-АНХ УДАА МАШ ИХ ХЭМЖЭЭНИЙ МӨС ХИЛЭЭР НЭВТРҮҮЛСЭН ТОХИОЛДОЛ БОЛОВ-

Өнөөдөр 13 цагт Цагдаагийн ерөнхий газрын хар тамхитай тэмцэх газар, Гаалийн ерөнхий газар, Нийслэлийн цагдаагийн газар хамтран Тайланд улсаас Монгол улс руу шуудан илгээмжээр хар тамхи хүлээн авсан этгээдийг газар дээр нь саатууллаа. Яг одоо хүлээн авсан бодисыг шалгах ажиллагаа үргэлжилж байна.

Манай улсын хилээр хууль бусаар хар тамхи оруулж ирсэн Нигер улсын иргэн Шон нь гадаад хэлний сургалтын төвд багшилдаг 31 настай иргэн бөгөөд тус мансууруулах бодисыг илгээмжээр хүлээн авч, хууль бусаар хадгалж байгаад ийнхүү үйлдэл дээрээ баригдсан байна. Дээрх илрүүлсэн хар тамхи нь мансууруулах үйлчилгээтэй мөс буюу /ICE/ хэмээх бодис аж. Хар тамхитай тэмцэх албаны мөрдөгчид илгээмж ирсэн гэх мэдээллийн дагуу гүйцэтгэх ажиллагаа явуулж газар дээр нь баримтжуулан саатуулсан юм.

Энэ нь Монгол улсын хэмжээнд маш их хэмжээний буюу 300 сая төгрөгтэй дүйцэхүйц хэмжээгээр хар тамхи илэрсэн анхны тохиолдол болж буйг албаныхан мэдээлэв. Хар тамхины төрлийн бодис хууль бусаар хилээр нэвтрүүлсэн Нигер улсын иргэн Шон нь багшлах эрхийн бичигтэй ба манай улсад өмнө нь ямар төрлийн ажил эрхэлж байсан нь тодорхойгүй байгаа аж. Мөн өнөөдөр Нигер улсын иргэн Шон гэгчтэй хамаарал бүхий хоёр гадаадын иргэнийг уг хэрэгт холбогдуулан саатуулжээ.

-ТАЙЛАНД УЛСААС МОНГОЛ УЛС РУУ ИЛГЭЭМЖЭЭР ИЛГЭЭСЭН-

Нийслэлийн прокурорын газрын Хэрэг бүртгэх, мөрдөн байцаах албаны хоёрдугаар хэлтсийн дарга Н.Амарсанаа

-Өнөөдөр өглөө Нийслэлийн прокурорын газар, ЦЕГ-тай хамтран Нигер улсын иргэн Монгол улсын хилээр их хэмжээний хар тамхи нэвтрүүлсэн. Мөн өөрөө тээвэрлэж, биедээ хадгалж байсан нөхцөл байдлыг илрүүлэн хэргийн газарт прокурорын хяналтан доор хуулийн дагуу гүйцэтгэх ажиллагаа явууллаа. Дээрх иргэн мөс буюу "ice"-ийг их хэмжээгээр Тайланд улсаас Монгол улс руу явуулсан илгээмжинд илэрсэн байгаа. Эрүүгийн хуулийн дагуу цаашид цагдан хорьж хуулийн дагуу арга хэмжээ авна.

ЦЕГ-ийн Хар тамхитай тэмцэх газрын ахлах мөрдөгч, цагдаагийн ахмад С.Батзориг

-Дотор ямар ажиллагаа явагдаж байна вэ?

-Нэгдүгээр сарын 28-ны өдөр ЦЕГ-ын Хар тамхитай тэмцэх алба, НЦГ, ГЕГ хамтран гадаад улсаас их хэмжээний хар тамхи мансууруулах төрлийн бодис Монгол улсын хилээр нэвтрүүлсэн хэргийг илрүүлэн шалгаж байна. Энэхүү ажиллагаа гурван байгууллагын хамтарсан ажиллагаа бөгөөд мөрдөн байцаалт дөнгөж эхэлж байна. Цаашид үргэлжлүүлэн мөрдөн шалгах ажиллагаа явагдах тул нарийн мэдээлэл өгөх боломжгүй байна.

ГЭРЭЛ ЗУРГИЙГ: Г.БАЗАРРАГЧАА