Хууль зүй, дотоод хэргийн яамны Төрийн нарийн бичгийн дарга П.Сайнзориг Олон улсын валютын сангийн Монгол Улсыг хариуцсан ажлын хэсгийн ахлагч Ангана Банержи, Монгол Улс дахь Суурин төлөөлөгч Юн Согхён нарыг өнөөдөр /2022.05.03/ хүлээн авч уулзлаа.

Тус уулзалтаар хуулийн этгээдийн төлбөрийн чадвартай эсэхийг тогтоох, төлбөрийн чадваргүйдлийн хэргийг шүүхэд хянан шийдвэрлэх, төлбөрийн чадваргүйдлийн ажиллагаа эхлүүлэх, нэхэмжлэлийн шаардлага гаргах, түүнийг хангах, хэрэг гүйцэтгэгчийн эрх хэмжээ, түүнийг томилох, чөлөөлөхтэй холбоотой зохицуулалт, үүрэг гүйцэтгүүлэгчдийн хурал, түүний эрх хэмжээ, төлбөрийн чадваргүй хуулийн этгээдийг дахин зохион байгуулах, татан буулгахтай холбогдсон харилцааны зохицуулалтыг боловсронгуй болгох хүрээнд боловсруулсан Төлбөрийн чадваргүйдлийн тухай хуулийн төслийн талаар санал солилцов.

Хуулийн төслийг Монгол Улсын Засгийн газраас 2022 оны 03 дугаар сарын 11-ний өдөр Монгол Улсын Их Хуралд өргөн мэдүүлсэн бөгөөд ОУВС-аас хуулийн төсөлд тодорхой саналыг дэвшүүлж, цаашид хувь хүний төлбөрийн чадваргүйдлийн эрх зүйн орчныг бий болгох, дампуурлын хэрэг хянан шийдвэрлэх ажиллагаанд оролцогч хэрэг гүйцэтгэгч, шүүгчдийн чадавхийг бэхжүүлэх асуудлаар хамтран ажиллах талаар хүчин чармайлт гаргахаа илэрхийлэв гэж Хууль зүй, дотоод хэргийн яамнаас мэдээллээ.