Орчин үеийн залуусын амьдралын хэв маяг, бизнес, сонирхол, мэдлэг хувьсан өөрчлөгдсөөр байна. Энэ удаа бид уншигч та бүхэнтэйгээ өөрийн сонирхлоор Англи, Орос, Франц, Япон, Солонгос хэл суралцсан 24 настай Очирбатын Билгүүнийг уулзуулж байна. Тэрээр Английн “The University of Birmingham” сургуулийг утга зохиол судлаач, хэл шинжээч мэргэжлээр төгссөн. Өөрийн хэлний мэдлэг, гадаад хэл хэрхэн суралцсан түүхээсээ “Youtube” дэх 23 мянган дагагчтай Bilgunss сувгаараа дамжуулан хуваалцдаг. Тэрээр олон хэлний боловсролоос гадна гадны улс орнууд руу бие даан аялаж, өөрийн олсон мөнгөөрөө тэндээ амьдарч, дэлхийн улс орнуудын соёлоос суралцах дуртай.

YOUTUBE: bilgunss

FACEBOOK: bilgunss

INSTAGRAM: bilgunss

О.Билгүүн:

-ТУН УДАХГҮЙ ӨӨРИЙН СУРГАЛТЫН ТӨВӨӨ НЭЭХЭЭР АЖИЛЛАЖ БАЙНА-

-Юуны өмнө таныг уншигчидтайгаа танилцуулъя.

-Намайг Билгүүн гэдэг. Энэ дөрөвдүгээр сард 24 нас хүрэх гэж байна. Миний мэргэжил англи хэл, уран зохиол судлаач. Одоогоор яг тогтсон ажилгүй ч өөрийн гэсэн сургалтын төв эхлүүлэхээр бэлтгэл ажлаа хангаж байгаагийн дээр “youtube” сувгаа хөгжүүлж, улам чанартай зүйл хийхээр ажиллаж байгаа.

-Ярих ур чадвар тийм ч сайн биш гэж та ярилцлагын өмнө хэллээ. Гэсэн ч “youtuber” болж олны өмнө өөрийгөө илэрхийлж, ярьж байна шүү дээ. Өөртөө итгэлгүй ч хийж болох юм байна гэдгийг олон залууст үлгэрлэж байгаа байх?

-Би ярихдаа их муу. Магадгүй олон хэл холиод сурчихсан болохоор Монгол хэлээрээ шууд ярихаар сул үг ихтэй ярьдаг байх. Зарим үг орж ирдэггүй болохоор гадаад үгээр орлуулах нь бий. Тиймээс би “youtube”-ийн бичлэгээ хийхийн тулд өмнө маш сайн бэлдэж, судалгаа хийж хариуцлагатай ханддаг. Ярих зүйлийнхээ түлхүүр үгийг бичиж байгаад ярих нь их зөв сонголт байдаг. Тиймээс маш сайн бэлтгэл хийгээд яривал асуудалгүй санагддаг.

-Youtube сувгаа эхэлсэн түүхээ хуваалцахгүй юу?

-Би жаахан байхаасаа эхлээд л нэвтрүүлэгч болох мөрөөдөлтэй байлаа. Дээр үед Сансар кабелийн сувгаар нэвтрүүлэгч охид утсаар үзэгчидтэй холбогдон ярьж байгааг харчихаад л их дуурайж тоглоно. Камер тавиад л өөрийгөө нэвтрүүлэгч гэж төсөөлөн тоглодог байлаа. Их сургуульд ороод бас л энэ мөрөөдлийнхөө дагуу камераар өөрийгөө бичиж, ярина. Тэр үед гадаад улс руу их аяладаг байсан учраас янз бүрийн хоол амтлаж, идэж явсаар их ч жин нэмсэн байсан. Үүнээсээ болоод өөртөө итгэлгүй байсан болохоор хийсэн бичлэгүүдээ гаргаж тавьж чаддаггүй байсан. Ингээд хувь хүний хувьд ч тэр мэдлэг боловсролын хувьд ч өөрийгөө хөгжүүлж явсаар сургуулиа төгсөж, ажилтай болсон. Энэ үед ч бичлэг хийх хүсэл минь дотор байсан хэвээрээ. Тиймээс мөнгөө цуглуулж камер худалдаж аваад олон жил бодсон хүслээ биелүүлэхээр зориг шулуудсан. Анх бичлэг хийхдээ хүмүүс шиг утсаа бариад л, өөрийнхөө өдөр тутамд юу хийж буй талаараа ярих биш бусдад хэрэгтэй мэдээлэл, зөвөлгөө өгөх гэж хичээсэн. Ингээд юу хийвэл хүмүүст хэрэгтэй байх вэ, юу хийвэл хүмүүст сонирхолто байх вэ гэдгийг маш сайн төлөвлөж байж бичлэгээ эхлүүлсэн дээ.

