Улаанбаатар хот Засаг даргагүй хоёр сарыг үдэв. НИТХ-аас Хотын даргад С.Мөнхчулууныг томилох шийдвэрийг 2019.01.16-ны өдөр төлөөлөгчдийн олонхийн саналаар гаргасан. Харин батламжлуулах бичгийг 2019.01.24-ний өдөр НИТХ-ын дарга С.Амарсайханы зүгээс Ерөнхий сайд У.Хүрэлсүхэд илгээсэн юм. Гэвч Ерөнхий сайд У.Хүрэлсүх С.Мөнхчулууныг Хотын даргаар батламжлахгүй өнөөдрийг хүрсэн нь олон нийтийн анхаарлыг татаад байна.

Ерөнхий сайд У.Хүрэлсүхийн хувьд төрийн бүхий л эрх мэдлээс Хотын фракцынхныг салгахын тулд М.Энхболдыг УИХ-ын даргаас, С.Батболдыг Хотын даргаас, Д.Хаянхярвааг бүлгийн даргаас чөлөөлж оронд нь өөрийн ойр, дотны хүнийг томилох хүсэлтэй байсан. УИХ-ын дарга, бүлгийн даргад өөрийн хүнийг томилсон ч Хотын дарга дээр ялагдаж, хотын фракцаас С.Мөнхчулуун ялалт байгуулсан билээ. Энэ нь У.Хүрэлсүхийн Ерөнхий сайд болсноос хойшхи анхны ялагдал гэж хэлж ч болох юм.

Ерөнхий сайд У.Хүрэлсүхийн хувьд С.Мөнхчулууныг батламжлахгүй буцаах магадлал өндөр байна гэж эх сурвалжууд хэлж байна. Хэрвээ батламжлахгүй гэсэн бичиг илгээсэн тохиолдолд НИТХ 14 хоногт дахин томилгоог хэлэлцэнэ. Тэндээс С.Мөнхчулуун дахин ялалт байгуулвал Хотын даргад шууд томилогдох хуулийн заалттай.

Өөрийг нь батламжлах эсэхээр ямар нэгэн хариу, мэдээлэл огт ирүүлээгүй гэдгийг С.Мөнхчулуун хэлж байна. Тэрбээр

“Хотын даргад дэмжигдсэн хүнийг хэд хоногийн дотор батламжилна гэсэн хуулийн хугацаагүй ч бусад байгууллагатай хамтран шийдвэрлэх албан бичигт 30 хоногийн дотор хариу өгнө гэх зохицуулалт бий. Тэгэхээр намайг батламжлах эсэхээр АТГ-тай зөвлөлдөх учраас 30 хоногтоо багтан хариу өгнө гэдэгт итгэж байна” гэлээ.

Харин У.Хүрэлсүхийн талынхан С.Мөнхчулууныг батламжлахгүй тохиолдолд дараагийн удаа Хотын даргад хэнийгээ өрсөлдүүлэх вэ гэдэгт толгойгоо гашилгаж буй.

С.Мөнхчулуун дахин ялалт байгуулбал Хотын даргын ажлыг шууд хийх хуулийн зохицуулалттай учраас Ерөнхий сайд У.Хүрэлсүх “батламжлахгүй” гэх хариуг яаран өгөхгүй байгаа гэх. Дараагийн удаа С.Мөнхчулууныг зайлшгүй ялах нэгнийг нэр дэвшүүлэх цаашлаад НИТХ дэх саналаа хайрцаглах зэрэг олон асуудлаар яс, тас тохирсны дараа батламжлах эсэх хариугаа өгөх сураг байна.