Засгийн газрын хуралдаанаас гаргасан шийдвэрийг танилцуулах үеэр Сангийн сайд Б.Жавхлан НӨАТ-ын сугалааг явуулах талаар мэдээлэл өглөө. Тэрбээр, “НӨАТ-ын сугалааг аравдугаар сараас эхлүүлнэ. Сугалаанд нэлээд дэвшилттэй ажлууд хийгдсэн, идэвхжүүлсэн НӨАТ-ын баримтад сугалаа явуулна.

Иргэд ухаалаг утаснаасаа өөрийнхөө бүртгүүлсэн баримт сугалаанд бүртгэгдсэн эсэхийг хянах боломжтой. Азтан шалгаруулах үйл явцыг хянана гэсэн үг. Сонирхолтой, сайжруулсан байдлаар сугалааг зохион байгуулна.

Тавдугаар сараас НӨАТ-ын сугалааг зогсоосноор баримт бүртгүүлэх тоо 50 хувиар буурсан. Энэ нь НӨАТ-ын орлогод сөргөөр нөлөөлөх эрсдэл болж байгаа юм. Цаашлаад энэ нь далд эдийн засгийг дэмжих сөрөг нөлөөтэй” гэлээ.