-АНХНААСАА МӨНГӨ ОЛОХ ГЭЖ YOUTUBE ХИЙГЭЭГҮЙ-

-Та Youtube хийгээд хэр удаан хугацаа өнгөрсөн бэ?

-Өнгөрсөн жилийн тавдугаар сараас эхэлсэн. Жил хараахан болоогүй байна. Хэл хэрхэн суралцах вэ гэсэн видеогоо тавьснаас хойш дагагчдын тоо их хурдан өссөн, хүмүүс их сонирхдог шиг байна лээ.

-Та долоо хоногт ойролцоогоор хэдэн бичлэг хийдэг вэ?

-Одоохондоо бичлэг хийхгүй байгаа. Монголд ирээд орчин солигдсоноос тэрүү сэтгэлийн хямралд ороод эрч хүчтэй эхэлж чадахгүй л байна. Хажуугаар нь их ажилтай байгаа болохоор төдийлөн анхаарч чадахгүй байгаа. Ерөнхийдөө долоо хоногт ганц л чанартай бичлэг гаргахыг боддог. Амьдралаа харуулдаг бичлэг биш бүтээлч, мэдээлэл бүхий бичлэг гаргахыг хүсдэг учраас нилээд хугацаа, хөдөлмөр шаарддаг.

-Техникийн хувьд та ямар камер, ямар компьютер, ямар программ ашигладаг вэ?

-Анхнаасаа чанартай камер хэрэглэхийг хүссэн учраас Canon 7D суурин байдлаар ашигладаг. Хоёр дахь нь Panasonic Lumix бий, дэлгэцээр нь өөрийгөө хянаж болдог, авч явахад хөнгөн байдаг учир ихэвчлэн энэ камерыг ашигладаг. Харин компьютерийн хувьд жирийн компьютер дээр бичлэг эвлүүлэхэд гацаад байдаг учраас Macbook Pro саяхан худалдан авсан. Гэсэн ч бичлэг эвлүүлэхэд нилээд чимээ гараад их ачааллаж байгаа нь мэдэгддэг. Үүн дээрээ Adobe Premier Pro ашиглаж эвлүүлгээ хийдэг. Гэхдээ ямар ч программаар ашиглаж болно шүү дээ. Youtube дээр байдаг “бичлэг хэрхэн эвлүүлэх вэ” гэсэн олон зааврыг харж байгаад л янзалчихна. Хэрэв утасны апп-аар эвлүүлгээ хийвэл чанар нь их унадаг, хүмүүс ч тийм бичлэг үзэх дургүй байдаг. Нягтрал, дуу чимээ нь ч муу байдаг.

-Танай гэр бүлийнхэн интернэтэд өөрийн бичлэгээ оруулж байна гэхээр хэрхэн хүлээж авдаг вэ? Залуусын бас нэг айдас энэ шүү дээ.

