Монгол Улсын Ерөнхийлөгч Х.Баттулга өнгөрсөн даваа гаригт дэлхийн шилдэг сургуулиудад тэнцэн суралцахаар болсон сурагч, хүүхдүүдийн төлөөлөлтэй уулзан баяр хүргэсэн билээ. Монгол Улсын Ерөнхийлөгчтэй уулзсан хүүхдүүд нь Харвардын их сургууль, Колумбын их сургууль, Станфордын их сургууль, Массачусеттын технологийн институт зэрэг дэлхийн шилдэг боловсрол олгодог сургуульд тэнцэн суралцах гэж байгаа юм. Жишээ нь, дэлхийн шилдэг их сургуулиудын жагсаалтыг тэргүүлдэг Массачусеттын технологийн институтэд 100 хувийн тэтгэлгээр суралцахаар болсон Хөвсгөл аймгийн Галт сумын сурагч С.Сумьяажав комьпютерын шинжлэх ухааны чиглэлийг сонгон суралцахаар болжээ. Бид түүнтэй уулзаж ярилцсанаа хүргэж байна.

-БОЛОМЖИЙГ БУСДААС ХАЙХ БИШ ӨӨРӨӨ ӨӨРТӨӨ БОЛОМЖ БҮТЭЭ-

-Багаасаа зорилгоо тодорхойлоод, хичээгээд сурвал дотоод битгий хэл гадаадад 100 хувь тэтгэлэгээр суралцаж болдог гэдгийг үеийнхэндээ үлгэрлэж байгаад баяр хүргэе?

-Баярлалаа. Би хөвсгөл аймгийн Галт сумандаа арван жилийн сургуулиа төгсөөд жил болж байна. Энэ нэг жилийн хугацаанд гадагшаа сургуульд суралцах гэж зорьж, шалтгалтдаа бэлдэж байсан. Ингэснийхээ хүчинд Массачусеттын технологийн институтэд 100 хувийн тэтгэлгээр суралцахаар болсон. Үеийнхэндээ хандаж хэлэхэд эртнээс зорилгоо тодорхойлох хэрэгтэй. Тэгээд зорилгынхоо төлөө маш ихээр хичээж зүтгэж, тэмүүлэх хэрэгтэй. Ямар ч хүнд боломж байдаг. Боломжийг бусдаас хайх биш өөрөө өөртөө боломж бүтээх нь хамгийн чухал шүү. Чиний мөрөөдөж байгаа зүйл чиний бодож байгаагаас ойрхон байдаг. Яагаад гэвэл чиний хичээл зүтгэлээс шалтгаалах учраас гэж л хэлмээр байна.

-Мэдээж англи хэлтэй байж гадаадын сургуульд тэтгэлэгээр суралцана шүү дээ. Хэлнээс гадна сургуулийн зүгээс ямар шалгуур тавьсан бэ?

-Мэдээж гадаадад сургуульд суралцахад хэлний оноо тодорхой хэмжээгээр хэрэгтэй. TOEFL-ийн шалгалт өгч байсан маань давуу тал болсон. Түүнээс гадна би олон улсад болон Азид физикийн олимпиадад амжилт гаргаж байсан. Олон улсын тэмцээнд амжилтай оролцож байсан хүүхдүүдээс сонгож авах магадлал өндөр байдаг юм билээ. Олон улсын физикийн олимпиадад хоёр удаа оролцож мөнгө, хүрэл медаль авч байсан. Тиймээс надад хэлнээс гадна давуу тал, боломж олдсон.

-Англи хэл яаж сурсанаа үе тэнгийхэндээ хуваалцахгүй юу?

-Арван жилд англи хэлийг ер нь үздэг байсан. Гэхдээ би англи хэлийг бие дааж сурч эхэлсэн. Бүр 11 настайгаасаа англи хэлийг маш сайн сурах хэрэгтэй юм байна гэсэн ойлголттой болсон. Анх хотод ирэхэд миний үе тэнгийхэн англи хэлэндээ маш сайн байсан учраас шарандаа анх англи ном бариад уншиж эхэлсэн. Анхандаа их хэцүү байсан. Гэхдээ ном унших дуртай болохоороо зовлон гэж бодолгүй өөрийн хобби болгож англи номоо уншдаг байсан. Тэгж л бие дааж сурсан.

-ТЭТГЭЛЭГ БОЛ ХАРИУЦЛАГА, ЗОРИЛГО ШҮҮ ГЭЖ ЗАХИСАН-

-Ер нь л гадагшаа явж суръя гэсэн зорилготой хэлээ сайжруулж эхэлсэн гэж ойлгож болох уу?

-Улаанбаатар хот руу улсын физикийн олимпиадад орох гээд анх ирж байсан. Тэгэхэд олимпиадад бэлтгэж байсан хүүхдүүдийн яриаг сонсож байхад тэдэн дунд гадаадын том сургуульд тэнцсэн, удахгүй сургуульд явна гэсэн хүүхдүүд олон байсан. Тиймээс би ч гэсэн эд нартай адилхан яагаад гадаад явж сурч болохгүй гэж бодож эхэлсэн. Тэр үеэс л зорилгоо болгож хичээж эхэлсэн дээ.

Физикийн олимпиадад оролцохоор хот орж ирээгүй байхдаа би арван жилээ төгсөөд Монголынхоо аль нэг их дээд сургуульд суралцана даа л гэж боддог байсан.

-Гадаадад сурахад мэдээж санхүүгийн асуудлаас эхлээд асуудал их байх .Ар гэрийхэн, аав ээж нь гадагшаа явж сурна гэхэд дэмжсэн үү?

-Маш их дэмждэг. Манай аав физикийн багш. Ээж маань эмийн санч.

-Монгол Улсын Ерөнхийлөгчтэй уулзлаа. Та бүхэнд юу захиж хэлж байна вэ?

-Гадаадын их дээд сургуульд суралцахаар тэнцсэн 20 гаруй хүүхэд өчигдөр Ерөнхийлөгчтэй уулзсан. Ерөнхийлөгчтэй уулзахад бид бүхэнд сургамжтай үг хэлсэн. Бидэнд амжилт хүсээд тэтгэлэг бол хариуцлага, зорилго шүү гэдгийг захисан. Тэгээд улсынхаа нэрийг өндөрт өргөх, эрдэм мэдлэгээрээ эх орныхоо ирээдүйн хөгжилд хувь нэмэр оруулахыг хүссэн.

-Ерөнхийлөгч та нарыг эх орондоо эргэж ирээд эх орныхоо хөгжилд хувь нэмрээ оруулаарай гэж захьсан байна шүү дээ. Захиасыг биелүүлнэ биз дээ?

-Монгол Улс залуучуудыгаа ажиллах боломж нөхцөлөөр хангаад, амьдрах орчин нөхцөлөө сайжруулаад, цалин мөнгөнөөс авахуулаад сэтгэл ханамжтай хэмжээнд хүргэж чадвал олон олон залуус эх орондоо эргэж ирж, хөгжил дэвшилд хувь нэмрээ оруулах байх аа. Намайг төгсөөд ирэх үед цаг сайхан болох байх гэж итгэж байна.

-Чөлөөт цагаараа юу хийх дуртай вэ?

-Рубик шоо эвлүүлэх их дуртай. Ер нь л заваараа ном уншингаа хэлээ сайжруулахыг хичээдэг.