Нэн ховор амьтны жагсаалтад орсон хүрэн баавгайн эд эрхтнийг тээвэрлэж явсан этгээдийг энэ сарын 9-нд саатуулжээ. Мөрдөн шалгах ажиллагаа үргэлжилж байна. Уг хэргийг Баянзүрх дүүргийн 16 дугаар хорооны нутаг дэвсгэрт тус дүүргийн цагдаагийн эргүүлийн хяналт шалгалтаар илрүүлжээ. Тодруулбал, иргэн А гэгч эрэгтэй хууль бус ангийн түүхий эд болох хүрэн баавгайн 8 ширхэг савар болон бусад эд эрхтнийг тээвэрлэж явсан байна.

Баянзүрх дүүргийн цагдаагийн 1-р хэлтсийн ахлах мөрдөгч, цагдаагийн ахмад Б.Эрдэнэдалай “Хүрэн баавгайг 2012 онд ховор амьтны жагсаалтад оруулсан байдаг. Монгол Улсын Эрүүгийн хуулийн 24.5 дугаар зүйлийн 1-т зааснаар ховор амьтныг зөвшөөрөлгүй агнасан, барьсан, худалдсан, тээвэрлэсэн тохиолдолд 5 сая 400 мянган төгрөгөөс 27 сая төгрөгөөр торгох эсвэл 1-5 жил хүртэлх хугацаагаар хорих ял шийтгэхээр заасан байдаг” гэв.

Сүүлийн жилүүдэд хүрэн баавгайг худалдаалах зорилгоор доньд, сарвууг авахын тулд хууль бусаар агнах явдал ихэсжээ. Өнөөдөр хүчин төгөлдөр үйлчилж байгаа хуулийн дагуу нэн ховор болон ховор амьтныг агнахаас гадна эд эрхтнийг зөөсөн, тээвэрлэсэн, бусдад худалдсан тохиолдолд хорих ялаар шийтгэх ёстой. Мөн Монгол Улсын Засгийн газрын тогтоолоор н, амьтны экологи-эдийн засгийн үнэлгээг тогтоосон байдаг. Үүгээр бол хүрэн баавгайн эр буюу шармаахайг 6.5 сая, эмэгчин буюу эвшийг 7.5 сая төгрөгөөр үнэлдэг. Хулгайн анчны гэм буруутай нь шүүхээр тогтоогдвол дээрх үнэлгээг 2-3 дахин нугалж төлүүлэх юм.