-Эхлээд юу хийгээд байгааг минь мэддэггүй байсан. Анх ахаасаа камерыг нь зээлж авч бичлэгээ хийж байсан болохоор сайн мэдэхгүй их гайхсан. Аав бичлэг хийж тавих гэж байгааг мэдчихээд “Цаагуур чинь хүмүүс интернэтээр янз бүрийн юм уншаад амиа хорлоод байна шүү, болгоомжтой байгаарай” гэж хэлж байсан. Би их сэтгэлийн хөдлөлтэй хүн болохоор аав надаас болгоомжилсон байх. Янз бүрийн муу, муухай сэтгэгдлүүд орж ирдэг гэж аавын найз аавд хэлсэн гэсэн. Өөр юм хэлж байгаагүй юм байна. Харин ээж бол их дуртай. Миний охин тэдэн дагагчтай болчихсон байна лээ, чиний бичлэгийн доор тэгээд биччихсэн байна лээ гээд л ярьдаг юм.

-“Youtube” сувагт хэдэн дагагчтай болж байж цалин авч эхэлдэг юм бэ?

-1000 дагагчтай байх. Гэхдээ дагагчийн тооноос бус таны бичлэгийг хэр удаан хугацаанд үзсэн бэ буюу “watch time”-ийг нь харж байж “partner” боллоо гэдгийг мэдэгдсэн захидал илгээдэг.

-Танд тийм захидал ирсэн үү?

-Ирсэн. Гэхдээ мөнгө бараг л мөнгө олдоггүй. Хэрэв би Англиар яриад ч юм уу гадаад үзэгчтэй байсан бол арай дээр. Гэвч миний үзэгчид ихэвчлэн Монголд байдаг, дээр нь монгол компаниуд “youtube” дээр зараад тавьдаггүй учраас мөнгө бараг олдоггүй. Гадаадад бол 1000 үзэгчид нэг доллар байдаг ч Монголд энэ нь хүчингүй. Угаасаа би өөрөө анхнаасаа мөнгө олно гэж Youtube хийгээгүй, худлаа гэдгийг мэдэж байсан. Надад ирж байгаа мэдрэмж л сайхан санагддаг.

-ДУРТАЙ ЗҮЙЛЭЭ ОЛЖ, ТҮҮНИЙХЭЭ ТӨЛӨӨ СУРАЛЦАХ НЬ ИХ ҮР ДҮНТЭЙ-

-Анхны бичлэг тань Кит кат-ын амталгаа байсан бол дараа нь хэл хэрхэн сурах талаар зөвлөгөөнүүд орж эхэлсэн байдаг. Та одоо ямар ямар гадаад хэл мэдэх вэ?

-Миний гол гурван хэл бол Монгол, Орос, Англи хэлээр сайн ярьдаг. Мөн Япон, Солонгос хэлүүд гайгүй, Франц хэлээр чамгүй ярьдаг.

-Гадаад хэлтэй анх хэдэн наснаасаа танилцаж, хэрхэн сурч эхэлсэн бэ?

-Манай гэр бүл Орос “школа”-тай, аав ээж хоёр маань хоёулаа Орос улсад сургууль төгсөж ирсэн хүмүүс байдаг. Тийм ч учраас ах, дүү бид гурвыг багаас нь Орос сургуульд өгчихсөн. Тиймээс би бараг таван наснаасаа суралцаж эхэлсэн. Манай сургуульд хичээлүүд ихэвчлэн орос хэлээр ордог байсан нь энэ хэлийг сурах түлхүүр болсон болов уу. Тухайн үед манайд Англи хэл ч заадаг байсан ч би төдийлөн сайн суралцдаггүй байлаа. Харин дараа нь Америк дуучдыг сонсох дуртай болж, тэдний талаар мэдээлэл, тэдний дуулсан дууны үг, нэвтрүүлгийг өдөр шөнө ялгалгүй, сонсож, орчуулж, үзэж байсан. Үүнээс болж л Англи хэлийг сурсан гэж боддог. Мөн л тухайн үед манай сургуульд Хятад хэл зааж байсан ч энэ хэлийг яагаад ч юм сураагүй. Харин Солонгос хэлийг анх K-Pop сонсдог болсноор суралцаж эхэлсэн. Франц хэлийг мөн л тухайн орны нэг иргэнийг ихэд сонирхож судалсаар суралцсан. Япон хэлийг аниме үзэх болсноор сурсан.

