Судалгаагаар улс төрчийн нэр хүнд, амжилтын 7% хувь нь ярьж буй зүйлээс нь, 55% нь бусдад төрүүлж буй сэтгэгдэл, биеэ зөв авч яваа байдал, имиж бүрдүүлэлтээс нь шалтгаалдаг гэсэн судалгааг өрнөдийн бодлогын технологич нар гаргажээ.

Тэгвэл гадаадад эх орноо төлөөлөн айлчилж байгаа улс төрчдийн имиж эх орных нь шууд тусгал, төсөөлөл болох юм. Мөн олон нийтийн газар биеэ зөв авч явах соёл нь тухайн хүний боловсрол, ёс зүй сэтгэлгээний цар хүрээг илтгэнэ.

Улс төрийн тавцанд гарсан л бол хүссэн хүсээгүй хувийн араншингаа хянаж сурах хэрэгтэй. Өнөө үед улс төрийн хүчирхэг үзэл бодол орхигдож, нэр төр имижийн төлөө санаатай, санамсаргүйгээр алдаатай үйлдлүүд харагдаж, хүмүүс ч соргог хүлээн авч шүүмжлэх болжээ.

Цаашилбал улс төрчийн имижид гоо зүйн байдал /үс, нүүр, шүд, биеийн жин, хувцаслалт, үнэр гэх мэт/, мэргэжлийн болон ажил албаны чанарууд /профессионализм/, эрх мэдэл, хувь хүний сайн чанарууд ба бусадтай харилцах / биеийн хөдөлгөөн, дохио зангаа, дуу хоолойны өнгө/ чадвар зэрэг тодорхойлолтууд орно.

Орчин үед улс төрийн менежмент явуулах, имиж бүтээх нь өөрийн дэг жаяг, технологи ба улс төр, зах зээлийн өвөрмөц үйл явц юм. Улс төрийн кампанит ажлыг зохион байгуулах тусгай агентлагийг 1950-иад оноос эхэлснээр дэлхий нийтэд мэдээллийн коммуникацын хэрэгсэл эрчимтэй хөгжсөн бөгөөд түүнийг дагаад дээрх байгууллагууд сонгуулийн стратеги ба тактикийг хүчтэй явуулан, сонгуульд нэр дэвшигчийг өрсөлдөх чадвартай дүр төрх, имижийг олон нийтийн санаанд нийцүүлэхийн төлөө ажиллаж эхэлжээ. Улс төрийн лидер жирийн хүнийг бодвол илүү эрх мэдэлтэй, хүчирхэг, түрэмгий байх ёстой гэдэг.

Харин тэвдүү, хийрхүү үйлдэл гаргаж болохгүй. Ялангуяа хямралын нөхцөл өрнөсөн улс орны лидер хүн ард түмэн, сонгогчдод тайван, итгэлтэй шинжийг төрүүлэх хэрэгтэй. Энэ утгаар нь авч үзвэл улс төрийн лидер өнөөгийн цаг үеийнх биш, харин ирээдүйн бэлгэ тэмдэг болох ёстой юм.