УИХ-ын гишүүн, Эдийн засгийн хөгжлийн сайд асан, “Фортуна” хэмээх Н.Батбаяр нарт холбогдох хэрэг хөөн хэлэлцэх хугацаа дууссан үндэслэлээр хэрэгсэхгүй болсон талаар өмнө мэдээлсэн билээ. Тодруулбал, УИХ-ын гишүүн, Эдийн засгийн хөгжлийн сайд асан Н.Батбаярыг эрх мэдлээ урвуулан, Хөгжлийн банкнаас санхүүжүүлж, Завхан аймгийн нутаг, Халзанбүргэдтэй, Солонготын даваа чиглэлд тавих авто замын төсвийг хэлэлцүүлэх явцад Б.Гарамгайбаатарын хувь эзэмшдэг байсан “Монроуд” ХХК-д хууль бусаар давуу байдал олгон, улсын төсөвт хоёр тэрбум 35 сая төгрөгийн хохирол учруулсан хэмээн буруутгаж байсан.

Авилгатай тэмцэх газар аравдугаар сарын 11-нд уг хэрэгтэй холбоотой мэдээлэл хийхдээ "Уг асуудалд манайхаас шүүхэд шилжүүлэх саналтай явсан. Хөөн хэлэлцэх хугацаа дууссан үндэслэлээр хэрэгсэхгүй болсон гэж дуулсан” гэжээ. Эл асуудалтай холбогдуулан зарим гишүүнээс тодрууллаа.

-Хөөн хэлэлцэх хугацаанаас болоод төрөөс асар их мөнгө идсэн хүмүүсийн хэргийг хэрэгсэхгүй болгож байна уу. Тухайлбал, УИХ-ын гишүүн Н.Батбаяр нарт холбогдох хэрэг хөөн хэлэлцэх хугацаа дууссан үндэслэлээр хэрэгсэхгүй болсон гэсэн?

УИХ-ын гишүүн С. Эрдэнэ: “2017 онд Эрүүгийн хуулинд эрх баригчид хэд хэдэн удаа ноцтой өөрчлөлтүүдийг оруулсан юм байна лээ. Жишээлбэл, ажлын байран дахь бэлгийн дарамтыг гэмт хэрэг биш болгож, Зөрчлийн хуулинд ч байхгүй болгосон. Хөөн хэлэлцэх хугацааг байхгүй болгоод хаячихсан. Өнөөдөр хэд хэдэн эрүүгийн гэмт хэргийн шинжтэй үйлдлийг Зөрчлийн хууль руу оруулсан. Энэ мэтчилэн эрх баригчид өөрт нь халтай гэсэн заалтуудыг Эрүүгийн хуулиас авсан. Ний нуугүй хэлэхэд миний авсан мэдээллээр 480 гаруй хүн хөөн хэлэлцэх хугацааны асуудлаар гэмт хэрэг нь хэрэгсэхгүй болж байгаа юм байна лээ. 480 гаруй хүнийг бүгдийг нь зарлах хэрэгтэй. Ганцхан хүнийг цохож, зарладаг улстөржсөн ийм үйлдлээ хуулийн байгууллагууд болих хэрэгтэй.

Төр гэмт хэрэгтнийг хаацайлах бамбай болох уу?

Аль намын хэн байна хамаагүй. Монгол Улсын иргэн юм бол хуулийн өмнө тэгш эрхтэй учраас үүрэг, хариуцлагаа хүлээх ёстой. Тэрийг ялгаварлаад эрх баригчдын үйлдлийг хаацайлаад, жирийн иргэдийн үйлдлийг дөвийлгөж, нэр устай нь зарлаж байдгаа болих хэрэгтэй.” гэсэн бол

УИХ дахь МАН-ын бүлгийн дарга Д.Тогтохсүрэн: “Ийм нэг муухай юм бий болчихоод байгаа. Эрүүгийн хууль, Эрүүгийн хэрэг хянан шийдвэрлэх тухай хууль дээр хөөн хэлэлцэх хугацаатай холбоотой юм орсон. Хууль зүйн байнгын хороо энийг засах гээд хуулийн төсөл санаачлаад анхны хэлэлцүүлэг хийгдчихсэн. Үндсэн хуулийн дараа хоёр дахь хэлэлцүүлэг орно. Тиймээс энийг хурдан батлах хэрэгтэй гэж бодож байна.

Хууль зүйн байнгын хорооны ажлын хэсэг эргэж үйлчлэхээр ярьж байгаа юм байна лээ. Тэр нь хууль зүйд хэр нийцдэг юм мэдэхгүй” гэв.