-Тэгэхээр таны суралцсан арга барил дандаа л хувь хүний сонирхол, хэрэгцээн дээрээ тулгуурласан байх юм. Өөрийгөө хүчлэхээс илүүтэй дуртай зүйл рүүгээ чиглүүлэх нь хэл сурах хялбар арга юм уу даа?

-Тийм. Намайг албадах юм бол би хэдэн ч цаг заасан суралцдаггүй. Харин ямар нэг зүйлийн гоё өнцөг, сайхан талыг нь олоод л харчих юм бол түүн дээрээ төвлөрөөд суралцаад, хөгжүүлээд явчихдаг.

-Та хэл сурахад хамгийн чухал зүйл нь юу гэж бодож байна?

-Их олон хүн надаас яаж хурдан сурах вэ, яаж сонирхолтой сурах вэ гэж асуудаг. Хамгийн чухал зүйл бол дуртай зүйлээ олох. Тэгээд түүнийгээ дагуулаад суралцах нь маш үр дүнтэй арга шиг санагддаг. Би жишээлбэл, К-Рор урлагт татагдаад л тэр хүмүүсийн ярьж байгаа нэвтрүүлгийг ойлгохыг хүсэж, тэдний дуулж байгаа дууны утгыг мэдэхийг хүсээд л суралцаж байгаа юм. Тодруулбал, таны амьдралд тухайн хэл өдөр тутамд хэрэглэгдэж байх нь чухал. Өдөр тутамдаа бага багаар ашигласаар зуршил болчихдог учраас эхлүүлэх л хэрэгтэй.

-Та одоо эдгээр хэлний мэдлэгээ юу юунд ашиглаж байна?

-Өөрийгөө хөгжүүлэхэд л ихэвчлэн ашигладаг. Ихэнх мэдээлэл англи хэл дээр байдаг болохоор Монгол хэл дээрх мэдээллийг бараг уншдаггүй. Ном уншихдаа ч англи хэл дээр уншдаг. Яг одоогоор би маркетингийн чиглэлээр нэг байгууллагад ажиллаж байна. Тиймээс ажлын шаардлагаар компани, хөрөнгө оруулалт, хөрөнгө оруулагчдын талаар мэдээлэл судлах гэх мэтэд л ашиглаж байна даа.

-Тун удахгүй өөрийн сургалтын төвөө байгуулах гэж байгаа гэсэн. Ямар сургалтын төв байх вэ?

-Сургалтын төв гэхээсээ илүүтэй хүүхдийн хөгжлийн төв гэж хэлж болно. Би өөрөө чөлөөт цагаараа олон зүйлийг туршиж, шинээр нээж, хийж үзэх хүсэлтэй байдаг. Тийм ч учраас хүүхдүүдийг шинэ зүйлс хийх боломжоор хангахыг хүссэн. Нэг зүйлээ мянган удаа хийхээс илүүтэй долоо хоног бүр нэг шинэ зүйлд суралцаж үзвэл сайхан. Хэл сурахдаа маш бүтээлчээр ажиллаж, янз бүрийн гоё зүйлс хийж сурах боломж олгохыг хүсч байна.

-ДОЛООН САРЫН ТУРШ ХОЁР АЖИЛ ЗЭРЭГ ХИЙЖ
ТӨЛБӨРИЙН МӨНГӨӨ ОЛСОН-

-Үзэгчийн хувьд таны бичлэгүүдээс хэл суралцах тухайгаас гадна гадны улсууд руу явж, тэндэхийн соёлыг бидэнд харуулдаг. Сүүлд Япон явсан байсан. Ер нь та ямар ямар улсуудаар явж үзсэн бэ?

-Сая Японд зургаан сар амьдарчихаад ирсэн. Аяласан болоод амьдарсан улсуудыг бүгдийг нь дурдана гэвэл Орос руу их олон удаа явж байсан. Мөн Хятад, Солонгос, Турк, Итали, Испани, Португаль, Их Британийн дөрвөн улс, Вьетнам гэх мэтийг дурдаж болно.

