Хоёр жил гаруй хугацаанд хоёр талд талцаж байгаа Ардчилсан намын асуудал өнөөдөр савнаасаа хальж гарч ирлээ. Учир нь Ардчилсан намын Залуучуудын холбооноос асуудал шийдэгдэж, нэг талдаа гарахыг хүлээж, чимээгүй байсаар ирсэн ч дорвитой үр дүн гараагүйд бухимдаж байгаагаа илэрхийллээ.

Тэдний хэлж байгаагаар Ардчилсан намын дарга гэх С.Эрдэнэ Ардчилсан залуучуудын холбоог 200 сая төгрөгөөр зарах гэж байгаа гэнэ. Иймд уг бусармаг үйлдлээ таслан зогсоохыг шаардаж, “Шонхор Таур” дээр С.Эрдэнэтэй уулзахаар очлоо. Гэтэл С.Эрдэнийн өмгөөлөгч Г.Батбаяр гарч ирээд, түүнийг байхгүй хэмээн хариултыг өгсөн юм. Гэсэн хэдий ч үзэл бодолдоо бат зогссон залуучууд дуу хоолойгоо нэгтгэж, эсэргүүцлээ илэрхийлж, Ардчилсан намын тугаа буулган авлаа.

Ийнхүү хүчтэй эсэргүүцлээ илэрхийлсний үр дүнд дотогш нэвтэрч, С.Эрдэнэтэй нүүр тулан уулзаж, шаардлагаа уншиж танилцууллаа. Ардчилсан Залуучуудын Холбооноос сүүлийн хоёр жилийн хугацаанд С.Эрдэнэ нь эрх баригчидтай илт хуйвалдаж, намаа үнэмлэхүй ялагдалд хүргээд зогсохгүй, Ардчиллыг булшлах, тарчлаах үйлдлийг зогсолтгүй хийсээр ирсэн. Өнгөрөгч УИХ-ын сонгууль, Ерөнхийлөгчийн сонгууль бүгдийг нь С.Эрдэнэ гэдэг хүн эрх баригчдад худалдсан. Одоо Ардчилсан Залуучуудын Холбоо цаашлаад Ардчилсан намыг зарах тухай асуудал хүчтэй яригдаж байна.

Өнгөрсөн хоёр жилийн хугацаанд Ардчилсан Залуучуудын холбооны 90 мянган гишүүд, ах нар эвлэрчих байх, асуудлаа олох байх хэмээн итгэж, найдаж, хүлээж ирсэн. Харамсалтай нь С.Эрдэнэ гэдэг хүний үйлдэл хэрээс хэтэрч, Ардчилсан намын тамгаар тоглоод зогсохгүй нийт гишүүдийн итгэл үнэмшлээр тоглосон.

Тодруулбал, Ардчилсан ахмадын холбоо, Эмэгтэйчүүдийн холбоог дахиж хувилсан. Ирэх 2022.09.19-ний өдөр Ардчилсан залуучуудын холбоог дүрмийн бусаар татан буулгаж, шинээр зохион байгуулах тухай асуудал яригдлаа. Залуучууд бид сүүлийн хоёр жил хангалттай тэвчиж, хангалттай удаан хүлээсэн.

Гэвч С.Эрдэнийн үйлдэл хэрээс хэтэрч байгаа тул Ардчилсан Залуучуудын Холбоо, 21 аймаг, 9 дүүргийн 90 мянган гишүүний хуралд оролцохгүй, хууль бус үйлдлээ таслан зогсоох тухай шаардлагыг хүргүүллээ. Ардчилсан Залуучуудын Холбоо С.Эрдэнийг уг бусармаг үйлдлээ зогсоох хүртэл тэмцэнэ гэдгээ илэрхийлсэн юм.

Хариуд нь С.Эрдэнэ би тамгаа Ц.Туваанд хүлээлгэж өгөөгүй. Намын дотор үүссэн өнөөгийн асуудал бүгд Х.Баттулгын буруу хэмээн гүрийсээр байв. Түүнчлэн албан ёсны тамга ганцхан надад байгаа гэх мэт хоёр жилийн турш ярьсан зүйлээ ярьсаар байсан нь олон нийтийн дургүйцлийг хүргэсэн юм.

Харин Ардчилсан Залуучуудын Холбооноос хүргэж байгаа уг шаардлага цаг үеэ олсон, Ардчилалд итгэх итгэлээ алдсан олон мянган гишүүд, дэмжигчдэд урам зориг болсон биз ээ. Цаашид тэмцэл үр дүнгээ өгч, Ардчилсан намд үүссэн дотоод асуудал цэгцэрч, тэнгэр цэлмэх байх хэмээн бат итгэлтэй байна.