Цогтцэций-Чойр чиглэлийн улсын чанартай авто замаар нүүрс тээвэрлэлт явуулахгүй гэсэн Зам тээврийн сайд Л.Халтар сайдын шийдвэрийг Монгол тээвэрчид төв талбай дээр эсэргүүцэж, Засгийн газрыг асуудлыг яаралтай шийдэж өгөх шаардлагыг хүргүүллээ.

Л.Халтарын сайдын хувьд тус чиглэлийн газрыг сүйтгэсэн, нөхөн сэргээх ажил хийхийн тулд хаасан гэв. Тэрбээр “Эдийн засаг, мөнгө гээд хэзээ ч нөхөн сэргээхдэхгүй байгаль дэлхийгээ устгаж болохгүй” гэв.

Тээвэрчид ийнхүү ярьж байна:

-Тээвэрчдийг хүний тоонд авч үзэхгүй байна. Монгол тээвэрчид ажил, амьдралгүй, хятад тээврийн компаниудад ажлаа дээрэмдүүлсээр байна. Салбарын сайд Л.Халтарыг асуудлыг шийдэж өгөхийг хоёр хоног яамных нь гадаа хүлээж суулаа, мэнд ус ч байхгүй. 14 хоног тусгаарлагдаад, бөмбөлгөнд орох эрх үүссэн жолооч нараа өөр компанид 10,000 юанаар зардаг. Энэ ямар хүний наймаа юу?

-Өнөөдөр өглөө шалаанзтайгаа орж ирсэн залууг төв талбайн гантиг чулууг гэмтээнэ гэж албадан, баривчлаад явлаа. Тавантолгой-Чойр, Тавантолгой-Шивээхүрэн чиглэлд тээвэр хийдэг хүмүүсийн амьдралыг гантиг чулуунаас дор үзэж байна. Засгийн газар ээлжит бусаар даруй хуралдаж, энэ асуудлыг шийдэж өг.

Бид нар зүгээр нэг жагсаал хийж яваа, хөлсний жагсагчид биш. Төрөөс нэг ч төгрөг гуйгаагүй, улс орныхоо экспортод хувь нэмрээ оруулая, амьдралаа авч явъя гэсэн.

Монголын экспорт гацсан. Н.Амарзаяа гэж хүн очсоноос хойш авилгал, хээл хахуул дээд цэгтээ хүрсэн.

-Энд төрийг төлөөлж байгаа хүмүүсийг сольмоор байна. АТГ, Эрүүгийн цагдаагийн газар ажлаа хийгээсээ, мөнгөний схем нь ил байгаа. Жолооч нарыг бөмбөлөгт бүртгэнэ гэж 30000-50000 юань нэхэж байна, үүнийг монгол жолооч нар дийлэхгүй.

-Аргаа бараад амин зуулга болсон машинаа талбай дээр авч орж ирлээ. Ерөнхий сайд болон Ерөнхийлөгчид шаардлага хүргүүлж байна. Би тээвэрчний хүү, тээвэрчдийнхээ зовлонг ойлгодог гэж ярьж байсан Ерөнхийлөгч У.Хүрэлсүх яагаад дуугай байна вэ? Энд шийдвэр гарахгүй бол өмнөд хил, Замын-Үүд дээр бослого гарч байна. Төр боомтууд дээр бослого болж байгаа талаар мэдэж байна уу? Монгол ах дүүс бие биетэйгээ, төртэйгөө, цагдаа нартайгаа байлдах юм уу?

-Монголд юмыг мартуулж, бүрдгэрүүл, замхруулдаг, тэрнээс шийдэе гэсэн сэтгэл алга. Гашуунсухайт боомт дээрх шинжилгээний асуудлыг ЗТХ-ийн сайд нь Эрүүл мэндийн сайд руу чихчилээ.

Зарим бөмбөлөг 10 хоногт гурван реис явж байхад зарим нь гурван сард нэг ч яваагүй байна. Тэгсэн атал нэг өдөрт 130 мянган төгрөг төлж, тусгаарлагдаж байна. Тээвэрчин залуучууд цагдаа нартай мөргөлдөж байна.

Богины тээврийн оочир дарааллыг ил тод байлгах ёстой. Жирийн иргэд ажлаа сольж болдог бол тээвэрчид нэг компанид л орсон бол цалин бага, таалагдахгүй байсан ч тэндээ л шүдээ зуугаад ажиллах хэрэгтэй болдог. Тээвэрчдийг 14 хоног тусгаарлахад нэг банзан орон дээр гурван хүнийг, нэг хөнжил дотроо унт гэдэг. Ядаж тусад нь хөнжил өгөөч гэхээр битгий давар гэдэг. 30 хүнийг тусгаарлахад нэг эмэгтэй хүнийг ганцааранг нь оруулчихсан байх жишээний. Дарга нар хэзээ бодит байдалтай танилцаж, амьдралд нийцсэн шийдвэр гаргадаг болох юм бэ?