Улаанбаатар-Дархан чиглэлийн авто-замыг ашиглалтад оруулах төлөвлөсөн хугацаа нь өнгөрсөн оны арваннэгдүгээр сар боловч хугацаандаа амжихгүй он дамнан хойшлогдсон. Замын ажил болон санхүүжилтийн талаар Зам, тээврийн хөгжлийн яамны Төрийн нарийн бичгийн дарга С.Батболдоос зарим зүйлийг тодрууллаа.

-Дарханы замын ажил юу болж байгаа вэ. Азийн хөгжлийн банкны санхүүжилт зогссон гэж байсан. Энэ үнэн үү. Санхүүжилт нь яаж явагдахаар байгаа вэ?

-Азийн хөгжлийн банкны санхүүжилт зогссон зүйл байхгүй. Олон улсын байгууллага мөнгөө өгөөд явж байгаа. Бид компаниудын гүйцэтгэлийн хувиар санхүүжилтыг цаг хугацаанд нь өгөөд явж байна. Мөнгө санхүүгийн асуудал дээр ямар нэгэн саатсан зүйл байхгүй.

-Замын ажил хэзээнээс хийгдэх вэ. Хэзээ ашиглалтад орох бол?

-Өнгөрсөн жилийн гэрээгээр 2020 оны зургадугаар сарын 20-нд замын ажлыг дуусгах гэрээтэй. Одоогоор аж ахуйн нэгжүүд гэрээ сунгах хүсэлт ирээгүй байна. Засгийн газраас өгсөн үүрэг даалгаварын дагуу гуравдугаар сарын сүүл гэхэд замын ажлуудыг цаг агаарын нөхцөл байдалтай уялдуулж эхлүүлнэ. Саяхан Европын сэргээн босголтын банктай тусгайлсан зээлийн хэлэлцээрт гарын үсэг зурсан. Одоо хийгдэж байгаа зам болон шинээр хийгдэх замын санхүүжилт шийдэгдсэн.

-Шинэ замын ажил хэзээ эхлэх вэ?

-Санхүүжилт саяхан шийдэгдсэн. Одоо сонгон шалгаруулалт явагдаж байна. Энэ хавар эхлүүлэхээр төлөвлөж байгаа.

-Замын ажил зургадугаар сард багтаж дуусах уу?

-Ер нь их шахаж байгаа. Дарханы чиглэлийн замын эхний хучилтыг зургадугаар сарын 20-ны өдөр гэхэд дуусгахаар төлөвлөж байгаа. Цаашид зам хучилтаас гадна бусад инженерийн ажлууд хийгдэнэ. Замын ажлыг гүйцэтгэж байгаа аж ахуйн нэгжүүд“ хоёр зам зэрэгцэж явах учраас зам дуусгахад төвөгтэй байна” гэдэг асуудлыг тавьж байгаа. Зам тавихаас гадна тэмдэг, тэмдэглэгээ тавьж явна. Хоёр зам нийлж явах учраас асуудал үүсэх нь гэдэг саналыг аж ахуйн нэгжүүд тавьж байгаа. Азийн хөгжлийн банк өөрөө төслийн нэгжтэй. Уг төслийн нэгж нь замын ажлыг зохион байгуулж ажиллаж байгаа. Саяхан Европын сэргээн босголт, хөгжлийн банк төслийн зохицуулагч шалгаруулж авсан. Одоо гардаж хийх нэгжүүд ажилдаа орчихсон. Төлөвлөгөө гаргаад бид нарт танилцуулаад явж байгаа.

-Дарханы замын асуудлаар н.Оргил-Эрдэнэ мэргэжилтэнтэй холбоотой зүйл гарсан. Үүнээс болж Дарханы замын санхүүжилт саатсан зүйл байгаа юу?

-Энэ асуудалтай холбоотойгоор санхүүжилт саатсан зүйл байхгүй.

-Шинэ нисэх буудлын ажил ямар шатандаа явагдаж байгаа вэ?

-Шинэ нисэх буудлын ажил төлөвлөсний дагуу явагдаж байгаа. Япон улстай концессын гэрээ байгуулсан. Концессын гэрээний дагуу Японы талын хийх ажил болон Монголын тал хийх ажлууд байгаа. Манай талаас хийх ажлуудаас нэмэлт цахилгааны эх үүсвэртэй холбоотой зүйл бүрэн шийдэгдээгүй байна. Бусад ажлууд хийгдээд явж байгаа.

-Хэзээ нээхээр төлөвлөж байна вэ?

-Шинэ нисэх буудлыг зургадугаар сард нээхээр төлөвлөж байна. Хэлэлцээр нь ийм байгаа.

-Баярлалаа