Хөдөлмөр, нийгмийн хамгааллын сайд С.Чинзориг хүүхдийн мөнгөний асуудлаар мэдээлэл хийлээ. Тэрбээр "2019 оны зургаадугаар сарын 1-нээс эхлээд хүсэлт гаргасан өрхийн хүүхдүүдэд мөнгөн тэтгэмж олгохыг ЗГ-аас шийдвэрлэсэн. Энэ чиглэлийн дагуу ХНХЯ-наас зургаадугаар сардаа багтааж хүсэлт гаргасан хүүхдүүдийн хүүхдийн мөнгийг өгөхөөр ажиллаж байна.

Засгийн газраас 2018 оны тавдугаар сард нийт хүүхдийн 80 хувь буюу 912 мянган хүүхдэд Хүүхдийн мөнгө олгох шийдвэр гаргаж, 2019 оны төсөвт 218 тэрбум төгрөг баталсан. Нэмэлт эх үүсвэрийг Засгийн газар шийдсэн учир зургаадугаар сарын 1-нээс хүүхдийн мөнгийг олгохоор боллоо. Өнгөрсөн жилийн 7, 8 дугаар сард авсан судалгааны дагуу 912 мянган хүүхэд дээр нэмэгдээд 70 мянган хүүхэд хүүхдийн мөнгө авах хүсэлт гаргасан байна. Тиймээс 2019 оны зургаадугаар сараас эхлээд хүсэлт гаргасан хүүхдүүдийн мөнгийг олгоно.

Өнгөрсөн жилийн 7, 8 дугаар сард хүүхдийн мөнгө авах хүсэлтээ илэрхийлж, Хөдөлмөр халамжийн үйлчилгээний байгууллагад хүсэлтээ өгч байсан бол дахиж хүсэлт өгөхгүйгээр хүүхдийн мөнгөө авах эрх нь нээлттэй. Харин хүсэлт нь өрхийн мэдээллийн санд нь орж уу гэдгийг үзээд баталгаажуулах арга хэмжээ авах хэрэгтэй байна. Харин хүсэлт гаргаж амжаагүй байгаа бол өнөөдрөөс эхлээд харьяа аймаг, дүүргийнхээ хөдөлмөр халамж үйлчилгээний байгууллагад хандах боломжтой. Хүүхдийн мөнгийг сар бүрийн 20-нд олгоно." гэв.

Ингээд сэтгүүлчдийн сонирхсон асуултад хариуллаа.

-Хүүхдийн мөнгө өнгөрсөн саруудыг нөхөж олгох уу?

-Хүүхдийн мөнгө нөхөж олгохгүй. Зургаадугаар сарын 1-нээс хойш хүсэлт гаргасан хүүхдүүдэд хүүхдийн мөнгө олгоно.

-Босго онооны тухай яригдаад байна лээ?

-Эхний ээлжийн босго онооны асуудлыг ярина. Учир нь батлагдсан нэмэлт эх үүсвэрээс хүсэлт гаргасан хүүхдүүдийн тоо хэтэрвэл онооны асуудал ярихаас өөр аргагүй. Үлдсэн хүүхдүүдээ жич авч үзье гэж ярьж байна.