-Энэ олон улс руу ар гэрээсээ л мөнгө авч явсан даа гэж олон хүмүүс ойлгох байх. Сүүлд Япон явахдаа өөрөө ажил хийж мөнгөө цуглуулж явсан тухай, очоод төлөвлөсөн мөнгө хүрэлцээгүй болсон тухай та ярьж байсан. Ер нь гадны улсууд руу явах мөнгөө та яаж олдог юм бэ?

-Тухайлбал, сүүлд Япон явахын өмнө сургуулиа төгсөж ирээд хоёр ажил давхар хийсэн. Нэг нь сургуульд гадаад хэлний хичээл заадаг байсан бол нөгөө нь байгууллагад маркетингийн ажил хийж байсан. Их жижигхэн Франц сургууль байсан болохоор хагас цагаар буюу өглөө хичээлээ заачихаад л өдөр нөгөө ажилдаа явна. Цалин их өндөр авдаг байсан болохоор тэр бүх мөнгөө цааш нь хийж хадгална. Явна гэдгээ мэдсэн өдрөөсөө хойш гэрээсээ гарч, элдэв хоол идэхгүй, кофе уухгүй, юм худалдаж авахгүй, найз нөхөдтэйгөө ч уулзалгүй мөнгөө хадгалсан. Япон руу хүүхдүүд ихэвчлэн хэлний сургуульд явдаг. Би ч ялгаагүй тэгж явсан. Уг нь ажилд бүртгүүлээд явбал бүр илүү их боломжтой байдаг. Үүнийг мэдсэн учраас би ч мөн нэг ажилд бүртгүүлээд орчихсон байсан. Гэтэл тэр газрын “review”-ийг үзтэл ажилчдыгаа их шулдаг, зовоодог гэсэн сэтгэгдэл олон байхаар нь өөрийгөө зовоолгүй, зөвхөн суралцъя гэж шийдсэн. Нөгөөтэйгүүр, Япон руу зуучлалаар явж байгаа хүүхдүүдээс зуучлалын компаниуд маш их мөнгө авдаг юм билээ. Уг нь өөрөө хэлний сууриа хичээж байж тавьчихаад, дараа нь өөрөө сургуулиуд руугаа хандвал хамаагүй хямд тусна. Миний хувьд орохыг хүссэн сургууль руугаа “Сайн уу, намайг авах уу” гээд л мэйл бичтэл авчихсан. Тиймээс төлбөрөө явуулаад л болчихсон.

-Та очоод их хямд өртгөөр амьдрах гэж хичээж байгаа харагдсан. Нийтийн байранд амьдарч байсан уу?

-Японд очихоор заавал “К money” буюу байрны эзэнд бэлэг болгон мөнгө өгдөг заншилтай. Тэр нь чамгүй их мөнгө байна. Гэтэл нүүх болгондоо тийм мөнгө өгнө гэхээр их хэцүү. Тиймээс би залууст байр өгдөг зуучлалын компанитай холбогдож “K money” өгдөггүй, дуртай үедээ ороод л, дуртай үедээ гарч болдог, зөвхөн түрээс, цэвэрлэгээний мөнгө өгөөд амьдардаг хямдхан өртөгтэй байр олсон. Яг өөрийн үеийн охидтой, дундаа гал тогоотой нэг том байранд амьдрахад их сонирхолтой, хөгжилтэй байсан шүү. Хүмүүс очихоороо өдөр, шөнөгүй ажиллаад л их хүнд нөхцөлд суралцдаг учраас маш их ядардаг шиг санагдсан. Миний хувьд тэгж амьдрахыг хүсээгүй учраас удаан хугацаанд багшийн ажил хайж байгаад орж байсан.

-Хэр удаан хугацаанд хэдэн төгрөг цуглуулж явсан бэ?

-Бараг долоон сарын цалингаа яг хав дарсан. Зургаан сарын төлбөрөө тэр чигт нь өгөх ёстой байсан болохоор 10 орчим сая төгрөг Япон руу төлбөр болгож урьдчилж явуулсан. Үүнээс гадна очоод амьдрах мөнгө хэрэгтэй байсан болохоор ээж ааваасаа зээлээд явсан. Гэхдээ очоод тун удахгүй эргүүлээд төлчихсөн.

