УИХ-ын гишүүн Н.Оюундарь: Тухайн үед нөхцөл байдал ямар байсныг мэдэхгүй юм. Нэгэнтээ л Төрийн албан хаагчийн ёс зүйн дүрэм, хэм хэмжээ зааж, түүнийг хуульчилсан бол хуулиа л баримтлах ёстой. УИХ-ын гишүүд байна уу, аймгийн дарга байна уу хамаагүй төрөөс цалин авч байгаа хэнбугайд ч энэ дүрэм хамаатай болов уу.

Казиногийн хуулийг батлах хэрэгтэй. Энэ хууль батлагдана гэдэг нь Монголд ямар нэгэн хэлбэрээр хөрөнгө оруулалт орно. Зөвхөн мөрийтэй тоглоом биш бүх л бүтэн салбар байж байгаа. Үүнийг Хууль зүйн байнгын хороогоор хэлэлцсэн. Монгол хүнийг оруулах эсэх асуудлыг анхнаасаа өргөн барьсан хуульдаа хориглосон байгаа.

УИХ-ын гишүүн С.Чинзориг: Нэгдүгээрт, УИХ-ын гишүүд өөрсдөө казиногийн тухай хуулийг их хурлаар хэлэлцэж магадгүй. Одоогоор хуулийн төсөл өргөн баригдсан байгаа шүү дээ.Өөрсдийнх нь ярьж байгаагаар бол газар дээр нь очсоных сонирхсон юм болов уу гэж ойлгосон. Хоёрдугаарт, Миний авсан мэдээллээр Австралийн казино чинь нээлттэй юм байна лээ. Ямар нэгэн паспорт шалгадаггүй. Бусад орны зочид төлөөлөгчдөд үзүүлж, таниулдаг. Нөгөө талаасаа жуулчдыг өргөн хүрээгээр оруулж, танилцуулдаг. Ер нь казино гэдэг чинь манайд хуульчлагдаагүй байгаа учраас манайхан шүүмжлээд болгоомжлоод байгаа болохоос биш энэ нь өөрөө аялал жуулчлалыг хөгжүүлж байгаа томоохон бодлого. Төрийн албан хаагчдын ёс зүйн дүрмийг Засгийн газар баталсан. Үүгээр төрийн захиргааны жинхэнэ албан хаагчид, төрийн үйлчилгээний албан хаагчдын ёс зүйтэй холбоотой харилцааг зохицуулах дүрэм байгаа юм. УИХ-ын гишүүн гэдэг бол улс төрийн албан тушаалтнууд. Улс төрийн албан тушаалтнууд гэдэг бол нийт ард түмнээсээ сонгогдох мандат авсан албан тушаалтнууд. Засгийн газраас баталсан ёс зүйн дүрмээр хариуцлага тооцох боломж байхгүй. Энэ нь УИХ-ын гишүүдийн ёс зүйн асуудлаар жич яригдах ёстой. Нөгөө талаасаа эдгээр гишүүд тоглоогүй сонирхсон гэж байгаа. Би ч тэр зургийг харсан. Зүгээр сонирхоод зогсож байна лээ. Тийшээ орж, сонирхсонтой холбогдуулаад ёс зүйн хариуцлага тооцно гэсэн хуулийн зохицуулалт байхгүй.

УИХ-ын гишүүн О.Батнасан: Би хүний өмнөөс ярьж, ёс зүйгүй үйлдэл гаргахгүй

Ерөнхийлөгчийн Тамгын газрын дарга З.Энхболд: Өөрийн үзэл бодлыг ингэж илэрхийлэв. “Хэдэн сарын өмнө төрийн албан хаагчийн ёс зүйн дүрмэнд өөрчлөлт оруулж, казино тоглосон бол халдаг болоод хэд хэдэн төрийн албан хаагчийг халсан шүү дээ. Тэр жишгийн дагуу арга хэмжээ авах байлгүй. УИХ-ын гишүүн ч гэсэн төрийн албан хаагч юм чинь. Төрийн албан хаагчийн ёс зүйн дүрэм бол Төрийн албаны тухай хуульд нийцэж гарч байгаа. Өмнө нь казино тоглосон хэргээр хоёр гурван арга хэмжээ авагдчихсан шүү дээ. Тэгэхээр УИХ-ын гишүүн ямар нэгэн онцгой төрийн албан хаагч биш. Хэрэв халагддаг бол ялгаагүй л халагдах ёстой. МАН-ын УИХ, Засгийн газар нь тэр дүрмээ хэрэгжүүлээд явж чадах нь уу, үгүй юу гэдгийг нь харъя.

УИХ-ын гишүүн Х.Нямбаатар: Төрийн албан хаагчийн ёс зүйн дүрэм гэж батлагдсан. Түүн дээр хамаарах хүрээ нь улс төрийн албан тушаалтнуудад хамаарч байгаа эсэхийг л харах байх. Түүнээс яг хуулиар казинотой холбоотой эрх зүйн зохицуулалтаа бид нар баталж чадаагүй байгаа. Казиногийн тухай хуулийг ажлын хэсэг юу гэж ярьсан бэ гэхээр Монгол Улсад байгуулагдах казинод Монгол иргэд оруулахгүй байя гэж. Сингапур мэтийн орнуудад донтолтын цаг гэж хязгаартай байдаг. Гэхдээ манайд тэр нь одоогоор нийцэхгүй байх гэдэг асуудлыг ярьсан. Өчигдөр би Д.Тогтохсүрэн гишүүний хэвлэлд өгсөн ярилцлагыг сонссон. Өөрсдөө бол бид тоглоогүй гэдэг тайлбарыг хийсэн шүү дээ.