УИХ-ын гишүүн Ганибалын Амартүвшин энэ оны 4-р сарын 9-нд бүрэн эрхээсээ түтгэлзэх хүсэлтээ гарган, мэдэгдэл гаргаж байсан билээ. Түүнд Хөгжлийн Банкны Гүйцэтгэх захирлаар ажиллаж байхдаа УИХ-ын нэр бүхий гишүүдийн хувь оролцоотой "Вертекс майнинг партнер" ХХК-д зээлийн барьцаа хөрөнгө хангаагүй байхад нь 33 тэрбум төгрөгийн зээл олгосон гэсэн үндэслэлээр эрүүгийн хэрэг үүсгэн шалгаж буй юм.

Иймээс ч тэрээр бүрэн эрхээсээ татгалзах хүсэлтдээ: "Миний бие өөрийн хүсэлтээр УИХ-ын гишүүний бүрэн эрхээсээ түтгэлзэх хүсэлтээ УИХ-д гаргаж байна. Мөн Хөгжлийн банкны асуудалд нэр холбогдсон УИХ-ын гишүүдийг иргэн хүний нэгэн адил шалгуулах шаардлагыг миний бие бүрэн дэмжиж байна. Хөгжлийн банкны асуудалтай нэр холбогдсон УИХ-ын гишүүдийг бүрэн эрхээсээ түтгэлзэж, иргэн хүний хувиар шалгуулан эцэслэн шийдвэрлүүлэхийг уриалж байна" гэж байсан ч уг хүсэлтийг УИХ шийдвэрлээгүй юм.

Гэсэн ч түүнд холбогдох хэргийн мөрдөн шалгах ажиллагаа дуусч, яллах дүгнэлт үйлдэн, шүүхэд хүргүүлэхэд бэлэн болсон байна. Энэ тохиолдолд түүний УИХ-ын гишүүний бүрэн эрхийн асуудал дахин хөндөгдөх юм.