Нийслэлийн МАН-ын хорооны албан тушаалтнууд хотын харьяа агентлагын дарга нараас хамаарал бүхий компанидаа тендер өгүүлэхээр шахаж шаарддаг байдал захаа алдсан талаар яриа гарах болжээ. Тодруулбал, Хотын дарга Д.Сумъяабазарын орлогчоор ажиллаж байсан, НИТХ-ын төлөөлөгч Д.Ихбаяр, Нийслэлийн МАН-ын хорооны дэд дарга Ч.Батзул, Хяналтын хорооны дарга Н.Сайнбуян нартай бүлэглэн агентлагын дарга нарт "тендер зохицуулах" үүрэг өгч, дарамталж байгаа сурагтай. Улмаар хууль зөрчсөн тендерийн асуудлыг шийдэх боломжгүй гэсэн агентлагын дарга нарыг "Ажлаас чинь халуулна" хэмээн сүрдүүлж байгаа гэх. Ингэхдээ "Бид энэ намын төлөө биеэ үл хайхран зүтгэж байна. Та нар намын гишүүн, намын эрх барьж байх үед албан тушаал хашиж байгаа бол намдаа санхүүжилт босгож өг. Чадахгүй бол ажлаа өг, наад ажилд чинь очих гэсэн хүн дараалаад хүлээж байна" зэргээр шахдаг ажээ.

Тухайлбал, өнгөрсөн долоо хоногт зам, дэд бүтцийн голлох ажлуудыг зангиддаг таван агентлагын даргыг дуудаж, дарамталсан гэх. Мөн тухайн хэргээ хотын даргад мэдэгдэхгүй зохицуулах сануулга ч өгсөн байна. Үүнээс үзэхэд хотын дарга бөгөөд нийслэлийн МАН-ын хорооны дарга Д.Сумъяабазарын ардуур албатууд нь "Хурган мафи" бүрдүүлж, төсвийн мөнгийг хумсалж байгаа бололтой.

Дашрамд дурдахад, Д.Ихбаяр тэргүүтэй дээрх хүмүүс нь МАН-ын нөлөө бүхий хүмүүстэй уулзуулж өгнө, асуудлыг нь шийднэ хэмээн томоохон компанийн удирдлагуудаас олон зуун сая төгрөг авсан байх магадлалтай аж.