Улс төрийн технологи гэдэг ойлголт уг нь нийгмийн сайн сайхны төлөөх зорилго, зорилтыг үр ашигтайгаар шийдвэрлэхийн тулд улс төрийн субъектийн ашиглаж буй хэрэгсэл, арга барил, үйлдлийн цогц гэдэг ч үүнийг бохир улс төртэй хутган, ард түмний чадавхийг нээн илрүүлэх, судлахад бус тэдний нийгмийн ухамсар, иргэний идэвхийг бууруулж, амь аргацаасан хүлцэнгүй байлгахад чиглүүлсэн нь харамсалтай. Өөрөөр хэлбэл хулгай хийхийн тулд өмчийн эзнийг хууран мэхэлж, цаг нөхцөөх заль төдий үйлдэл...гэж хамгийн энгийнээр ойлгоно. Тод жишээ нь үр ашиггүй, хавтгайрсан халамжийг шиврээ бороо мэт шээрэгнүүлэн тараах, хүнсний талон, НӨАТ-ын урамшуулал хэлбэрээр халамжилсан дүр үзүүлэх явдал.

Төрийн бүх эрх мэдэл нэг намын атганд төвлөрсөн нь шударга ёсны шаардлагыг шуугианаар дарах, хөшигний ард авлигын уул овоог ард түмний зовлонгоос хүрздэн булах явцгүй бохир улс төр газар авахад хүрсэн жишээг саяхны ЖДҮ, 60 тэрбум, оффшор зэрэг хулгайн хар шуурга, цар тахлын хариуцлагагүйн зудыг АН-ыг хямрааж, ард түмнийг талцуулан дарахыг, хил гаалийн хаалт, үнийн өсөлт, өрийн дарамтыг Хөгжлийн банкны хэрэг гэгчээр булзааруулсан дүр эсгэх ч адагтаа өнөөх нь “жоомоо алах гээд гэрээ шатаав” гэгчээр хулгайн тогтолцоог угаар нь ганхуулах шахсан тул ганц нэг хүн шоронд хорьсон болоод анхаарлын төвөөс холдууллаа. Эдийн засгийн тусгаар тогтнол, чадавхыг бэхжүүлэх бодлогыг үнсэнд хаясан шалз мэт мартан, үйлдвэржилт, төмөр зам, гадаад харилцаа, хөрөнгө оруулалт, ард түмний амьжиргааг, гацааж, тарамдуулж, таягдсан. МАН-ын нэр хүнд навсайхыг ойлгоод сонгуулийн хугацаанаас өмнө ҮХНӨ нэрийн дор дахин намын жагсаалтаар төрд нүүрлэсэн төмөр нүүрт, ширэн дотортнууд нь үлдэх, иргэд нийтээрээ сонгодог Ерөнхийлөгчийн парламентын гишүүд нь булааж авах, Үндсэн хуулийн суурь дархлааг өеөдгөх олон хорт үйл ажиллагааг гүйцэлдүүлэхээр “наадам” нэртэй арьс нөмөрч харанхуй шөнөөр хутга ханцуйлан айсуй.

Эх орон, үр хүүхэд, ирээдүйдээ санаа зовдоггүй иргэн, бие хүн ховор. Харин эрх баригчид үүнийг чадамгай ашиглан хэрэгтэй мэдээллээр боомилон хэрэггүй хов живээр талцуулан, цумралдуулах буюу “ анхаарал сарниулан, арчих технологи”-д ард түмнээ дасгах гэж оролдон араар нь оффшор, 60 тэрбум, ЖДҮ, Хөгжлийн банкны зээлийн асуудал, ҮХНӨ, мах, хүнсний аюулгүй байдал зэрэг улс орны өмнө тулгамдсан олон чухал асуудал, авлига албан тушаалын гэмт хэргийн шалгалт, шийдвэрлэлтийн явц мэтийг орхигдуулжээ. Ажлын таван өдрийн ой санамжтай, таргийн таван ямааны хэмжээний ахуй амьдралтай харанхуй бүдүүлэг ард түмнийг унаашруулан өөрсдөө эрх мэдлийн хөнжилд хөлчүү халуурч, газар нутгаасаа таслан харийнханд таслан танхайрах замаар мянга мянган жилийн түүхтэй төрт ёс, өвөг дээдсийн цусаар бүтэж, ясаар ивэгдсэн тусгаар тогтнолоо хувийн эрх ашиг, наймаа, мөрий, ямбаны хэрэгсэл болгохоор улайрах хэдэн том хувалз нуур нуур гэсээр нугасанд шигдэж, Монгол Улс мөдхөн дагуул, хувь заяаны тохуурхал болох вий.