2016 оны долдугаар сард Д.Ганбат сайдын үед, Дарханы замын шавыг тавив. 2017 онд тухайн үеийн мэргэжлийн Засгийн газар Дарханы замыг шинэчилнэ, 2018 онд бүрэн ашиглалтад оруулна хэмээн амлаж байв. 2017-18 онд Шинэчлэлийн Засгийн газар концессоор зам барихгүй, гэрээг хүчингүй болгоё хэмээн, замыг шинэчлэхгүйгээр хааш хааш нь 1 метр сунгахаар болов. Тухайн үед хариуцсан сайдаар сахал хэмээх Ж.Бат-Эрдэнэ байв. Ийнхүү Дарханы замыг 4 эгнээтэй болгохоор Азийн Хөгжлийн банкнаас 60 сая ам.доллар зээлжээ. 2018-19 он. Я.Содбаатар сайдын үед Дарханы замын 1 см ч ажил хийгдсэнгүй гацав. 2019-2020 он. Л.Энх-Амгалан сайдаар ажиллах болов. Азийн хөгжлийн банкны зээлээр 2 эгнээтэй замыг бүрэн шинэчилнэ хэмээн 2020 онд Дарханы замын ажлыг бүрэн дуусгана гэж амлаж байв. Гэвч ажил огт урагшилсангүй. 2020-22 он. Л.Халтар сайдын үе эхэллээ. Дарханы замын 2 багцын ажлын асуудал шийдэгдээгүй бөгөөд ийм замтай учирсан нь үйлийн лай байгаа даа хэмээн сайд мэдэгдэж байв. 2022 оны 08 сар. Дарханы замын асуудлыг хариуцсан зургаа дахь сайдаар С.Бямбацогт УИХ-ын гишүүн ажиллахаар болов. Тэрээр Дарханы замын нэг урсгалыг энэ жилдээ багтааж ашиглалтад оруулахыг зорихоо мэдэгдэв. Анх шавь тавьснаас хойш 6 дахь сайдынхаа нүүрийг үзэж буй үйлийн үртэй энэ зам хурдан ашиглалтад орвол хэдэн арав биш хэдэн сая хүн баярлах нь тодорхой.