Дархан-Улаанбаатар чиглэлийн зам там болоод хагас жил боллоо. 224 км энэ замыг суудлын тэрэг дунджаар гурван цаг орчим туулдаг байсан. Харин одоо бол хаа сайгүй үүссэн нүх бүрийг тойрч огцом тоормослосоор жолооч ч зүдэрч тав зургаан цаг явж байна. Харин хот хоорондын зорчигч тээврийн том автобус 6-8 цаг явж байгаа. Зургаагаас найман цаг сэгсчүүлсээр арайхийж зорьсон газартаа ирэхэд ядарч зүдрэх гэдэг тоймгүй. Хол замд ийм удаан, байнга шахам займчуулж явахад хүүхэд багачууд уйлагнаж, хөгшчүүдийн даралт ихсэн, залуучуудын тэвчээр барагдаж байна. Тэр дундаа Төв аймгийн Баянчандмань сумаас Баруунхараа, Хонгор сум хүртэл зам үнэхээр там. Жижиг тэрэгтэй явж байгаа жолооч нар дугуйгаа хоёроос гурав хагалж үйлээ үзэж, үсээ үгтээдэг. Заримынх нь бүх дугуй хагараад явах боломжгүй болчихсон зам дээр гар өргөн хэн нэгнээс тусламж гуйгаад зогсож байх нь хэчнээн гунигтай гээч. Энэ л тамын новшийн замаас болж амьдралаа залгуулах гээд замд гарсан жолооч нарын машины дотоод эд анги авах юмгүй болж, эд хөрөнгөөрөө хохирсоор л байгаа нь харамсмаар.

ДАРХАНЫ ЗАМД ЯВАХДАА ХОХИРСОН ИРГЭД НЭГДЭЖ, НӨХӨН ТӨЛБӨР ГАРГУУЛАХААР ТЭМЦЭНЭ

Дарханы замд хохирогчдод нөхөн төлбөр гаргуулах асуудлаар иргэн А.Цэрэнбат удаа дараа мэдээлэл хийсэн.

А.Цэрэнбат “Дарханы замын ашиглалтад орох хугацаа яг хэзээ эсэх нь тодорхойгүй. Зарим хүмүүс хуулийн цоорхойтой тушаал гаргаад зугатаж байна. Хууль тодорхой цаг хугацаатай байх ёстой. Тодорхойгүй байдлаас болж иргэд хохироод байна. Улаанбаатар-Дархан чиглэлийн авто замаар өдөрт дунджаар 5800 тээврийн хэрэгсэл зорчдог. Харин амралт зугаалгын үеэр 12.300 тээврийн хэрэгсэл зорчин өнгөрдөг. Надтай адил маргаан үүсгэх хүсэлтэй 200 гаруй хүн долоо хоногийн дотор нэгдсэн. Төр засаг ард иргэдээсээ уучлал гуйх хэрэгтэй. Дархны зам нь өөрөө муу юм шиг хандах хандлага ихэслээ. Харамсалтай нь энэ байдал зам муугийнх биш замын менежментийг буруу хийсэн учраас үүсэж буй асуудал юм. Дарханы замын улмаас иргэд 500 мянгаас 40 сая төгрөгийн хохирол амссаар байна. Зам тээврийн яам буруу менежменттэй ажилласныг шүүхээр тогтоолгохоор гурван өмгөөлөгч энэ асуудалд анхаарал хандуулан ажиллаж байна. Дарханы замд явахдаа хохирсон иргэд нэгдэж, нөхөн төлбөр гаргуулахаар тэмцэх хэрэгтэй” гэж уриалсан.

Түүнчлэн зам хааж түр замаар зорчуулсан дөрвөн сарын хугацаанд 16 хүн амь насаа алдаж, 70 орчим хүн гэмтэл, бэртэл авч, маш олон иргэд эд хөрөнгө, машин, техникээр хохирчээ. Тэд одоо үргэлжилж буй энэ байдлыг таслан зогсоохоор хийж болох бүхий л алхмыг авах тухайгаа онцолсон юм.​ Түүнчлэн хуулинд заасны дагуу Засгийн газар, Зам тээвэр хөгжлийн яам Дарханы зам засварын ажлыг хариуцаж байгаа тул бид бүхэн иргэдэд учирсан хохирлыг нөхөн төлүүлэх, уучлал гуйлгах, хариуцлага алдсан албан тушаалтанд хуулийн хариуцлага хүлээлгэх хүртэл ажиллах болно” гэдгээ мэдэгдсэнюм.

