Өнөөдөр Боловсрол, соёл, шинжлэх ухаан, спортын сайд Ц.Цогзолмаа НҮБ-ын Хүн амын сангийн Монгол дахь суурин төлөөлөгч Наоми Китахараг хүлээн авч уулзжээ. Төлөөлөгч Наоми Китахарагийн томилолтын хугацаа дуусч эх орондоо буцах гэж байгаа юм. Тэрээр Монгол Улсад ажиллах хугацаандаа залуучуудын хөгжил, жендерт суурилсан хүчрхийлэлтэй тэмцэх асуудал, ерөнхий боловсролын сургууль, цэцэрлэг, дотуур байрны эрүүл ахуйг сайжруулахад чиглэсэн олон төсөл хөтөлбөрийг БСШУСЯ-тай хамтран хэрэгжүүлсэн байна.

БСШУС-ын сайд Ц.Цогзолмаа, НҮБ-ын Хүн амын сантай өрнүүлж буй олон жилийн хамтын ажиллагааны үр дүнд сэтгэл хангалуун байгаагаа илэрхийлээд бүх талаар дэмжлэг үзүүлж, салбарын хөгжилд оруулсан хувь нэмрийг нь өндрөөр үнэлж Наоми Китахараг “Боловсролын тэргүүний ажилтан” цол, тэмдгээр шагнажээ.

НҮБ-ын Хүн амын сангийн дэмжлэгээр боловсрол, соёл, шинжлэх ухаан, спортын салбарт маш олон төсөл хэрэгжүүлэн үр дүнд хүрсэн аж. Мөн тодорхой цаг хугацааны дараа үр дүн нь гарах олон ажлыг хамтдаа эхлүүлсэн гэдгийг БСШУС-ын сайд онцолсон байна. Тухайлбал, олон жил тасарсан эрүүл мэндийн хичээлийн хөтөлбөрийг сэргээж оруулсан нь өөрөө эцэг, эхчүүд болон олон нийтээс талархал хүлээгээд байгаа билээ. Китахарагийн хувьд БСШУСЯ-тай хамтран хэрэгжүүлсэн төслүүдээ дэмжин ажиллахаас гадна НҮБ-ын харьяа байгууллагуудыг идэвхжүүлж, манлайлан ажилласанд нь талархаж байгаагаа Ц.Цогзолмаа сайд илэрхийлжээ.

Тус уулзалтад НҮБ-ын Хүн амын сангийн Монгол дахь салбарын тэргүүн Каори Ишикава байлцсан юм. БСШУС-ын сайд Ц.Цогзолмаа түүнийг НҮБ-ын Хүн амын сангийн Монгол дахь салбарын тэргүүнээр ажиллахаар болсонд баяр хүргэн, тус сантай цаашид олон хөтөлбөр, төслүүд дээр хамтран ажиллана гэдэгт итгэлтэй байгаагаа илэрхийллээ.