Цагдаагийн алба хаагч ажлаа хийж байсан сэтгүүлчдийн биед нь халдсан хэрэг гарсан билээ.

Тодруулбал, Бүх нийтийн бэлэн байдлын зэрэгт байгаа энэ үеэр Төв талбайд УИХ-ын долоон гишүүн өлсгөлөн зарласан болж буй үйл явдалыг сурвалжлахаар сэтгүүлчид очсон ч Цагдаа нэвтрүүлэхээс татгалзаж улмаар биед халдсан юм /2021.05.06/.

МСНЭ-ийн Ерөнхийлөгч З.Боргилмаа: "Хэвлэл мэдээллийн салбарынхан сурвалжлах, мэдээлэл дамжуулах эрхийг хаагаагүй. Харин үүрэг хүлээлгэсэн. УОК болон эрх бүхий байгууллагаас гаргасан шийдвэр мэдээлэл зөвлөмжийг үнэ төлбөргүйгээр саадгүй, баттай эх сурвалжаас авах, дамжуулах үүргийг манай салбарт оноосон.

Энд зарим объект руу орж болно, болохгүй мэргэжлийн үйл ажиллагааг нь хааж боож болно, төрийн ордоны бүсэд нэвтрүүлэхгүй, Цагдаа хүч хэрэглэж энэ үйл ажиллагааг таслан зогсоож болно гэсэн хууль эрх зүйн акт, зохицуулалт огт байхгүй байтал хууль бусаар сэтгүүлчдийг мэргэжлийн үйл ажиллагааг таслан зогсоож, улмаар хүч хэрэглэж биед нь халдсан тохиолдол гаргалаа.

Төр өөрийнхөө мэдээ, мэдээллийг цензурдэх оролдлого хийж байгааг эрсдэлийн мэдээлэл, харилцах холбоогоор гаргаж байна. Энэ нь цаагуураа иргэдийн мэдэх эрхэнд халдаж байна. Төр өөрийнхөө олон нийтэд дэлгэе гэснээ дэлгэж, үзүүлнэ гэснээ үзүүлэх энэ давуу эрхийг олж авч байна. Үүнийг хуулиар зохицуулах ёстой.

Хамгийн сүүлд 04-р сарын 16-нд Үндсэн хуулийн цэц дээр болсон маргааныг сурвалжлах эрхийг хаасан. Бас л гудамжны уулзвараас Цагдаа хааж зогсоод оруулаагүй. Өнөөдөр талбай дээр болсон өлсгөлөн, үйл явдлыг сурвалжлах эрхийг хаалаа. Ямар шийдвэр гараад ямар зохицуулалт үйлчилээд, хэзээ хэн тийм шийдвэр гаргаж төв талбай руу сэтгүүлчдийг нэвтрүүлж болохгүй болов оо.

Өнөөдөр талбайн 4 талд Цагдаа гараад сэтгүүлчид, иргэдийг хэнийг ч нэвтрүүлэхгүй. Цагдаад сэтгүүлчдийн эрх чөлөөнд халдахыг хэн олгосон юм бэ" гэлээ.