УИХ-аар Аймаг, нийслэл, сум, дүүргийн ИТХ-ын сонгуулийн тухай хуулийн төслийг хэлэлцлээ. УИХ-ын гишүүн М.Оюунчимэг “Энэ хуулийн гол зорилт бол сум, дүүрэг, хороодод улстөржилтийг зогсоох, үүнд цэг тавих гээд ярьж байна. Бид сайхан хууль дүрэм гаргаад байдаг. Бодит амьдрал дээр тэр нь хэрэгжихгүй гажуудал үүсэх явдал маш их байгаа. Өнөөдөр хороо, дүүрэг, сумдад улстөржилт үнэхээр их байгаа. Томилогдсон хороон дарга юм уу, Иргэдийн нийтийн хурлын дарга нь ч юм уу, дүүрэг нь ч юм уу элдэв халамж, хуваарилалт дээр ч гэсэн Ардын намын хүн, Ардчилсан намын хүн гэж ялгавартай хандах, энэ нь өөрөө эргэж улстөржилт бий болох юм үүсээд байдаг. Энэний гол алдаа нь юу байна гэхээр олон сонгогдсон ч гэдэг юм уу, УИХ-ын гишүүн юм уу, дүүргийн дарга нар өөрийнхөө гарын хүмүүсийг сум, дүүрэг, хороодод даргаар томилчихдог. Нөгөө хүмүүс нь тэнд байгаа иргэдэд биш дарга нартаа үйлчилдэг. Үүнээс болж сум, хороодод иргэд их бухимддаг. Хороо, Иргэдийн нийтийн хурлын дарга нараа санхүүжилтээрээ барьчихдаг. Хороо олигтой санхүүжилт байхгүй учраас дүүргийнхээ Засаг даргын царайг хараад өгсөн нэг жаахан дөрөв таван сая төгрөг нь өөр замаар явчихдаг. Орон нутгийн хөгжлийн мөнгө нь орон нутагт байгаа иргэддээ хүрч үйлчилдэггүй. Тэндээс сонгогдсон УИХ-ын гишүүн юм уу, ИТХ-ын төлөөлөгч мөнгө хөөцөлдөөд төсөвт суулгахаар ажил явдаг зарчим үйлчилж байна шүү. Гудманд байгаа хогийг хараад “УИХ-ын гишүүнд хэлээд ачуулчих уу” гэж бараг тийм хандлага өнөөдөр болчихоод байгаа байхгүй юу. Тийм учраас зөвхөн хугацаанд нь өөрчлөлт оруулах энэ хуулийн төслийг өргөн бариагүй гэж харж байгаа. Улстөржилтөд цэг тавих гэсэн үг хуулийн төсөлд байгаа. Харин яаж улстөржилтөд цэг тавих вэ гэдэг л хамгийн амин сүнс нь болоод байна” гэв.