-ХОЁР ЦАГИЙН ДОТОР 16 ХҮН АЖИЛЛАЖ МЭС АЖИЛБАР АМЖИЛТТАЙ ДУУСЛАА-

Цөсний чулуу нь цөсний ерөнхий суваг руугаа орсон онцлог бүхий энэ хагалгаанд нийт 16 хүн хоёр цагийн дотор ажиллаж, хоёр өөр хагалгаа хийсэн нь энэ байв. Техник технологийн дэвшил бидэнд ийм гайхалтай боломжийг өгдөг болжээ. Цөсний чулуу нь цөсний ерөнхий суваг руугаа орсон ийм хагалгааг хийхдээ ихэвчлэн хоёр удаа хагалгаанд оруулж, хоёр удаа нойрсуулж тусад нь хийдэг. Чулуу нь суваг руугаа орсон гэдгийг оношилж чадалгүй шууд хагалгаанд оруулснаас дахин хагалгаанд орсон гэх өвчтөн ч тэнд байв.

Өөр нэгэн 39 настай өвчтөн цөсний хүүдий авахуулах хагалгаанд ороод гарсан байхтай нь бид таарч, энэ хагалгааны талаар лавлатал “Би бөгсөндөө тариулж ч чаддаггүй хүн юм. Жаахан айдастай байсан. Эмнэлэгт анх ирэхдээ чулуутайгаа мэдээгүй, өөр эмнэлэгт үзүүлтэл чулуугүй гэж гараад байснаас ийм явдал болсон. Нойр булчирхай гэж бодож явсан. Өвдөлт ихсэхээр нь өвчин намдаах эм уугаад л яваад байдаг байлаа. Энэ хамгийн буруу зүйл байсан. Ингээд хүндрээд, нэг л өдөр маш их өвдөөд бараг мөлхөж ирсэн. Хүмүүст хандаж хэлэхэд гадуур байдаг оношлогооны төвүүдэд үзүүлэлгүй шууд л ямар нэгэн эмнэлгийн оношлогооны төвд шууд хандах шаардлагатай юм байна лээ. Тэгэхгүй бол эмнэлэгт ирэхээр заавал тухайн эмнэлгээр дахин оношлуулах шаардлага гардаг юм байна. Манайхан заавал очдог ламтай, бөөтэй байдаг. Үүнийхээ оронд шууд л эмч рүү очиж байгаарай гэж хэлмээр байна” гэлээ. Тэрээр цөсний чулуугаа мэдэлгүй удаан явснаас идээлж, бугшсан тул 1.5 см нүх гаргаж байж авчээ.

Ингээд бид Сонгдо эмнэлгийн Ерөнхий болон дурангийн мэс заслын эмч Б.Баярсайханыг хагалгаанаасаа гарч ирсний дараа цөөн хором ярилцлаа. Тэрээр дараагийн хагалгаанд бэлдэхийн дээр, өрөөнийх нь үүдэнд дугаарлан суугаа өвчтөнүүдээ үзэх тул цөөн асуултанд хариулсан юм.

-ХОЁР САЛГАЖ ХИЙХ ХАГАЛГААГ НЭГ УДАА УНТУУЛААД Л НЭГ ДОР ХИЙЖ БАЙГАА НЬ МАНАЙ ЭМНЭЛЭГИЙН ОНЦЛОГ-

-Хоёр хагалгаа нэг дор болсон их онцлогтой хагалгаа боллоо? Ер нь эмнэлэгүүд ингэж хийдэг үү?

-Сая хоёр мэс ажилбарыг нэг дор хийснийг та бүхэн харсан байх. Эхнийх нь ходоодоор нь дуран оруулаад цөсний сувагт байгаа чулууг авч, гуурс тавих хагалгаа хийж байна. Дараа нь үргэлжлүүлэн манай баг ороод чулуутай хүүдийг нь авах ажиллагаа хийлээ. Бусад газарт хоёр ч хагалгаа болно гэсэн үг, манай эмнэлэгт л ингэж хийж байгаа юм.

-Хоёр хагалгааг нэг дор хийчихдэг болохоор унтаж байгаа өвчтөн нэг хагалгаа гэж ойлгодог байх нь ээ?

-Тиймээ. Энэ хүн хэзээ ч хоёр хагалгаанд орлоо гэж ярихгүй. Унтуулаад хоёр цагийн дотор хоёр төрлийн хагалгаа хийчихэж байгаа юм. Хүний сэтгэхүй л юм даа. Технологийн асар их гайхамшиг юм шүү дээ.

-Мэс ажилбар хийхэд мэс заслын багажууд хүний биед огт хүрдэггүй юм байна шүү дээ. Дандаа тусгай зориулалтын гуурсан дотуур орж гардаг гэдгийг харлаа.

-Трокар гэдэг тусгай гуурс хүний биед байрлуулаад, гуурсан дотуур мэс ажилбарынхаа багажуудыг оруулж ажилбар хийдэг гэсэн үг. Тэр том хүүдийг 1 см хэртэй жаахан нүхээр гаргаж авч байгаа нь л дурангийн мэс заслын гайхамшиг юм.

-Чулуунуудыг тусдаа уутанд хийж байж хүний биеэс гадагшлуулдаг юм байна лээ. Яагаад?

-Тийм. Дурангийн мэс заслыг технологийн хүчээр хийдэг учраас хүний биед эмч миний гар хүрэхгүй шүү дээ. Тийм болохоор чулуутай хүүдийг тусгай уутанд хийж байгаад гаргаж ирж байгаа юм.

-Ийм технологи байгаагүй үед цөсний хүүдий авах хагалгааг хэрхэн хийдэг байсан юм бэ?

-Хүний биеийг нээж зүсээд л, өөрийнхөө нүдээр хараад, гараа оруулаад авдаг байсан шүү дээ. Бидний эмээ өвөө нар гэдсэн дээрээ хагалгааны том сорвитой л явж байдаг. Гэтэл энэ хүмүүс хоёрхон хоноод л эмнэлгээс гараад явчихна. Дээр үед хамгийн багадаа 5-7 инч зүсэлт хийнэ. Гэтэл одоо 1 см-ийн хоёр нүх, 0.5 см-ийн хоёр нүх л гаргаж байгаа юм. Энэ мэс ажилбарыг хаа сайгүй л хийж байгаа, гэхдээ ийм онцлогтой өвчтөнд хоёр цагт хоёр хагалгааг нэгэн зэрэг хийж байгаа нь онцлог юм.

-Хүүдийг хайчилж авч байхад хийгээр үлээлгэдэг нь ямар учиртай юм бэ?

-Хэвлийд CO2 үлээлгэж, шалчгар байгаа хэвлий доторх эрхтнүүдийн хооронд зай гаргаж байгаа юм.