Та бид өвдөж зовохын цагт эмнэлэг бус таньдаг эмч, сувилагч, эрүүл мэндийн салбарын хүн хайдаг болоод удлаа. Бүр сүүлдээ энэ зүйл байх ёстой энгийн зүйл болон төлөвшжээ. ЭМД төлөөд ч үр дүнг нь мэдэрдэггүй, ажил хийдэггүй, огт татвар төлдөггүй хүмүүс л үр шим нэртэй гажигтай тогтолцоогоор үйлчлүүлж явна. Гэтэл амьдралынхаа төлөө хөдөлмөрлөдөг хэсэг нь аргаа барахдаа хувийн эмнэлэг бараадана. Яаж бид энэ зүйлтэй эвлэрдэг байна аа, гайхах юм. Монголын дарга нарын "бүхнийг хүүхдийн төлөө", "хүүхэд бидний ирээдүй", "эх хүүхдийн эрүүл мэндийн төлөө" гэдэг үгэнд итгэхээ больсон. Аав ээжүүд хүүхдээ тэврээд эмнэлэгт ор, шал хайн бэдэрнэ. Яагаад энэ улсын эрүүл мэндийн салбар, эмнэлгүүдийг ийм болгочихов доо. Ачааллаа дийлэхээ больсон эмч, сувилагч нарын хандлага ч буруу зүгт явж эхэлсэн. Эх нялхас, Хавдрын эмнэлэг, гэмтлийн эмнэлэг хэзээд ачаалалтай байж ирсэн. Энэ эмнэлгүүдийг бүх талаар сайжруулах, бэхжүүлэх, хүчин чадлыг нэмэгдүүлэх шаардлагатай байна. Гэтэл юун ХЗДХЯ, Тагнуул, шүүх, прокурор, дүүрэг яам агентлагийн сүр сүр барилга босно вэ? 40 жил үүргээ гүйцэтгэсэн хуучин барилгууд чинь болохгүй байна. Сүүлийн 30 жилд ийм 5 эмнэлэг барьсан бол ирээдүйн 15 жилдээ санаа зовохгүй явах байлаа. Музей, хөшөө, соёлын төв, автозамын брожур, усан оргилуураас илүү эмнэлгүүдээ тордооч. Аймаг сум, нийслэл дүүргийн эмнэлгүүдээ очоод хар. Зарим орны шоронгоос дор хүүхдийн эмнэлгүүд байна. Үйлчилгээ, сэтгэл ханамж, тайван байдал гэдэг зүйл огтхон ч алга. Нэг өвчин эмчлүүлэх гэж ороод нөгөө өвчинг аваад гарч байна. Арай ч дээ.

Гэхдээ энэ бүх гажуудалд иргэд бид л буруутай. Та бид намын цагаан солио тусч, улстөрчдийн хишиг болгон тараадаг хулгайн мөнгөнд дассан. Амьдарч биш амьд яваа төдий байх тавиланг сонгочихсон. Хэдэн татвар төлөгч иргэн, аж ахуй нэгж нь нуруугаа авахуултал зүтгэж байхад дэм тус хүргэхийн оронд улстөрийн хэрүүлээр муулна, доромжилно. Бүх бизнесийг төр, ТӨХК хийх нь зөв гэж дэмжинэ. Татварын мөнгө юунд зарцуулагдаж буйг харсаар байж дуугүй явна, өмөөрнө. Төрийн мөнгө буюу татварын төлөгчдийн хураамж буруу зүйлд зарцуулагдвал эрс буруушаан тэмцдэг болсон цагт л энэ улс хөгжинө. Харцгаа, үзэцгээ, бодоцгоо. Монгол Улсын ирээдүй яг одоо шалан дээр эмчлүүлж байна. Хэдий болтол ийм байх юм.

Миний л хүүхэд өвдөөгүй бол надад хамаагүй гэж үү?

Миний л асуудал шийдэгдсэн бол бусдынх падлийгүй гэж үү?

Сэтгүүлч Н.Урантогтох