АН-ын ҮБХ-ны гишүүн Ц.Одонтунгалаг, "Сангийн Яам"-ны нэр бүхий удирдах албан тушаалтнуудыг С.Эрдэнэтэй хуйвалдаж, их хэмжээний мөнгө олгосон байж болзошгүй үйлдлийг шалгуулахаар АТГ-т өглөө. Тодруулбал Ардчилсан намын асуудал маргаантай, албан ёсны дарга байхгүй хэмээн 2022 оны 01 сард Дээд Шүүхийн шийдвэр гарчихсан байхад холбогдох төрийн байгууллага, Сангийн яам, Их хурлын тамгын газрын тодорхой албан тушаалтнууд С.Эрдэнэтэй хуйвалдсан байж болзошгүй байна. Тухайн үед Дээд Шүүхээс Ардчилсан намыг итгэмжлэх хүн байхгүй гэж үзээд Ц.Тувааныг бүртгэсэн байсныг бүртгэлээс хасаж, С.Эрдэнийг бүртгэхгүй гэсэн шийдвэрийг гаргасан байв.

Гэтэл Ардчиллыг дэмжсэн олон мянган хүмүүсийн саналыг үнэлж, төсвөөс олгогддог мөнгийг ямар ч итгэмжлэлгүй С.Эрдэнэ гэх хүн өөрт авч, ашигласан байгаа нь залилангийн гэмт хэрэг гэж үзэж байна. Тодруулбал, сангийн яамны нэр бүхий албан тушаалтнуудын тусламжтай төсвөөс олгодог суудлын мөнгө болох 977 сая 680 мянган төгрөг, нэг гишүүнд олгогддог 10 гаран сая төгрөг, нийт 1.142.680.000₮-ийн хохирлыг Ардчилсан намд учруулжээ.

С.Эрдэнэ Ардчилсан намын дарга биш цаашлаад Ардчилсан намаас хөөгдсөн хүн. Гэтэл энэ хүнд яагаад намд олгогддог мөнгийг олгох болов. Цаашлаад Ардчилсан намын дансыг хаасан байгаа. Гэвч С.Эрдэнэ тэр мөнгийг хэрхэн ямар дансаар тухайн мөнгийг авсан нь тодорхойгүй байгаа тул АН-ын ҮБХ-ны гишүүн Ц.Одонтунгалаг холбогдох байгууллагад нь шалгуулж, олон түмэнд үнэн бодитой мэдээллийг хүргэхийг зорьжээ.

Одоогийн байдлаар Сангийн яамны Төрийн нарийн бичгийн дарга С.Насанцогт, нягтлан бодогч н.Батхуяг нарын гарын үсэгтэйгээр уг мөнгө С.Эрдэнэд олгогдсон байгаа юм. Угтаа бол тухайн үед С.Эрдэнэ Ардчилсан намын дарга биш гэсэн Дээд шүүхийн шийдвэр гарчихсан байсан. Гэтэл намын дарга биш хүнд намд олгогддог мөнгийг өгсөн байна. Үүний цаана улс төрийн хуйвалдаан явж байна гэж үзэж байна.

Сүүлийн үед Улс төрчдийн захиалгаар хуулийн байгууллагууд шийдвэр гаргадаг болсон юм уу гэж харагдаж байгаа. Иймд Ц.Одонтунгалаг миний бие хуульч хүний хувьд хуулийн дагуу яваад үзье. Үнэхээр цагаан дээр хараар бичсэн дүрэм, журам, хууль нь хэрэгждэг юм бол асуудал шийдэгдэх ёстой. Улс төрчдийн лобби, хуйвалдаанаар хууль хэрэгждэг болцон юм бол асуудал ямар түвшинд хүрэхийг хармаар байна.

Ардчилсан намд үүсээд байгаа маргаанд ганц л хүний асуудалд байгаа. Тэр нь С.Эрдэнэ юм. Би С.Эрдэнэтэй хамтарч ажиллаж байсан. Шат, шатандаа хийсэн үйлдлүүд нь хууль бус зүйл явж байдаг. Гэтэл тухайн асуудлууд хуулийн байгууллага дээр очоод замхардаг. Иймд иргэн хүнийхээ хувьд, хуульч хүнийхээ хувьд, Ардчилсан намын гишүүн хүнийхээ хувьд, хууль завших гэмт хэрэг үнэхээр байгаа эсэхийг харна. Ямар хүнд нь хууль үйлчлээд, ямар хүнд нь үйлчилдэггүй юм бэ?. Улс төрчид, албан тушаалтнууд хоорондоо хуйвалдаж хуулийг завхруулаад байдаг юм бол хууль гэж байгаад, түүнийг нь хэрэгжүүлэх шаардлага байна уу?. Тиймээс энэ бүгдэд цэг тавих ажлыг эхлүүлэхээр АТГ-т хандаж байна.

Түүнчлэн түүний зүгээс дараа дараагийн асуудал байгаа энэ бол эхлэл хэмээгээд, Монгол Улсын Ардчилсан нам, дээд шүүхэд бүртгэлтэй нам. Энэ намыг төлөөлөх хүн нь С.Эрдэнэ биш. Тийм учраас С.Эрдэнийн хийж байгаа бүх үйлдэл хууль бус залилан, ашиглалтын шинжтэй гэж үзэж байгаа гэв.