Ховдод хотоос Засаг очих нь арай л агаарын юм биш үү сайд аа? Улаанбаатар хотоос 1,580км-ийн зайд орших 76,060.38км² газар нутагтай олон ястны өлгий Ховд аймагт 88.000 орчим иргэд амьдардаг. Энэ нутагт халуунд халж хүйтэнд хөрж эх нутгийнхаа элсэн ширхэг бүрийн онцлогийг мэддэг нутгийн зон олон бий. Тэдэнд төрийн ордноос шууд бурхан томилсон ч утгагүй санагдаж байна хэмээн бухимдаж байна. Арга ч үгүй биз. Аль ч цаг үед орон нутгийн сонгууль болон их хурлын сонгууль, иргэдийн хурлын сонгууль гээд л бүх сонгуулийн жаргал зовлон дунд тэд л байж ялалт ялагдал бүрийг амсдаг. Гадны нэг нь ялагдвал унасан газраасаа хормойгоо гөвөөд л буцдаг. Тэгээд ч холын хүн хотлын хэргийг шийдэх нь бүү хэл мэдэх ч үгүй. Нутгийн өөрөө удирдах байгууллага засаг захиргаа гэдэг нутгийн иргэдийн мөн тэнд амьдардаг хүмүүсийн эрх ашгийн төлөө ажиллах ёстой. Ингэхийн тулд жаргал зовлон шийдлээ мэддэг байх хэрэгтэй. Тэдний итгэл зүтгэл бас эрхийг Ерөнхий сайд эрх мэдлээрээ далайлгаж хүчирхийлэл үзүүлэн халдаж хазаарлаж хязгаарлаж болохгүй! Ховд аймгийн ИТХ-ын ээлжит наймдугаар хуралдаан үргэлжилж байна. Хэлцэл шийдэлд хүрч чадахгүй өчигдөр шөнөжин мунгинаж Даваа гарагийн 10.00 цаг хүртэл хойшилсон. Хуралдаанаар засаг даргын томилгооны асуудлыг хэлэлцэж байгаа.
Ерөнхий сайдын ахлах зөвлөх АНУ-ын Колумбийн их сургуулийг хөгжлийн бодлогын чиглэлээр Төрийн удирдлагын магистрын зэрэгтэй төгссөн Э.Болормаа гэх эмэгтэй
Ховд аймгийн засаг даргын орлогч Т.Дэлгэрсайхантай өрсөлдөн аймгийн засаг даргад нэр дэвшиж байгааг юу гэж ч ойлгомоор юм. Түүний аав А.Энхбат 1981 онд Ховд аймгийн 10 жилийн хоёр дугаар дунд сургуулийг төгссөн юм билээ. Одоо БОАЖЯ-ны Байгаль орчны үнэлгээ, аудитын хэлтсийн даргаар ажилладаг. Гэвч энэ нь охиныг нь ХОВД аймгийн засаг даргаар томилоход хангалттай шалтгаан огт биш. МАН-ынхан хэнийг ч хаа нэг газрын дарга болгох гэж 9 үеийг нь онгичиж хамаатуулах гэдэг нь жам болох нь. Ерөнхий сайд Л.Оюун-Эрдэнэ үе үе орж гараад байдгийг гайхах хэрэггүй юм байна, ийм зөвлөхтэй хүн хөрсөнд биш тэнгэрт сэтгэх нь зүйн хэрэг. Энэ эмэгтэй ховд аймагт битгий хэл Улаанбаатартаа амьдарч байсан юм уу даа. Түүний ажлын туршлагыг харахад лав л 10 гаран жил гадна байсан болов уу. Ховдын Засаг дарга, орон нутаг дахь бүлэглэлийг огцруулсан нь БРАВО. Одоо харин шинэ Засаг даргын томилгоог орон нутагт нь үлдээ! Хэн нэгэн оролцох хэрэгтэй бол С.Бямбацогт оролцог. Ядаж л аймгаасаа сонгогдсон үүрэг хариуцлага хүлээх ёстой хүн. Адаглаад Ховдчуудыг төлөөлж УИХ-д сууж байгаа биз. С.Бямбацогт гишүүн энэ асуудалдаа дуугарч, Ховдчуудынхоо төлөө дуугарах ёстой гэдгийг онцлоод хэлье. Энэ нь түүний үүрэг гэж харж байна.
Баруун бүст цементийн үйлдвэр босгосноор хотоос 2 дахин илүү үнээр авдаг байсан цементээ баруун бүсийн 5-н ч аймаг үйлдвэрийн үнээр авах боломжийг олж авсан энэ аймгийг Төрийн ордны томилгоогоор самарч үл болно.
Тиймээс төв болоод зүүн, өмнөд бүсүүдээс илүүтэй үлгэрлэн хөгжиж чадаж байгаа Ховдын асуудалд хуруу хошуу дүрэхгүй байх нь Засгийн газрын тэргүүний бодох л асуудал. Шүдгүй арслан шүдтэй боллоо гээд аймгуудаа самарч агаарын томилгол хийж үл болно.
Хүний нутгийн бурханаас өөрийн нутгийн чөтгөр гэж ховдчуудыг тайван орхи.! Хотын хөрш дүүргүүд ч нэгнийхээ сонгуульт ажилд нөлөөлдөггүй байхад Хотоос Ховдод очиж цэцэглүүлнэ гэдэг бол үлгэр гэдгийг шуудхан хэльчихэе!
Б.Алтанцэцэг