-НИТХ ДЭЭРХ ТООЦООЛООГҮЙ НӨХЦӨЛ БАЙДАЛ-

МАН-ын дарга У.Хүрэлсүхийн нам дотроо эхлүүлсэн тэмцлийн гол цэг нь хотын фракцийг чиглэж буй. Гэвч өчнөөн шат дараалсан улс төрийн акци хийж, хүнд шийдвэрүүд гаргаж ажилласны эцэст Нийслэлийн шинэ засаг дарга нь хотын фракциас томилогдлоо. Огт хүлээгээгүй үр дүн, төсөөлөөгүй шийдвэр НИТХ дээр гарсан нь өнгөрөгч долоо хоногийн улс төрийн хүрээний голлох үйл явдал болов.

Тодруулбал, хотын дарга асан С.Батболдын суудлыг НИТХ дахь Ц.Сандуйгийн фракцид багтдаг С.Мөнхчулуунд өгөхийг Нийслэлийн иргэдийн хурлын төлөөлөгчдийн олонхи дэмжсэн юм. С.Мөнхчулууныг хотын дарга болохыг Ц.Сандуйгийн талын 14 төлөөлөгч, хотын дарга асан Э.Бат-Үүл тэргүүтэй сөрөг хүчний 10 төлөөлөгч дэмжлээ.

Уг нь НИТХ-ын өмнөх орой Нийслэлийн МАН-ын хорооны дарга Д.Сумъяабазар, МАН-ын генсек Д.Амарбаясгалан нар НИТХ дахь МАН-ын бүлгийн төлөөлөгчидтэйгөө уулзсан. Ингэхдээ С.Амарсайханыг дэмжих чиглэлд санал нэгдсэн байв.Гэвч маргааш нь төлөөлөгч С.Мөнхчулуун өөрийгөө дэвшүүлж, улмаар сөрөг хүчин бүхэлдээ дэмжсэнээр тооцоолоогүй нөхцөл байдал үүсгэсэн билээ.

Эх сурвалжуудын мэдээлж буйгаар, санал хураалтын өмнө УИХ-ын дарга М.Энхболд Ц.Сандуйгийн талын төлөөлөгч нэг бүртэй утсаар ярьсан аж. Улмаар Э.Бат-Үүл баатарын шүүх дээр асуудлыг намжаах чиглэлд тохиролцож, сөрөг хүчин зангигдсан гэх мэдээлэл ч бий. Төлөөлөгч бүрт 500-800 сая төгрөгийн тендер амласан гэсэн мэдээллийг өгч буй нь ч анхаарал татна. Энд тодорхой байгаа зүйл нь, У.Хүрэлсүх ч, М.Энхболд ч хотын даргыг өөрийн талдаа авахын төлөө ихээхэн мэрийлт гаргаж ажиллалаа.

-С.МӨНХЧУЛУУН НИТХ ДЭЭР ДАХИН ЯЛВАЛ ШУУД ХОТЫН ДАРГААР АЖИЛЛАНА-

Одоо цаашаа ямар процесс өрнөх вэ гэхээр, мэдээж У.Хүрэлсүх ийм их тэмцлийн дараа хотын даргыг М.Энхболдын талд өгөхгүй. Тэгэхээр С.Мөнхчулууныг хотын даргаар батламжлахгүй гэсэн бичиг хийх чигтэй байна. Холбогдох хуулиараа Ерөнхий сайд бичгээ тав хоногийн дотор хийж өгөх учиртай. Батламжлахаас татгалзсан тохиолдолд тухайн өдрөөс 14 хоногийн дотор НИТХ дахин хотын даргын томилгоог хэлэлцэх зохицуулалттай билээ.

Ингэхдээ өмнөх нэр дэвшигчдийг солих эсэхийг талууд өөрсдөө мэдэн шийддэг аж. Энд бас нэг сонирхолтой зүйл байна. Хэрвээ С.Мөнхчулуун дахин хотын даргад нэр дэвшиж, олонхийн санал авбал Ерөнхий сайдын батламжлал хүлээх шаардлагагүй. Холбогдох хуулиараа шууд хотын даргаар сонгогдоод явах эрх эдлэх юм байна. Тиймээс ч дараачийн НИТХ дээр хоёр талаас ихээхэн ухаан зарж, жинхэнэ утгаар нь уран мэхээ уралдуулах шаардлага үүсч буй юм.

НИТХ дээр үүсээд буй нөгөө нэг процессын ойлгомжгүй байдал нь С.Амарсайхан ажлаа үргэлжлүүлэн хийх эсэх асуудал. Хотын даргад нэр дэвшихдээ түүнийг НИТХ-ын даргаас чөлөөлөгдөх хүсэлтээ өгсөн гэх мэдээлэл явсан. Үүнийг хэвлэлийн төлөөлөгч нь үгүйсгэв. Гэхдээ Р.Дагвыг НИТХ-ын даргаар томилохоор МАН-ын Удирдах зөвлөлөөс шийдвэр гаргаад байсан.

Улмаар НИТХ-ын эхэнд хотын даргын томилгоо, дунд нь томуу, томуу төст өвчний тархалтын мэдээлэл, тэгээд НИТХ-ын даргын томилгоог хэлэлцэхээр байсан. Тэд тооцохдоо хотын даргаар С.Амарсайхан сонгогдонгуут Ерөнхий сайд шууд батламжилна. Тэр хооронд нь НИТХ томуугийн тархалтын асуудлаар мэдээллээ сонсоно. Дараа нь С.Амарсайхан хотын даргын ажлаа хүлээн авч, НИТХ-аар үргэлжлүүлэн, НИТХ-ын шинэ даргын томилгоог хэлэлцэнэ гэж тооцоолж байж.

ЭЦЭСТ НЬ:

Гэвч У.Хүрэлсүхийн талын энэ тооцоолол нуран унаж, нөгөө талд М.Энхболдынхон алга ташцгаасан юм. Дээрх тооцооллыг харахад, хэрвээ хүсвэл Ерөнхий сайд хотын даргыг нэг цагийн дотор ч батламжилчих боломжтой аж. Одоо харин нөхцөл байдал өөрөөр эргэсэн тул сайн тооцож, нягталж байж, С.Мөнхчулуунаас татгалзах шаардлага үүсээд байна.

Ж.Эрдэнэбатын тэргүүлсэн Засгийн газар огцордог жил НИТХ болохгүй хагас жил гаруй болсон. Ийм байдал Нийслэл дээр яавч дахин давтагдаж болохгүй. МАН сонгуулийн циклт хугацаагаа бодсон ч тэр, хотоо ойлгомжгүй байдлаар удаан явуулах үндэслэлгүй билээ. Тиймээс ч их удахгүйгээр Нийслэл дээрх МАН-ын “зодоон” намжина гэсэн таамгийг дэвшүүлж байна.