ЗАМ ТЭЭВЭР ХӨГЖЛИЙН САЙД Б. ЭНХ-АМГАЛАН “2019 ОНЫ АРВАННЭГДҮГЭЭР САРД ДАРХАНЫ ЗАМ АШИГЛАЛТАД ОРЧИХНО” ГЭЭД ИРГЭДИЙГ МОЛИГО ҮМХҮҮЛСЭН

Дархан-Улаанбаатарын зам ингэж “там” болоод хагас жил үзлээ. ЗТХ-ийн сайд Б.Энх-Амгалан “2019 оны арваннэгдүгээр сард дарханы зам ашиглалтад орчихно” хэмээн толгойгоороо хариуцаж зогссон нь саяхан. Сайдаасаа гадна авлигын хэрэгт холбогдсон Х.Оргил-Эрдэнэ дарга хүртэл “Удахгүй ашиглалтад орно” гэж улс даяар зарлаж байсан ч хэлсэн ярьсан нь ёстой “нохойн жогорхой” болсон. Бодит байдал дээр Дарханы зам ашиглалтад орох нь байтугай шороон замаа бүрэн тэгшлээгүй, хугацаандаа амжихгүй, он дамнан хойшлогдсон. Бодит байдал дээр ЗТХ-ийн сайд Б. Энх-Амгалан “2019 оны арваннэгдүгээр сард Дарханы зам ашиглалтад орно” гэж иргэдэд молиго үмхүүлсэн.

ДАРХАНЫ ЗАМЫГ ХААЖ ТҮР ЗАМААР ЗОРЧУУЛСАН ДӨРВӨН САРЫН ХУГАЦААНД 16 ХҮН АМЬ НАСАА АЛДАЖ, 70 ОРЧИМ ХҮН ГЭМТЖЭЭ

Дарханы замыг хааж түр замаар зорчуулсан дөрвөн сарын хугацаанд 16 хүн амь насаа алдаж, 70 орчим хүн гэмтэл, бэртэл авч олон иргэд эд хөрөнгө, машин техникээрээ хохирсон байна. Машин техник хэрэгслээр хохирсон хүн 200 гаруй байгаа аж. Там болсон тамтаггүй эл замд явахдаа хохирсон 200 гаруй иргэдийн 500 мянгаас 40 сая төгрөгийн хохирлыг өнөөдөр хэн хариуцаж барагдуулах вэ гэдэг асуулт зүй ёсоор гарч ирж байгаа.Одоо хүртэл үргэлжилж буй энэ байдлаас болж хичнээн иргэд эд хөрөнгөөр хохирохыг ч цаашид таашгүй юм. Авто замын тухай хуулинд хариуцлагын тухай тодорхой заалт байгаа. Монгол Улс хэрвээ хуультай, хуулиа мөрддөг улс орон мөн л юм бол энэ хуулийн заалтыг хэрэгжүүлж, хохирсон иргэдийн хохирлыг барагдуулах л хэрэгтэй болно доо.

АВТО ЗАМЫН ТУХАЙ ХУУЛЬ АРАВДУГААР БҮЛЭГ

35 дугаар зүйл. Авто замын тухай хууль тогтоомж зөрчигчдөд хүлээлгэх хариуцлага

35.1.Авто замын тухай хууль тогтоомж зөрчсөний улмаас бусдад учруулсан хохирлыг холбогдох хууль тогтоомжид заасны дагуу эрх бүхий байгууллага, албан тушаалтан гэм буруутай этгээдээр нөхөн төлүүлнэ.

35.2.Авто зам, замын байгууламжийн ашиглалтын хэвийн нөхцөлийг хангаагүйгээс иргэн, хуулийн этгээдэд хохирол учирсныг хууль, хяналтын байгууллага тогтоосон бол тухайн авто зам хариуцагч болон эзэмшигч уг хохирлыг хариуцан төлнө.

35.3.Авто замын тухай хууль тогтоомж зөрчсөн этгээд гарсан хохирлыг нөхөн төлсөн нь түүнийг хуулийн бусад хариуцлагаас чөлөөлөх үндэслэл болохгүй.

35.4.Авто замын тухай хууль тогтоомж, стандарт, норм, нормативыг зөрчсөн, авто зам, замын байгууламжийн ашиглалтын хэвийн нөхцөлийг алдагдуулсан нь эрүүгийн хариуцлага хүлээлгэхээргүй бол Зөрчлийн тухай хуулийн холбогдох зүйлд заасны дагуу эрх бүхий албан тушаалтан шийтгэл ногдуулна.