Ховд аймгийн Засаг даргад нэр дэвшээд байсан Б.Дүгэржав нэрээ татаж, Э.Болормаа Засаг дарга болох нь тодорхой болов. МАН-ын энэ томилгоог явуулахын тулд тус аймагт Засгийн газрын "десант" бүрэн бүрэлдэхүүнээрээ буужээ. Жишээ нь, Хөдөлмөр нийгмийн хамгааллын сайд А.Ариунзаяа, Сангийн дэд сайд С.Мөнгөнчимэг, УИХ-ын гишүүн С.Бямбацогт, Хөдөө аж ахуйн сайд З.Мэндсайхан, МАН-ын хяналтын хорооны дарга хүртэл Ховдод одоо ажиллаж байна. Тэдний үүрэг Ерөнхий сайдын ахлах зөвлөх Э.Болормааг Засаг дарга болгох аж. Хамгийн ноцтой 08 дугаар сарын 26-ны өдөр хурлын дэгээр Засаг даргыг сонгох хурал тухайн өдрөө шийдвэрээ гаргах хатуу дэгтэй байсан ч Засаг даргад нэр дэвшигч Э.Болормаа Ховд аймгийн МАН-ын бүлгийн дарга М.Ганзориг, Г.Пүрэвганди нар хурлыг орхин гарсан нь Засгаас хүч дуудах цаашлаад МАН-ынхаа гишүүдийн амыг барих зорилготой байсан бололтой.

Хамгийн гол нь хэн засаг дарга болох нь сонин биш, гагцхүү нутгийн өөрөө удирдах ёсыг үнэндээ уландаа гишгэж, анхан дунд шат руу нулимсан энэ үйлдэл Ховдоор дуусахгүй. Одоо бусад 21 аймаг хотоос дараагийн дарга ирнээ гээд хүлээгээд суух механизм руу нэгэнт орчихлоо.

Мөн Засаг даргаар Э.Болормаа томилогдоод хийгдэх анхаарлын төвд байгаа нэг асуудал бол Ховд аймгийн Мянгат сумын Халзанбүргэдэйн ховор элементийн орд дахь том ашиг сонирхол байх магадлалтай аж. Учир нь өмнөх засаг дарга Б.Дүгэржав энэ орд газрыг ухах ашиглах дээр хориг тавиад байсан болтой. Ийнхүү тэрээр өөрөө толгойгүй болов. Хотоос ирсэн Ховдыг мэдэхгүй хэн нэгэн тус ордыг нутаг усаа хайрлахгүй ухах магадлалтай гэж Ховдчууд ярьж байна. Томилгоо бүр учиртай, учир нь бас учиртай. Гагцхүү юуны төлөө яах гэж ирсэн гэх гогцоо эхнээсээ тайлагдаж байж магадгүй.