Чойжин ламын сүм музейн “Хот мандал-нууц тарнийн сүм” гэрэл зургийн үзэсгэлэнг Варшавт нээв

Н.Баярмаа / Гадаад мэдээ

Монгол, Польш хоёр улсын хооронд дипломат харилцаа тогтоосны 70 жилийн ойн хүрээнд зохион байгуулж байгаа Чойжин ламын сүм музейн “Хот мандал-нууц тарнийн сүм” гэрэл зургийн үзэсгэлэнгийн нээлтийн үйл ажиллагаа Варшав дахь Ази, Номхон далайн музейд өчигдөр болов.

Энэхүү үзэсгэлэнг БНПУ-д авчирч, Варшав хотод дэлгэн үзүүж польшийн олон нийтийн хүртээл болгоход Чойжин ламын сүм музейн захирал Д.Отгонсүрэн, Варшав дахь Ази, Номхон далайн музейн захирал Иоанна Вашилевска нар болон эдгээр музейн хамт олон сэтгэл гарган тусалж, идэвх зүтгэл гаргажээ.

Энэхүү үзэсгэлэн нь коронавирусын цар тахлын хөл хорио тогтоосноос хойшхи хугацаанд БНПУ-ын гадаад харилцааны салбарт хоёр талын шугамаар зохион байгуулагдаж буй, өндөр түвшний зочид төлөөлөгчид оролцсон, анхны том арга хэмжээ юм. Монгол Улсын үндэсний баяр наадмын босгон дээр энэхүү үзэсгэлэнг зохион байгуулсан нь 70 жилийн түүхтэй хоёр орны дипломат харилцаанд польшийн тал өндөр ач холбогдол өгч буйн илэрхийлэл болов.

Нээлтийн үйл ажиллагаанд БНПУ-ын Сеймийн дэд маршал Малгожата Гошевска, Гадаад харилцааны дэд сайд Марчин Пшидач, Бүгд Найрамдах Польш Улсаас Монгол Улсад суугаа Онц бөгөөд Бүрэн эрхт Элчин сайд Кшиштоф Бойко, Польшийн Ерөнхийлөгчийн Тамгын газрын Гадаад харилцааны товчооны захирал Витольд Жельски нар болон албаны бусад хүмүүс талаас оролцов.

Харин Монгол Улсаас БНПУ-д суух Онц бөгөөд Бүрэн эрхт Элчин сайд Бархасын Дорж, Монгол Улсын ЭСЯ-ны ажилтан нар болон Польшид оршин суугаа монголчуудын төлөөлөгчид оролцжээ.

Түүнчлэн Польшийн бизнес, урлаг, соёл хэвлэл мэдээллийн байгууллага, Варшав дахь зарим ДТГ-уудын тэргүүн нар зэрэг нийтдээ 100 гаруй хүн үзэсгэлэнгийн нээлтэд хүрэлцэн ирлээ.

Эх сурвалж: Гадаад харилцааны яам


Сэтгэгдэл

Зочин [83.28.212.109] 2020-07-10 20:56:33

Орчин үеэс сурталчлаад бх ч зүйл алга даа. Манай түүх соёл аугаа их шүү. Түүнийгээ сурталчлахгүй бол монголчууд өөр юугаа сурталчлах билээ

Хуучнаа үзүүлэх нэг хэрэг, гэтэл өнөөгийн үеэ сурталчлах нь илүү хэрэгтэй. [202.131.225.53] 2020-07-09 11:50:53

Монгол ч шинэ үеийн, 20-21-р зууны зүйлээр ийм үзэсгэлэн гаргавал хэнд ч сонирхолгүй, хэрэггүй зүйл болсон бололтой. Тэгээд л дивэн галавын "эртний" зүйлээ үзүүлээд л сууж байх болж байна доо. Уг нь ирээдүйрүүгээ харж өнөөгийнхөө бизнес, аж ахуй, жуулчлалын орчноо дэлхийн олон нийтэд танилцуулж сурталчилж байх нь өнөөгийн БИДЭНД илүү ашигтай баймаар юм.


2 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
2 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.