-ЗҮГЭЭР СУУХГҮЙ БАЙХЫГ ХИЧЭЭДЭГ-

-Авч явсан мөнгөө очоод төлөвлөгөөгүйгээр гэнэт ихээр зарцуулснаас болоод хэсэг хугацаанд мөнгөгүй байсан гэсэн. Залуус энэ мэтээр юун дээр алддаг юм бэ?

-Би өмнө нь аялах гэж явахдаа төсөвлөсөн мөнгөө хамаагүй үрснээс болоод их алдсан. Тухайлбал, өндөр үнэтэй байдаг автобусанд хамаагүй дамжиж суугаад л, андуурч эндүүрээд явснаас их мөнгө зарцуулсан. Гэтэл хүүхдүүд гэрээсээ гарахдаа л бүх маршрутаа тодорхой болгоод явдаг юм байна. Бас янз бүрийн хоол амтлах их дуртай учраас ихэвчлэн гэртээ биш гадуур, ресторанд хоол идэж явснаас мөнгө их хурдан дууссан. Үүнийхээ дараа би хоёр долоо хоног орчим мөнгөгүй явж байгаа юм. Үүнээс хойш идэж уух зүйлээ зохицуулж, явах замын маршрутаа тодорхой болгож, зарим тохиолдолд алхаад их тооцоотой болсон. Ер нь хүмүүс шинэ соёлын дунд орохоороо эхлээд юу ч мэдэхгүй тул их мөнгө зарцуулдаг шиг санагдсан. Тиймээс анх очихоосоо эхлээд бүх зүйлээ судлаад нарийн төлөвлөгөөтэй амьдрах хэрэгтэй юм билээ.

-Зургаан сарын хугацаанд бие даагаад амьдраад ирэхэд таны хувьд өөртөө шинээр нээсэн зүйл юу байваа?

-Би “гоё газар амьдарч үзье” гэснээс өөр зорилгогүй явсан ч хувь хүнийхээ хувьд маш их хөгжсөн юм шиг санагдсан. Өмнө нь би ганцаараа амьдарч байсан хэдий ч оюутан байсан болохоор бусдаас туслалцаа аваад болно гэдэг сэтгэхүйтэй байсан. Харин энэ удаа бүх хариуцлагаа өөрөө ухамсарлаад явсан учир өөрөөсөө маш их зүйлийг нээж, амьдралын олон нөхцөл байдлуудад орж үзсэн. Наад зах нь янз бүрийн хүмүүстэй уулзаж, шинэ хүмүүстэй танилцаж байгаа учраас харилцааны хувьд ч түвшин ахиж байгаа юм.

-Та хувь хүнээ хөгжүүлэхийн тулд өдөр тутамд юу хийдэг вэ?

-Зүгээр суухгүй байхыг их хичээдэг. Миний хувьд зөв хүмүүсээр хүрээлүүлэхийг их чухалд тооцдог. Тодорхой хэмжээнд амжилттай яваа найзуудтайгаа их нөхөрлөхийг боддог. Тэдний амжилтаар өөрийгөө цэнэглэж, үлгэр жишээ авдаг. Бас янз бүрийн дамжаанд явж, оёдол эсгүүр, гар урлал гэх мэтээр өөрийгөө хөгжүүлэхийг хичээдэг. Одоогийн байдлаар зааланд хичээллэж, бие бялдраа хөгжүүлж байгаа /инээв. сурв/ Мөн интернэтийн эхлэл гэгддэг REDDIT сайтаас орж бүх мэдээллүүдээ авдаг. Энд тавигдсан мэдээллүүд л бусад газраар тардаг учраас үүнээс л уншдаг.

-Ойрын хугацаанд гадагшаа явах төлөвлөгөө бий юу?

