Хичээлийн шинэ жил эхлэхэд найман хоног үлдлээ. Энэ хичээлийн жилд цэцэрлэгт орох хүүхдийн тоо өмнөх оноос 15 мянгаар нэмэгдэж, энэ жил 275,800 хүүхэд хүмүүжихээр байгаа талаар БСШУСЯ-наас мэдээлсэн.

Цэцэрлэг жил бүр шинээр баригдаж буй ч хамрагдах хүүхдийн тоотой харьцуулахад хамаагүй цөөн байна. Хичээлийн шинэ жилийн бэлтгэл ажил хэрхэн хангагдсан, цахим бүртгэл хэрхэн явагдах талаар Баянгол дүүргийн 89 дүгээр цэцэрлэгийн эрхлэгч Б.Цолмонхүүтэй ярилцлаа.

-Баянгол дүүргийн 8-р хороо эорэг тойрондоо орон сууц ихтэй учир хүүхэд олонтой ачаалал ихтэй байдаг байх?

-Тиймээ, манайх орон сууцны хорооллоос гадна хүн ам ихтэй болохоор цэцэрлэгт хамрагдах хүүхдийн тоо их байдаг. Гэсэн хэдий ч бид хүүхэд бүрийг сургуулийн өмнөх боловсрол олгохын төлөө боломж бүхнийг ашиглаж байна.

-Сугалаа гэж нэг хэсэг ярьдаг байсан. Одоо цахим бүртгэл, цахим сонгон шалгаруулалт гэж нэрлэдэг болсон юм байна. Эцэг эхчүүд таагүй хандах нь бий. Бас шударга бус болдог гэх юм. Танайх бэлтгэл хэр хангагдсан, эргэлзэх зүйлгүй цахим сонгон шалгаруулалтаа явуулж чаддаг уу?

-Цэцэрлэгийн хүрэлцээ тааруугаас үүдэн цахим сонгон шалгаруулалтаар хүүхдээ элсүүлдэг болоод гурван жил боллоо. Эхэндээ хүмүүс сайн ойлгохгүй тийм яриа гаргадаг байсан ч одоо өөр болсон. Цэцэрлэгийн зүгээс

https://tsetserleg.ulaanbaatar.mn/ хаягт цахимаар өөрийн харьяалал бүхий цэцэрлэгт бүртгүүлсэн хүүхдүүдээс шалгаруулалт эхлэхгэсэн ганц товчийг л дарах үүрэгтэй. Системээр хүний оролцоогүй сонгодог учир маргах хүн байдаггүй.Өчигдөр цахим бүртгэл дуусаад өнөөдөр сонгон шалгаруулалт болно. Манайх бэлтгэл ажлаа хангасан эцэг эхчүүдээ хүлээж байна.

-Энэ жил хэдэн хоёр настнуудыг хүлээн авах вэ. Танай цэцэрлэг орчин сайтай юм. Хэдэн багш ажилтантай вэ?

-Баярлалаа. Цэцэрлэгийн орчин эрүүл, аюулгүй байхаас гадна хүүхдэд таалагдах ёстой . Хүүхэд очих юмсан гэсэн сонирхлыг нь төрүүлэх хэмжээний байх ёстой. Манайх энэ жил Боловсролын тэргүүний 10 багш, аргазүйч багш нар гээд чадварлаг хамт олонтой хичээлийн шинэ жилээ угтах гэж байна.

-Та бүхний ажилд амжилт хүсье.