ЭМЯ-ны хэвлэлийн төлөөлөгч Б.Ууганбаяр Ямар нэг шалтгаанаар дархлаажуулалтад хамрагдаагүй иргэд хэрхэн вакцин тариулж болох, МӨН вакцинжуулалтын ажлын талаар дэлгэрэнгүй мэдээлэл өглөө.

Б.Ууганбаяр: "Вакцин хийлгэх нь халдвар авах эрсдэлээс хамгаалж, халдвар авсан тохиолдолд биеийн байдал хүндрэх, амь насаа алдах аюулыг багасгана. Эрүүл мэндийн ажилтнуудын үзэж буйгаар вакцины нөлөө өндөр байгаа" гэв.

Олон улсын судалгаануудаас харахад ковид-19-ийн вакцины нөлөө 75-95 хувь, Монгол Улсад 85-95 хувийн нөлөө үзүүлж байна.

Манай улсад халдварын улмаас нас барсан хүмүүсийн 95 хувь нь вакциндаа хамрагдаагүй гэх тооцоолол гарсан бол өнөөдрийн байдлаар 18-аас дээш насны 300 гаруй мянган хүн вакцин тариулаагүй үлдсэн байна.

Харин ямар нэг шалтгааны улмаас вакцин тариулаагүй иргэд дархлаажуулалтын цэгт очиж, эмчид үзүүлэн Вероселл, Астразенека, Комирнэти буюу Файзер гэх гурван төрлийн вакцинаас сонгож, өөрт тохирохыг нь тариулах боломжтой боллоо. Харин хоёр өөр вакцины тунг хольж хийлгэж болохгүйг иргэд анхаарах хэрэгтэй. Тодруулбал, та нэгдүгээр тунг вероселл вакцин хэрэглэсэн бол өөр вакцин хийлгэх боломжгүй.

Манай улс вакцины II тунд хамрагдсанаар нийт хүн амын 52%-ийг эзэлж байгаа учраас сүргийн дархлаа тогтох болоогүйг ЭМЯ-ны хэвлэлийн төлөөлөгч Б.Ууганбаяр мэдээллээ.

Сүүлийн үед битүү орчин буюу гэр, албан тасалгаа зэрэгт халдвар илрэх нь их байгаа тул иргэд халдвар хамгааллын дэглэмийг сайтар баримтлах хэрэгтэй. Өнөөдөр халдварт өвчнийг бууруулах хоёр арга зам байгаа нь хөл хорио тогтоох болон вакцинжуулалт хийгдэх нь хамгийн үр дүнтэйг албаны хүмүүс үзэж байна.

www.mass.mn