-Долоодугаар сарын 1-ний хар өдөр давтагдана хэмээн ёрлож, “оршуулгын пайлуур” чулууг нь эртнээс бэлдээд байна уу, эрх баригчид аа?

МАН-ын Удирдах зөвлөл уржигдар хуралдаж, томсгосон 26 тойрогт 76 хүн өрсөлдүүлж УИХ-ын 2020 оны сонгуулийг явуулах нь зүйтэй гэсэн шийдэлд хүрсэн. Энэ тухай сүүлийн хэд хоног ярьж байгаа. Том тойргийн тогтолцоо асар их мөнгөний сонгууль болдог. 2008 оны сонгуульд зарцуулсан мөнгөө олж авахын тулд Оюутолгойн гэрээг байгуулсан гэх яриа ч үүний баталгаа болох биз. 2008 онд УИХ-ын сонгуулийг яг энэ тогтолцоо буюу томсгосон тойрог можаритори системээр явуулахад Улаанбаатар тэр чигтээ цэнхэртэж, Ардчилсан намынхан гарч ирж байсныг Ардын намын удирдлагууд идсэн уусантайгаа холиод жамирчихсан бололтой. Улаанбаатарын томсгосон тойрог ардчилагчдад тун ээлтэй байдаг. Чухамдаа өөрсдөдөө халтай, өрөөлд ээлтэй сонгуулийн тогтолцоог Ардын намын удирдлагууд сонголоо гэж улстөр судлаач, сонирхогчид жиргэж эхэлсэн нь оргүй ч үг биш.

Сонгуулийг ямар системээр явуулах тухай хуралддаг өдрийн өглөөардчиллынхан Чингисийн хэмээдэг, Ардын намынхан жанжин Сүхбаатарын гэж талцан булаалддагтөв талбайн баруун, зүүн хэсэгт дөрвөлжин хэлбэртэй, боржин чулуунуудыг байршуулсан. Цахим орчинд Танхай эмээ гэж нэршсэн нөхөр мөнөөх чулуудыг ЖДҮ-чдийн оршуулгын пайлуур болгож фотошопдсон нь олны анхаарлыг татсан. Чухам ямар байгууллага, ямар зорилгоор, хэдий хэр төсвөөр ийм зүйл хийдэг байна гэж гайхаж байтал хэргийн эзэн, хэнгэргийн дохиурууд өөрсдөө тодроод ирэв.Төрийн тусгай хамгаалалтын газрын дарга Алтаншагай, Улаанбаатар хотын Засаг дарга бөгөөд Нийслэлийн захирагч С.Амарсайхан нар үүр шөнийн заагаар өөрөө тодорсон чулуудын тухай тааврын хариуг өглөө.ТТХГ-аас боржин чулуунуудыг байршуулсан бөгөөд, 100 гаруй сая төгрөг зарцуулсан гэдгээ нуусангүй. Нийт 34 ширхэг чулуу байршуулаад байгаа бөгөөд нэг бүрийн төсөв гурван сая гаруй төгрөг болжээ. Үгүй мөн ч илүүдээ гарсан төсөв хөрөнгө шүү.

Төрийн тусгай хамгаалалтын газрын дарга Алтаншагай “Дэлхийн олон оронд Төрийн ордныхоо ойролцоо дөрвөлжин чулуу байршуулдаг. Төв талбай дээр олон нийтийн арга хэмжээ ихээр зохион байгуулагддаг. Иймээс аюулгүй байдлыг хангах үүднээс эдгээр боржин чулуунуудыг байршуулсан бөгөөд энэ ажил 2018 оноос яригдсаар өнөө жил хэрэгжлээ. Согтуугаар тээврийн хэрэгсэл жолоодож төв талбай руу нэвтэрсэн зэрэг хэрэг гарч байсан. Үүнийг хийхдээ олон улсын стандартыг барьсан. Цэвэр монгол чулуу ашиглаж бүтээсэн. Том нь 300 гаруй килограммын масстай” гэж байна.

