Өнөөдөр цахим орчинд Монголчууд нисдэг тэрэгтэй боллоо хэмээн гайхуулж эхлэв. Ганцхан өгүүлбэр хэлье. Бахархалтайгаар бичиж буй нисдэг тэрэгнүүд чинь бидэнд бэлэглэсэн эсвэл бид бэлэн төлөөд авчихсан эд биш шүү, харин цаг минутаар хүү нь бодогдож буй зээлээр авсан өр гэж бодоорой.

Энэ тухай мэдээ орой бахархалтайгаар телевизийн мэдээ бүрээр гарах нь дамжиггүй. Гэтэл яг үнэндээ эдийн засаг элгээрээ хэвтсэн энэ үед ард иргэдийн орлого хумигдаж, аж ахуйн нэгжүүд хаалгаа хаасан нь нууц биш. Чухам энэ үед иргэдийн амжиргааг дэмжих ажил тог цахилгаан тэглэхээс өөр дорвитой ажил хийгдээгүй. Гэтэл тансаг хэрэглээнд буюу нисдэг тэрэг авахдаа зээлээр авч байгааг юу гэж ойлгох вэ. Та бүхэнд эргэн сануулая. 2019 оны 12 дугаар сарын 13-ны өдөр Монгол Улсын Их Хурлын дарга Г.Занданшатарт тухайн үед Сангийн сайд байсан Ч.Хүрэлбаатар Монгол Улсын Засгийн газар, Бүгд Найрамдах Франц Улсын Засгийн газар Санхүүгийн хэлэлцээр соёрхон батлах тухай хуулийн төслийг өргөн барьж байлаа. Францын Төрийн сангаас 57,985,000 еврогийн зээлийг 30 жилийн хугацаатайгаар, жилийн 0,08 хувийн хүүтэйгээр авахаар төсөлд тусгасан байсан. Харин үндсэн зээлийн төлбөрөөс эхний 10 жил чөлөөлөгдөх юм байна.

Олон улсын валютын сангийн аргачлалаар тооцвол энэхүү зээлийн хөнгөлөлтийн түвшин нь 60,3 хувьтай байгаа нь Монгол Улсын Өрийн удирдлагын тухай хуулиар “нэн хөнгөлөлттэй” зээлийн ангилалд хамаарна гэж Сангийн сайд асан Ч.Хүрэлбаатарын өргөн барьсан төсөлд дурджээ.

Ийнхүү Монгол Улс хэмжээ хязгааргүй зээл авч байгаа нь хууль өргөн барьж, кноп дарж суугаа эрх баригчдад огтхон ч асуудал биш. Энэ бол бидний үр хүүхдэд үлдэх өр юм шүү. Болсон болоогүй зээл гаднаас татаж, төсвийн хууль батлахаараа цар тахлын онцгой байдлын үед музей театр барихад төсвөө зарцуулж буй Монгол Улсын Их Хурал, Засгийн газар яагаад ард иргэд, аж ахуйн нэгжийг бодсон дорвитой алхам хийхгүй байна вэ. Зээлээр нисдэг тэрэгтэй болоод монголчуудад ашиг тусаа өгвөл сайн, гэхдээ ажлын байрыг нэмэгдүүлж, амьдрал ахуйг өөд татахад хир нөлөөлөх вэ. Бахархан хийж буй ажлуудын чинь зарим нь байгаа ч олохгүй банзаа ч олохгүй байна шүү эрх баригчид аа. Инээсэн бүхэн найз биш, уурласан бүхэн дайсан биш гэдэг. Шүүмж бичсэн болгоны амыг барих биш харин шүүмж доторх эрүүл утга санааг олж уншдаг болмоор байна.

Энэ сарын 22-нд ёслолын ажиллагаа зохион байгуулан хүлээн авсан нисдэг тэрэг бол бидэнд бэлэглэсэн эсвэл бид бэлэн төлөөд авчихсан эд биш, цаг минутаар хүү нь бодогдох зээлээр авсан өр гэж бодоорой.

Энэхүү нисдэг тэргийг авсан зээлийн хэлэлцээрийг үзэхийг хүсвэл доорх линкээр орно уу.

..:: www.Legalinfo.mn - Хуулийн нэгдсэн портал сайт ::..