Тулгар Төрийн 2228, Их Монгол Улс байгуулагдсаны 813, Ардын хувьсгалын 98 жилийн ой, Үндэсний их баяр Наадам маргааш албан ёсоор эхэлнэ. Энэ жилийн наадмын нээлтийн үйл ажиллагааг үзэх 6000 тасалбар худалдаанд гарсан. Гэтэл эдгээр тасалбарыг олноор нь дамлан зарж буй үйлдлүүдийг цагдаагийн байгууллага шалгаж байна.

Тодруулбал өчигдөр л гэхэд аав хүү хоёр 170 ширхэг билетийг НЗДТГ-ын гадна зарж байсныг Сүхбаатар дүүргийн цагдаагийн нэгдүгээр хэлтэст саатуулан шалгаж байна. Тус иргэд өмнө нь залилангийн гэмт хэрэгт холбогдож байсан гэх мэдээлэл байна. Мөн наадмын билет зарж буй Дүнжингарав худалдааны төвийн гадна олон тооны тасалбар зарж байсан иргэнийг Баянзүрх дүүргийн цагдаагийн нэгдүгээр хэлтэст шалгаж байгаа юм байна.

НИТХ-ын ажлын албанд ажилладаг иргэн Ж.Энхбат НЗДТГ-ын гадна тасалбар олноор зарах гэж байгаа гэх мэдээллийг анх цагдаагийн байгууллагад өгчээ. Тэрбээр “Наадмын тасалбар авах гэж иргэд гурав дөрвөн хоног оочирлож байна. Нэг хүнд хоёр тасалбар өгнө. Ингэхийн тулд иргэний үнэмлэхтэй, хурууны хээгээр өгнө гэсэн хэрнээ дарга нарт цохолтоор хэдэн зуугаар билет олгож байна. Энэ шагийн билетний цаана НЗДТГ-ын дарга нар л байгаа. Яагаад бүхэл бүтэн төрийн байгууллагын үүдэнд билет зарж байгаад баригдаж байна вэ. Хэлэх муу үг алга. Энэ бол гутамшиг. Улаанбаатар хотыг цахим, аз жаргалтай болгоно гэсэн удирдлагууд эсрэгээрээ авлигын үүр болгож байна.” гэсэн юм.