ЗТХЯ-ны Авто замын бодлогын хэрэгжилтийг зохицуулах газрын Замын ашиглалт, засварын хэлтсийн дарга Х.Оргил-Эрдэнийг өчигдөр их хэмжээний авлига авах гэж байхад нь Авлигатай тэмцэх газраас баривчилсан байна. Түүнийг Улаанбаатар-Дархан чиглэлийн автозамтай холбоотойгоор БНХАУ-ын компаниас авлига авах гэж байхад нь газар дээр нь баривчилсан гэх бөгөөд хураагдсан мөнгөн дүнг нь одоогоор тогтоогоогүй байна. Он солилцохын өмнөхөн ийм мэдээ цацагдаж, олны дургүйцлийг хүргэлээ. Яагаад гэхээр “Улаанбаатар-Дархан” чиглэлийн 204.11 км хатуу хучилттай авто замын их засвар, шинэчлэлтийн ажлыг өнгөрсөн долдугаар сараас эхэлсэн. Арваннэгдүгээр сар гэхэд зам засварын ажлыг дуусгана гэж холбогдох албан тушаалтнууд удаа дараа хэлж байсан ч ашиглалтад ороогүй юм. Энэ хугацаанд Дарханы зам жинхэнэ утгаараа там болж, иргэдийн амь насанд заналхийлж эхэлсэн нөхцөл байдал үүссэн. Үзэгдэх орчингүй битүү шороон дундуур хурдлах машинууд өөр хоорондоо мөргөлдөж, иргэд амь нас, эрүүл мэнд, эд хөрөнгөөрөө хохирч өдийг хүрлээ. Харин одоо учир нь тайлагдаж, учиг нь хөвөрч эхлэв. Дарханы зам там болсон шалтгаан нь ердөө л манай авилгач түшмэд гүйцэтгэгч хятадуудтай авилгын хэмжээгээ тохирч чадалгүй ажил саатуулснаас эхэлсэн юм байна.

Гэтэл өнгөрөгч арваннэгдүгээр сарын 19-ний өдрийн Засгийн газрын хуралдаанаар Улаанбаатар-Дархан чиглэлийн замын төсөлд 137 сая ам.долларын нэн хөнгөлөлттэй зээлийг 18 жилийн хугацаатай олгохоор болсон байдаг. Үнэндээ Дарханы зам баригдахгүй, замын ажил яст мэлхийн хурдаар явах аргагүй юм байна. Замынх нь мөнгийг харъяа яамныхан нь идчихэж. Баригдсан энэ хэлтсийн дарга бол зүгээр л жараахай. Түүний ард, хөшигний цаана жинхэнэ акулууд сууж байгаа нь тодорхой. Хөөрхий Замын ашиглалт, засварын хэлтсийн дарга Х.Оргил-Эрдэнийгээ дэгээнийхээ үзүүрт өгөөш болгож тавьчихаад нумаа нуучихсан хэрэг. Тэгэхээр энэ асуудлыг ултай, суурьтай үзэж, гүнд орж шалгах хэрэгтэй. Тэгэхийн тулд салбар хариуцсан сайдаас нь эхэл. Хатигийг толгойноос нь шахдаггүй. Угаас нь шахаж идээ бээрийг нь гаргадаг шиг язгуурыг нь олох нь хамгийн чухал. Авилгын хэмжээ нь хэдэн сая ам.доллароор яригдаж байгаа.

Өнөөдрийн байдлаар Дарханы замаас болж машинаа эвдээд хохирлоо төлүүлсэн нэг ч жолооч Монголд байхгүй. Мөрий тавьсан ч бэлэн байна. Зам засвар эхэлсэн цагаас хойш энэ чиглэлд явж байгаа жолооч бүр үнэхээр хэцүү байна гэдгийг ам нэгдэн хэлж байгаа. Энэ тухай Дархан улаанбаатар чиглэлд явдаг дурын машины жолоочоос асууж болно. Машинаа эвдээд дуусч гэж бодоход албан тушаалтнууд нь авилга авахын тулд ард түмнийхээ амь насаар дэнчин тавьж байгааг юу гэж ойлгох вэ.

Урьд нь замын тендэрт шалгарсан компаниуд тавьж байгаа замынхаа зузаанаас нь, өргөнөөс нь хасч, мөнгө “хусдаг” байсан бол одоо замыг тэр чигээр нь залгидаг болжээ. Бүүр цагаандаа гарч.