-Монголдоо хийх зүйлсийн төлөвлөгөө байгаа болохоор эндэх зорилгынхоо төлөө явна. Тийм ч учраас гадаад руу явах төлөвлөгөө алга байна. Одоогоор үзье гэж бодсон зүйлээ үзчихсэн шиг мэдрэмж төрөөд байгаа. Урд нь залуу хүн гадагшаа ганцаараа явж, бие дааж амьдарч, амьдралын олон янзын шалгуурыг давж үзэх ёстой гэж боддог байлаа. Одоо хэсэгтээ болчихсон байхаа. Гадаад явах болгонд бүгдийг тэгээс эхэлдэг, тэнд очихоор хэн ч биш болчихсон шиг санагддаг. Монголдоо ирэхээр бүтээсэн байр суурь, гэр бүлийнхэн бүгд байгаа учир эндээ байгаа байр сууриа улам батжуулж, өөрийн гэсэн зүйлтэй болох төлөвлөгөөтэй байна. Харин мөнгөтэй болохоороо аялах тухай бодох байх.

-ХҮМҮҮС ТУУШТАЙ БИШ МӨРТЛӨӨ ХЭЛ СУРАХЫГ ХҮСДЭГ, ГОЛ НЬ ТУУШТАЙ-

-Орчин үеийн залуус олон хэлтэй болох, гадны улс орнуудад суралцах, тэнд бие даан амьдрах, аялах хүсэлтэй байдаг. Та энэ бүхнийг бүгдийг нь л үзчихсэн юм шиг санагдаж байна. Үүнд хүрэхэд хэр хүнд вэ?

-Өөрөө хүсэх юм бол хэцүү биш. Хүсч чадвал түүн рүүгээ тэмүүлж, хөдөлмөрлөж чаддаг. Чи хөдөлмөрлөж чадвал амьдрал хүссэн зүйл рүү чинь хөтөлдөг гэдэгт би итгэдэг. Дуртай дуугаа олоод л түүнийгээ хэсэгхэн хугацаанд өдөр шөнөгүй сонсоход цээжлээд аманд орчихдог шиг хэл сурах ч мөн яг л үүн шиг.

-Ойролцоогоор хэдэн сарын хугацаа зарцуулагдах вэ?

-Хүсч буй зүйлдээ хэр их хугацаа зарцуулж байгаа вэ гэдгээсээ шалтгаална. Сурч дуусна гэсэн ойлголтгүй байхгүй шүү дээ. Тиймээс үргэлжлүүлэн суралцсаар байна. Ерөнхийдөө хэлийг сайн сурахын тулд хоёр жил орчмын хугацаа шаардагддаг, ингэхдээ өдөр бүр алдалгүй хэлээ давтах ёстой. Хүмүүс тууштай биш мөртлөө хурдан хэл сурахыг хүсдэг нь их сонин. Гол нь тууштай байх шүү дээ /инээв. сурв/

-Та хоёр хэлийг нэг зэрэг суралцдаг шүү дээ. Энэ нь хэр зөв бэ?

-Солонгос, Япон хоёр хэл их ойролцоо учраас жаахан толгой эргээд заримдаа хольж ярьчих гээд байдаг талтай. Сая Японд байхдаа Солонгос охинтой танилцаад ярих гэтэл Япон үгтэй холиод жаахан алдсан. Тэгэхээр хоёр хэлийг зэрэг сурах дэмий юм билээ. Тухайлбал, гадаад үг сурлаа гээд тэр нь миний толгой руу шууд л орчих биш тодорхой хугацаанд боловсорч байж миний толгойд сууна. Гэтэл яг тэр үед нь бас нэг өөр хэл ороод ирэхээр жаахан төөрөлдчихдөг шиг санагдсан. Багштайгаа хамт давтвал өөр хэрэг. Сургуулийн хүүхдүүд зөвхөн суралцахад цагаа зарцуулдаг учраас ийм боломжтой байж болох ч хажуугаар нь ажил амьдралаа зохицуулдаг бидний хувьд зэрэгцүүлэн сурах нь дэмий санагдсан.

-Цаг заваа гарган бидэнтэй ярилцсан танд баярлалаа.

-Та бүхэнд ч их баярлалаа.

ГЭРЭЛ ЗУРГИЙГ: Г.БАЗАРРАГЧАА