Нийслэлийн захирагч С.Амарсайхан болохоор “Нийслэлээс төсөв хөрөнгийг нь гаргасан ч загвар дизайныг нь сайжруулах хэрэгтэй. Төрийн тусгай хамгаалалтын газар хийсэн учраас хариуцаад өөрчил. Гадны улсуудад ийм байдаг гээд дөрвөлжин чулуу тавьж болохгүй” гэж заавардлаа.

Талбай дээр тавьсан энэ чулуунуудхүмүүст цаанаа л нэг ёозгүй сэтгэгдэл төрүүлж эхлээд байгаа юм даа. Ядаж байхад сонгуулийн том 26 тогтолцоог тохирсон өдөр “шарилын” чулуудыг талбай дээр авчирч байршуулдаг нь ч ямар учиртай юм. Төрийн тусгай хамгаалалтын газрын даргынх нь ярьж байгаа нь ч шар үс босмоор зэвүүн. “Төв талбай дээр олон нийтийн арга хэмжээ ихээр зохион байгуулагддаг. Иймээс аюулгүй байдлыг хангах үүднээс эдгээр боржин чулуунуудыг байршуулсан”. Энэ ер нь юу гэсэн үг вэ? Тэгээд Алтаншагайн амаар төв талбайдаа олон нийтийн арга хэмжээ зохион байгуулахгүй хэрэг үү? Сүхбаатарын ч байна уу, Чингисийн ч байна уу энэ талбай Амарсайханы ч, Алтаншагайн ч мэдлийн газар биш. Ард түмэн эрх дураараа алхах эрх чөлөөний голт зүрх. Тэгэхэд юу ярих гэж юу ярина вэ. Хэнээс хэний аюулгүй байдлыг хангах үүднээс эдгээр боржин чулуунуудыг байршуулав?

Том 26-гаар сонгууль явуулсан 2008 онд Ардын намыг сонгуулийн үр дүнг булхайцуулж, өгсөн саналыг нь хулгайллаа гэж эсэргүүцсэн ард түмэн энэ л талбайдаа цуглаж үзэл бодлоо илэрхийлэн, эцэст нь бухимдлаа намжаахын тулд МАН-ын байрыг галдан шатааж, Төрийн ордон руу ч халдахыг завдсан. Төр онцгой байдал зарлаж, тавын таван эрдэнэт хүний амь нас хохирсны бурууг өнөө ч Монголын ард түмэн мартаагүй байгаа. Монголын ард түмний сэтгэлийн шархыг сэдрээж, хэний эсрэг байлдах гэж ийм чулуун хашлага бэлдэв гэдэгт Төрийн тусгай хамгаалалтын газрын дарга Алтаншагай болон Нийслэлийн Засаг дарга Амарсайхан нар хариулах ёстой. Монгол Ардын нам их мөнгөний сонгуулийн ялалтыг ямар ч аргаар хамаагүй булааж авах гэж ард түмний замд хориг саад болсон чулуун хашлагыг олны нүднээс нууцлан үүр шөнийн заагаар авчирч тавилаа гэж ойлгож болох биш үү?

Хэрвээ сонгууль будлиантаж, ард олон жагсаж гэмээнэ талбай руу машин техник оруулахгүй гэж ийм саад байгуулж байгаа хэрэг үү гээд үнэхээр олон асуултыг эрх баригчдаас асуумаар байна. Түүнээс биш бүхэл бүтэн сургууль цэцэрлэг барьчих мөнгөөр ийм хориглолтын чулуу авчрах ямар хэрэг байв аа? 2020 оны УИХ-ын сонгуулийн дараа долоодугаар сарын 1-ний хар өдөр давтагдана гэж та бүхэн ёрлож, “оршуулгын пайлуур” чулууг нь эртнээс бэлдээд байна уу?