Тулгар төр байгуулагдсаны 2228, Их Монгол Улс байгуулагдсаны 813, Ардын хувьсгалын 98 жилийн ой, Үндэсний их баяр наадмын Их насны морьд барианд орж ирлээ. Энэ насанд 365 ажнай бүртгүүлснээс 271 нь гарааны зурхай руу хөдөлсөн.

Их насны морьд 25 км буюу хамгийн хол зайд уралдсанаас Завхан аймгийн Тосонцэнгэл сумын уугуул, Монгол Улсын Тод манлай уяач Т.Галбадрахын бор түрүүлж, Завхан аймгийн Завханмандал сумын уугуул, аймгийн алдарт уяач Ц.Мөнххуягийн цавьдар айрагдлаа.

Харин айргийн гуравт Өмнөговь аймгийн Хүрмэн сумын уугуул, Монгол Улсын алдарт уяач Х.Бадамсүрэнгийн хээр,айргийн дөрөвт Баянхонгор аймгийн Бууцагаан сумын уугуул, аймгийн алдарт уяач Н.Баттөмөрийн хар, айргийн тавд Говь-Алтай аймгийн Баян-Уул сумын уугуул, Монгол Улсын тод манлай уяач Д.Ганбаатарын зээрд тус тус хурдаллаа.