Ардчилсан намын ЕНБД И.Мөнхжаргал: НҮБ-ын ЕНБД Андионо Гутеррешийн энэ удаагийн айлчлалыг манай улсын гадаад харилцааны бодлогын хүрээндэх томоохон амжилт хэмээн харж байна.

Монгол улсын ерөнхийлөгч У.Хүрэлсүхийн урилгаар НҮБ-ын Ерөнхий нарийн бичгийн дарга 13 жилийн дараа Монгол Улсад албан ёсны айлчлал хийж байна. Таны зүгээс энэ айлчлалын үр дүнг ямар байгаасай гэж харж байна вэ?

Монгол улс Орос, Хятад хэмээх мөнхийн хоёр хөрштэй. Хоёр талын хөрш улсын дэлхий нийтийн анхаарлын төвд ороод байгаа цэрэг дайны хурцадмал байдалтай энэ цаг үед НҮБ-ын ЕНБДарга Монголд айлчлилж байгаа нь цаг үеэ олсон үйл явдал болж байна. Мөн энэ удаагийн айлчлал Монгол улс НҮБ-д элссэний 60 жилийн ой, Монгол Улс цөмийн зэвсэггүй статусаа зарласны 30 жилийн ой, Монгол Улс энхийг сахиулах ажиллагаанд оролцож эхэлсний 20 жилийн ойтой давхцаж байгаагаараа бас онцлогтой байна. НҮБ-ын Ерөнхий нарийн бичгийн дарга Антонио Гутерреш Монгол улсын өнөөгийн нөхцөл байдалтай газар дээр нь танилцаж улс төр гадаад харилцааны хувьд төвийг сахисан Ардчилсан орон хэвээр байгаа гэдгийг НҮБ-ын гишүүн орнуудад болон дэлхий нийтэд ойлгуулсан чухал үр дүнтэй айлчлал байгаасай хэмээн бодож байна.

Орос, Украйн, Хятад, Тайваны хооронд үүсээд буй өнөөгийн хурцадмал нөхцөл байдлын үед Монгол улсын Ерөнхийлөгч У.Хүрэлсүх НҮБ-ын Ерөнхий нарийн бичгийн дарга ноён Антонио Гутеррешийг Монгол улсад албан ёсоор урьсан явдлыг сөрөг хүчний хувьд хэрхэн хүлээж авч байна вэ?

Монгол улс улс төр, эдийн засаг, гадаад харилцааны хувьд тогтвортой байж энхийг эрхэмлэгч орон байхыг хэзээд зорьж ирсэн. Манай улс ардчиллыг бэхжүүлж хууль зүйн хүрээнд хүний эрхийг дээдэлдэг орон шүү дээ.

Бид хэдийгээр сөрөг хүчин боловч Монгол улсын эрх ашгийн төлөө явуулж буй зөв гадаад бодлогыг бол дэмжих ёстой. НҮБ-ын ЕНБД Антонио Гутеррешийн Монголд хийж байгаа энэ удаагийн айлчлалыг манай улсын олон талт дипломат бодлого болон гадаад харилцааны бодлогын хүрээндэх томоохон амжилт хэмээн харж байна.

Дээрх айлчлалын тухайд Ардчилсан намын зүгээс дэмжсэн байр суурьтай байна гэж ойлголоо зөв үү? Тэгвэл Ардчилсан намын дотоод асуудал юу болж байгаа вэ? Одоогоор хийж байгаа болон цаашид төлөвлөж байгаа ажлын талаар та мэдээлэл өгнө үү?

Тийм ээ. Дахин хэлэхэд Монгол улсын эрх ашгийн төлөө хийж буй зөв үйлдэл бүрийг бид дэмжинэ. Ардчилсан намын зүгээс 2024 оны сонгуульд оролцох бэлтгэл ажлыг үе шаттайгаар зохион байгуулж эхлээд байна. Энэ ажлын хүрээнд хийж буй эхний ажил бол намын анхан шатны гишүүдээсээ асууж УИХ-ын сонгуульд нэр дэвшигчдийг тодруулах үйл ажиллагаа явагдаж байгаа ба нэр дэвших хүсэлтэй гишүүдтэй байгуулах гэрээний төслийг урьчилсан байдлаар бэлтгэн ажиллаж байна.