Булган аймгийн Онцгой комиссын шуурхай штабын эрүүл мэндийн албанаас коронавирусний нөхцөл байдлын талаар өдөр тутмын 16.00 цагийн мэдээллээ хийлээ. Шуурхай штабын менежер С.Нарантуяа:

- ЭМЯ-ны коронавирусний нөхцөл байдлын талаарх мэдээлэл өнгөрсөн шөнийн 00.00 цагаар тасалбар болгон мэдээлсэн. Үүнээс хойш аймгийн хэмжээнд нийт 42 тохиолдол нэмэгдсэн. Хутаг-Өндөр суманд зургаа, Булган суманд 17, Могод суманд дөрөв, Хишиг-Өндөр суманд дөрөв, Гурванбулаг суманд нэг, Дашинчилэн суманд дөрөв, Сайхан суманд зургаан хүн халдвар авч нийт 691 хүн халдвар аваад байна. Шинээр нэмэгдсэн тохиолдлын хувьд зөөвөрлөгдсөн тав, эх үүсвэр нь тодорхойгүй нэг, хяналтад байсан иргэдээс 38 хүн халдвар авсан нь батлагдлаа.

Халдвар аваад бүрэн эдгэсэн 211, ажиглалтад 223 хүн байна. Өнөөдрийн байдлаар эмчлүүлж байгаа 229 иргэний биеийн байдал хөнгөн 215, хүндэвтэр 13, хүнд нэг байна гэж мэдээллээ.

Коронавирусний халдвар авсан иргэд 57,0 хувь гэр бүл, 12,0 хувь ажлын байр, 10,4 хувь найз нөхдийн хүрээнээс халдварт өртсөн судалгаа байна. Мөн халдвар авсан иргэдийн 5,3 хувь дархлаажуулалтын эхний тунд хамрагдсан, 18,0 хувь 2 дахь тунг хийлгээд 14 хоносон байжээ.