УИХ-ын нэгдсэн чуулганд М. Оюунчимэг гишүүн 2022 оны 10-р сарын 20-ны өдөр төсвийн хэлэлцүүлэгт саналаа хэлэхдээ гэр хорооллын эрчим хүчний тарифийн хөнгөлөлт үзүүлэх тухай ярьлаа. Гэхдээ тэрвээр үг, өгүүлбэрийн хэллэгийн ноцтой алдаа гаргасан нь “ Нийслэлийн гэр хорооллын тэндээс Зайсанд хүртэл утаа үнэртээд байна...” гэлээ. Хотын дийлэнх хүн ам гэр хороололд амьдардаг. Тэд бүгд шахуу л нүүрс түлж утаа үйлдвэрлэдэг. Улсын хөрөнгөөр нүүрсээр шахмал түлш үйлдвэрлэж утааг багасгадаг дэлхийд нэн ховордож, мартагдсан аргыг манай Улс туршаад тун удаагүй. Улаанбаатар хотод 1.4 сая хүн оршин сууж байгаагаас 51.3 хувь нь гэр хороололд амьдарч байгаа талаар Үндэсний статистикийн газраас мэдээллжээ.

2018 онд шахмал түлшний үйлдвэр анх байгуулагдаж түүхий нүүрс түлэхийг хориглож 2020 оны 12 сард дахин нэг үйлдвэр ашиглалтад орсон. Гэхдээ Улаанбаатар хотын утаа яг хэдий хэмжээгээр буурсан нь тодорхойгүй. 2022 оны 1 сарын эхний долоо хоногт л Цагдаагийн Ерөнхий газрын дуудлага, мэдээллийн 102 дугаарт угаартсан гэх 20 дуудлага ирсэн бөгөөд нэг хүний амь эрстэн, 56 хүн хүнд, хөнгөн хэлбэрээр угаартжээ. Угаартсан иргэдийн 56.1 хувь нь хүүхэд байв.

Шахмал түлшний утаанд угаартаж нас барсан иргэдийн тоо ч багагүй. Холбогдох эх сурвалжийн мэдээллэж байгаагаар 2002 оноос 2020 он хүртэл угаарын хордлогоор 139 иргэн нас баржээ. Харин хамгийн ноцтой нь утааны асуудал үндэсний аюулгүй байдалд аль хэдийн заналхийлээд удаж байхад УИХ-ын гишүү нь хамраа сөхөж “...Тогны мөнгөнд нь хэмнэлт үзүүлэхгүй бол гэр хорооллын утаа чинь Зайсанд хүртэл үнэртээд байна” гэх мэтийн илт ялгаварлан гадуурхсан хандлага гаргаад сууж байгаа нь ёс суртахууны уучлашгүй алдаа юм.

Иргэдээ ул тавагаар нь дуудаад зогсохгүй үхэр гэж нэмэж тавлаж доромжилсан Сарангэрэл гишүүний дээрэнгүй хандлагын цуурай намжаагүй, ард түмэн бор амьдралдаа түүртэж, гомдох ч эрхгүй шар нар бор хоногийг барж, эрх баригчдын буруугаас шал дордсон эдийн засгийн зудад нэрвэгдэж, үнийн өсөлтөд дарлуулж, төгрөгийн ханшийн үнэгүйдэлд өртөж байхад УИХ-ын гишүүд нь болж хохь нь гэх нь халаг элдэв үгээр дайрч суугаагаас л харахад төрийн дээр зайдалсан эрх баригч намын үйл ажиллагаа, засаглалын үр дүнг шууд дүгнэж болох юм.