Удахгүй "Олон улсын хүүхдийн эрхийг хамгаалах өдөр" болно. Гэтэл эх орны минь ирээдүй болсон бяцхан үрс томчууд бидний хариуцлагагүй хайнга байдлаас эрүүл мэнд, амь насаараа хохирсон харамсалтай хэргүүд гарсаар л байна.

2019 оны арванхоёрдугаар сарын 23-наас хойш өнөөдрийг хүртэл “Covid -19” цар тахлын хөл хорио үргэлжилж, хүүхэд багачууд гэртээ байгаа. Гэртээ үлдсэн хүүхдүүд харах эзэнгүй үлдэж байгаагийн зэрэгцээ хүүхдүүдийн эрхэнд халдсан хэргүүд буурахгүй улам нэмэгдэх хандлагатай байна. Тухайлбал, 2020 оны эхний гурван сарын байдлаар гэмт хэргийн улмаас нас барсан хүний тоо 261 болж, өмнөх жилээс 114 тохиолдлоор буурсан сайн үзүүлэлт байгаа ч гэмт хэргийн улмаас нас барсан 17 хүртэлх насны хүүхдийн тоо бууралгүй нэмэгдэж улмаар энэ сарын 27-нд өсвөр насны дөрвөн хүүхэд тогтоол усанд амиа алдсан харамсалтай хэрэг гарлаа.

Хүүхдүүд амь насаа алдсаны хариуцлагыг хэн нэгэнд хүлээлгэлээ гээд хүүхдийн амь нөхөгдөхгүй. Харин холбогдох удирдлагууд нь арьсаа хамгаалсан тайлбар хийж уснаас хуурхай гарахыг эрмэлзэж байна.

БУСДЫН БУРУУТАЙ ҮЙЛДЛЭЭС БОЛЖ ХҮҮХЭД ЭНДЭЖ, АМИА АЛДАЖ БАЙСАН БАРИМТУУД.

БАРИМТ 1 Баянзүрх дүүргийн 26 дугаар хорооны нутаг дэвсгэр, Үндэсний цэцэрлэгт хүрээлэнгийн урд хэсэг, Туул гол дагуух Маршалын гүүрнээс зүүн тийш орших “Хан талст” ХХК-ийн эзэмшлийн газарт үүссэн усан толионд 8-12 насны дөрвөн хүүхэд эндэж, амь насаа алдсан харамсалтай хэрэг энэ сарын 27-ны өдөр гарлаа.

БАРИМТ:2 Дархан-Уул аймгийн Дархан сумын 13 дугаар багийн нутаг дэвсгэр Их сургуулийн гудамж дахь Оюутны хотхоны байранд бага насны гурван хүүхэд цаг бусаар амиа алдсан эмгэнэлтэй хэрэг 2020 оны хоёрдугаар сарын 5-нд гарав.

БАРИМТ: 3 2018 оны зургаадугаар сарын 18-нд Баянзүрх дүүргийн 79 дүгээр сургуулийн хөл бөмбөгийн талбайн хаалганд 11 настай хүү даруулж амь насаа алдав. Ойр орчимд нь сургуулийн талбайгаас өөр тоглох газар байхгүй тул тэр хавийн хүүхдүүд тэнд тоглож, өдрийг өнгөрүүлдэг байжээ. Тухайн үед хөл бөмбөгийн талбай нээлттэй, сургуульд жижүүрээс өөр хүн байгаагүй аж. Хүү төмөр шонгоос барьж, бөмбөг өшиглөх үед хаалга дээрээс нь унаж, амиа алдсан байдаг.

БАРИМТ: 4 2018 оны зургаадугаар сарын 25-нд есөн настай хүү гэрийнхээ ойролцоо буюу Сүхбаатар дүүргийн VII хороонд байрлах эмийн сангийн хажууд тоглож байгаад мөн л зуурдаар, бас харамсалтайгаар амиа алдсан. Хөөцөлдөж явсан хүү "Эко шинэс" эмийн сангийн хаалганаас барьснаар тогонд цохиулан амиа алдсан. Эмийн сангийн цахилгааны утас ил гарснаас төмөр хаалганд цахилгаан цэнэг үүсч, ийнхүү нэгэн хүүгийн аминд хүрсэн юм.

БАРИМТ 5: Найман жилийн өмнө есдүгээр сарын 3-ны энэ өдөр хичээлээ тараад ээж, дүүтэйгээ хөтлөлцөн гуравдугаар эмнэлгийн баруун талд явж байсан Б.Есүгэн охины дээрээс барилгын бетон зуурмагийн хоолой унаж амь насыг нь хохироосон харамсалтай хэрэг гарсан. Энэ хэрэгт хэн хариуцлага хүлээв.

БАРИМТ 6: 2014 онд “Тэнгис” кино театрын зүүн урд талд “Эко констракшн”-ы барилга барихдаа хөдөлмөр хамгаалал, аюулгүй ажиллагааны журам зөрчсөнөөс барилга дээрээс тулгуур төмөр унаж оюутан харамсалтайгаар амиа алдсан. Энэ хэрэгт ямар хүмүүс хариуцлага хүлээсэн бэ.

...Дээрх баримтуудаас харахад томчуудын буруутай хайхрамжгүй хариуцлагагүй үйлдлээс болж хүүхдүүд амиа алдаж, эрүүл мэндээрээ хохирч байна. Үнэхээр хүүхдэд ээлгүй халтай нийгэм болж хувирчээ. Иргэдэд ээлтэй "Аз жаргалтай Улаанбаатар" хот, мэргэжлийн байгууллагаар хянуулсан аюулгүй орчин нь хаана байна бэ? Бид хайхрамжгүй, хэнэггүй зангаасаа болж алаг үрсээ алдсаар байх уу?