УИХ дахь АН-ын бүлгээс өнөөдөр (2022.09.05) Төрийн ордонд “Цугтаа хэлэлцье” зөвлөлдөх уулзалтыг зохион байгууллаа. Хэлэлцүүлгийн зорилго нь УИХ дахь Ардчилсан намын бүлэг иргэд, гишүүдээ бүлгийн гишүүдтэйгээ холбож ажиллахад оршиж байгаа төдийгүй өнөөдрийн хэлэлцүүлэгт Ардчилсан намын гишүүд нээлттэй оролцож, санал бодлоо солилцов. Энэ үеэр Ардчилсан намын дэд дарга Ш.Түвдэндорж хэлэхдээ:

Нийгэмд Ардчилсан намын асуудал сонирхолтой байгаа. Сөрөг хүчин гэдэг утгаараа хүчирхэг байж, эрх баригчдын алдаа оноог хэлж, ярьж засах ёстой. Иймд ард түмэн сонирхож байгаа. Тэр дундаа Ардчилсан намын гишүүд санаа зовж байна. Иймд олон санаачилгуудыг гаргасан нь энэ удаагийн хэлэлцүүлэг байлаа. “Цугтаа хэлэлцье” зөвлөлдөх уулзалтаар намын гишүүдийг нэг дор цуглуулж, цаашид ямар ажил хийх, эв нэгдлийн хүрээнд хэрхэх тухай анхны санаануудаа ярилцлаа.

Бидний хувьд бүхий л оролдлогыг хийж байна. Яг үнэндээ эцсийн шийдвэр хаана гарах вэ гэхээр, эрх баригч хүчний зүгээс манай намын дотоод асуудлыг төрийн байгууллагуудаар дамжуулж, хагарлыг үүсгэсэн үйл ажиллагаа зогсох юм бол манай намын дотоод хагарал гэж яриад байгаа зүйл зогсох юм. Ганц, нэг хүний л асуудал байгаа. Үндсэндээ Ардчилсан намын 200 мянган гишүүн, намын үүр хороо, дунд шат, анхан шатандаа цул хэвээрээ байгаа. Тийм учраас хагарал гэдэг үүднээсээ бус ганц нэг хүний асуудлыг хэрхэн шийдэхэд асуудлын гол оршиж байна. Бидний зүгээс ажлаа явуулахын тулд тал талаасаа зөвшилцлийн арга хэмжээнүүд явуулах байх. Энэ ч үүднээс “Цугтаа хэлэлцье” санаачилгыг дэмжиж байгаа гэлээ.