Ардчилсан намын УТЗ-ийн гишүүн Д.Батсайхан: "Монгол Улсын өнцөг булан бүрт байгаа хоёр зуун мянган гишүүний шаардлагыг Улс төрийн зөвлөл төлөөлөл болгон албан ёсоор танилцуулж байна."

Өнөөдөр Ардчилсан намын улс төрийн зөвлөл хурлынхаа шийдвэрийг та бүхэнд танилцуулах хэвлэлийн хурлыг Сүхбаатарын талбайгаас хийж байгаа юм. Өчигдөр буюу 2022.05.17-ны орой АН-ын улс төрийн зөвлөл хуралдсан. Энэ хурлаар хоёр үндсэн шийдэл гаргасан байгаа. 2022.05.08-ны өдөр Улс орон даяар АН-ын бүх нэгжүүд “Онц Хурал”-аа зохион байгуулсан байгаа. Энэхүү хурлаар хэлэлцэж шийдсэн асуудлаа улс төрийн зөвлөлд ирүүлсэн. Үүн дээр үндэслээд улс төрийн зөвлөлөөс дараах шийдлүүдийг гаргасан.

Монгол Улсын 330 сум, Нийслэлийн 9 дүүрэгт бүх гишүүдийн -Онц хурал- зэрэг зохион байгуулагдсан. Нийтдээ 100 гаруй мянган гишүүд оролцож санал бодлоо илэрхийлж, 330 нэгж, Нийслэлийн 9 дүүрэг нэгдсэн шийдэл гаргасан. Энэ шийдлүүд дээр үндэслээд харахад өнөөдрийн Монгол Улсын нийгэм, эдийн засгийн нөхцөл байдал, ямар байгаа гэдэгт үнэлэлт дүгнэлт өгч эрх баригчдад тодорхой шаардлага хүргүүлье гэсэн санал гарсан.

Энэ саналын дагуу улс төрийн зөвлөл хуралдаж өнөөдрийн Монгол Улсын нийгэм, эдийн засгийн нөхцөл байдал дээр үнэлгээ өгч, энэхүү үнэлэлтийн дагуу хийх ажлууд мөн амласан зүйлээсээ биелүүлээч ээ гэдэг шаардлагыг гаргаад ард түмнийхээ нэрийн өмнөөс эрх баригчдад хүргүүлье гэсэн шийдлийг гаргалаа. Хоёр дахь асуудал бол 330 сум, Нийслэлийн 9 дүүрэг дээр хуралдсан бүх гишүүдийн хурлын зүгээс улс төрийн намын бүртгэлийн тухай асуудалтай холбогдуулаад Дээд шүүх дээр болж буй үйл явц дээр намын гишүүд эх орныхоо өнцөг булан бүрээс хүрэлцэн ирж шаардъя, оролцъё гэсэн шаардлагыг маш ихээр ирүүлсэн. Энэ шаардлага зөвхөн өнөөдөр ирсэн хэрэг биш. Жилийн өмнөөс эхлээд гишүүд маань тэмцэнэ гэдгээ илэрхийлсээр ирсэн.

Бидний зүгээс Шүүх байгууллага хараат бус учраас үнэний талд шийдэл гаргана, түүний шийдвэрийг тайван хүлээе гэсэн байр суурьтайгаар өнгөрсөн хугацаанд явж ирсэн. Өнөөдөр АН-ын гишүүд маань бидний хүргүүлж буй шаардлагуудаас давсан шаардлагыг хүргүүлж байгаа. Өөрөөр хэлбэл бид орон нутгаасаа хүрэлцэн ирж тэмцэнэ гэдгээ илэрхийлж байна. Бид энэ өдрүүдэд амгалан тайван байдлыг хангах, эв нэгдлийг хичээх, намын гишүүдийн уур амьсгалыг зөөллөх чиглэлээр зохион байгуулах шаардлагатай гэж үзээд 05-р сарын 18, 19, 20-ны өдрүүдэд ажиллах ажлын төлөвлөгөө гэж гаргасан. Тиймээс төлөвлөгөөний дагуу ирж буй хүмүүстээ аль болох зөв мэдээллийг өгөх, Дээд шүүх дээр болж байгаа процедур дээр нөлөөлөл үзүүлэхгүй байх чиглэлээр тодорхой ажлын хэсэг гаргаад ажиллая гэсэн шийдлийг гаргасан байгаа.

АН-ын УТЗ нь аймаг бүрийг төлөөлсөн нэг гишүүн, Нийслэлийн 9 дүүргийг төлөөлсөн 9 гишүүн байдаг. Ингээд 30 гишүүнээс бүрддэг бөгөөд аймаг, дүүрэг бүрээс сонгогддог албан тушаалтнууд байгаа. Тийм учраас улс төрийн зөвлөлөөс гаргаж буй шийдэл бол нийт гишүүдийн шийдлийг албан ёсоор баталгаажуулж буй юм. Тийм учир өнөөдөр та бүхэнд танилцуулж байгаа шийдлүүд Монгол Улсын өнцөг булан бүрт байгаа хоёр зуун мянган гишүүдийн шийдлийг маш товчоор танилцуулж буй хэлбэр юм.