Ховдын Иргэдийн төлөөлөгчдийн хурал, нутгийн өөрийн удирдлагыг Төрийн ордноос булшилж байна. Хатуухан хэлэхэд, 21 аймгийн бүх засаг дарга нарыг хотоос хүчиндэж томилоод байвал орон нутгийн өөрөө удирдах ёс яах вэ. МАН-ын Удирдах зөвлөлд хэн таалагдсан нь засаг дарга болсоор байх уу. Энэ жишиг орон нутгийг засаглалын хямрал руу түлхэнэ. Ховд аймгийнхан хотоос ирсэн командаар Засаг даргаа тавьбал сумдын дарга нарын хувь заяа хэрхэн шийдэгдэх үү, хотоос бас сумын засаг дарга ирэх үү. Хуулиараа бол аймгийн засаг дарга ХЭН байхыг тухайн аймгийн ИТХ -ын олонхийн саналаар шийднэ. Тодруулбал Засаг захиргаа, нутаг дэвсгэрийн нэгж, түүний удирдлагын тухай хуулийн 33.1-д Иргэдийн төлөөлөгчдийн хурал нь тухайн засаг захиргаа, нутаг дэвсгэрийн нэгжид байнга оршин суугаа сонгуулийн эрх бүхий иргэдээс сонгогддог, хуулиар тусгайлан олгодог чиг үүрэг, бүрэн эрхийг хамтын удирдлагын зарчмын үндсэн дээр хэрэгжүүлдэг нутгийн өөрөө удирдах байгууллага мөн гэж заасан байдаг бол 35.1.4-д тухайн шатны Засаг даргыг томилуулахаар нэр дэвшүүлэх ёстой гэж заасан байдаг. МАН-ын удирдах зөвлөл Ерөнхий сайдын зөвлөх эмэгтэйг Ховдын засаг даргад дэвшүүлсэн нь хэрүүлийн алим болсон. Болохгүй жишиг, болчимгүй үйлдэл 21 аймаг 330 суманд хамааралтай. Хэн ч мэдэх МАН-ын сошиаль технологи ажиллаж Ерөнхий сайдын зөвлөхийг Засаг даргаар шахах бүх аргаа хэрэглэж байгаа нь инээдтэй. Бүр Ерөнхий сайдын явуулсан хүнийг Засаг дарга болгохгүй бол Ховд аймагт хэрэгжиж буй төсөл хөтөлбөрүүдийг зогсооно гэж хүртэл сүрдүүлж байгаа тухай Ховд аймгийн ИТХ-ын төлөөлөгч Д.Батхуяг хурал дээр хэлсэн. Гэнэт нэг дүр гаргаж сэвээ, шаваа хийж, өнөөх дүр нь супер зургаа тавьж ухаантай үгс хэлж эхэлнэ. Сошиаль баг тэр сэвээг нь зогсоо зайгүй хийнэ. МАН-ынханд хандаж хэлэхэд, попорлоо попорлоо гэхэд аймгаа мэдэхгүй хүнээр аймаг хошуу ахлуултлаа улс төрийн хачир, шоу, пропаганда хийхээ болих хэрэгтэй. Ховдынхон ч гэхдээ тийм ч амархан буугаад өгчих ард түмэн биш байлгүй. Онол онол гэсээр Л.Оюун-Эрдэнэ сайдаа амьдралаас хол тасарлаа. Прагматик бай. Практикт итгэ. Энд тэндгүй гүйлдэх зөвлөх, пр энэ тэрийнхээ үгэнд вакумжалгүй бодит хөрсөндөө буух цаг нь болсон. Амьдралаас тасрах аюултай. Ард түмнээсээ тасрах бүр ч аюултай. Өөрийнхөө бодолд үнэнч байх нь зөв ч өрөөлийн шүүмжийг сонсох хэрэгтэй.. Өөрийгөө бас засах л хэрэгтэй. Хэлсэн үг хийсэн үйлдэл бүр нь иргэдээс шүүмж сонсоод байгааг эргэцүүлж бодох цаг болсон биш үү. Залуу лидер хүн жолоогоо жаахан татаж, явсан замаа явах гэж буй замаа дахиад нэг хараад үзмээр. Эрх мэдэлд аархаж болно гэхдээ даргыг туслах зөвлөхүүд нь хэн ч биш болгодог гэдгийг санахад илүүдэхгүй биз. Инээсэн бүхэн найз биш уурласан бүхэн дайсан биш гэдэг монгол хэлцээ санаарай. Ховдын Засаг даргын асуудал ховдоор зогсохгүй хотод халуун сэдэв болоод байхад тус аймгаас сонгогдсон С.Бямбацогт таг байснаа өнөөдөр Ховдод очсон сурагтай. С.Бямбацогт гишүүн та ховд аймгийг төлөөлөн их хуралд сонгогдсон юм бол нутагтаа очиж асуудлаа шийд. Ховдын нутгийн өөрөө удирдах ёсыг харин намын даалгавраар бүү булшлаарай. Сонгогчдынхоо өмнө хүлээсэн үүргээ биелүүлж, учрыг олж хужрыг тунгаа гэж Ховдчууд таныг сонгосон байлгүй! 2022.08.26-нд хуралдсан Ховд аймгийн ИТХ-ын үеэр олон ч төлөөлөгч Э.Болормааг мэндлэх, хүндлэх ёсоо ч мэддэггүй хэмээн шүүмжилж байсан нь өчүүхэн хэрэг. Үүний цаана 21 аймгийн Засаг даргын дархлаа, нутгийн өөрөө удирдах ёс алдагдаж, МАН-ын Цагаан байранд хэн нэртэй, нүүртэй нь хаа дуртай газраа засагладаг болох гаж тогтолцоо ирж байна. Эдийн засгийн хямралд орсон Монгол Улс одоо Засаглалын хямрал руу бүрэн орж байна, бүүр 21 аймаг, 330 сумтайгаа хамт. Олонхын бүлэг завсарлага авна гэдэг түүхэнд байхгүй үзэгдэл. Дээрээ сандал суудал, эрх мэдлээ хувиарлаж чадахгүйн зовлонд автсаны дохио. Өнгөрсөн баасан гарагт МАН-ын хурал даргалагч, нэр дэвшигч Э.Болормаатайгаа хамт, бүлгээрээ завсарлага нэрээр хурлыг зогсоож тэр чигтээ зугтаж харин сөрөг хүчин АН-ынхан нь бүрэлдэхүүнээрээ шөнийн 12 хүртэл хүлээгээд явсныг Ховд даяар ярьж байна. Ховдын Иргэдийн төлөөлөгчдийн хурал, нутгийн өөрийн удирдлагыг булшилж дуусгах уу, эсвэл будлианаа зөвөөр шийдэх үү гэх асуудал одоо 10.00 цагт шийдэгдэнэ.Ховдын засаглалын хямралаас 21 аймгийн засаглалын хямрал руу бид явж байна, ай даа хөөрхий жаргал даахгүйн зовлон МАН-д бүрэн нүүрлэжээ.

нийтлэлч: Б.Алтанцэцэг