Т.Аюурсайхан гишүүн 1-т УИХ-ын гишүүн, 2-УИХ-ын Дэд дарга, 3-т Монгол Улсын сайд гэх 3 давхар дээлтэй боллоо. Сонин тохиол. Давхар дээлээ тайл гэчхээд гурван давхар дээл нөмөрчихлөө гэж үү? Давхар дээлээ тайл гэж жагсаж байсан хүн гурван давхар дээл нөмрөхийг хардаг бид мөн азгүй хүмүүс гэмээр... УИХ-ын дарга М.Энхболдыг суудлаас нь огцруулах үеэр төрийн хүнд суртал, авилгалын систем, давхар дээлийг бүр мөсөн арилгах хэрэгтэй хэмээн хамгийн түрүүнд шаардаж явсан таван гишүүний нэг нь шоронд дөрөв нь төрд өнөдөр алба хашиж байна. Харин 2018 оны өвөл М.Энхболдыг огцруулах тэмцлийнхээ үеэр тэд ямар ч төрийн өндөр албан тушаалд очихгүй хэмээн ам гарч амлаж байв.

Давхар дээлийн асуудлаар эсрэг байр сууриа илэрхийлсээр ирсэн ч өдгөө нэгэнт УИХ-ын гишүүн, УИХ-ын дэд дарга, Хөдөлмөр, нийгмийн хамгааллын сайд Т. Аюурсайхан гурван давхар дээлтэй халууцаж суугаа болов уу даа? Цэцээр Үндсэн хуулийг хүчиндүүлэн хориглолт үүсгэж холбогдох заалтыг хүчингүй болгон давхар дээл өмсцгөөсөн Засгийн Газрын ажил бодит байдалд нийцсэн үр өгөөж, гэрэл гэгээ харагдах нөхцөлгүй боллоо.

Үндсэндээ 32 жилийн хугацаанд 34 удаа солигдсон Монголын Засгийн газрын нас 4 жилийн эхний жилд нь төр эмхрэх гэж эцэс төгсгөлгүй сандал суудлын өрсөлдөөн, 2 дахь жилээс нь эзэн суусан салбартаа эрх мэдлээ тогтоож, эрх дураараа загнах нөхцлийг бүрдүүлэх гэж 1 жил ингээд 2 жилийг юу ч хийж амжаагүй дуусгаж байтал сонгуулийн жилийн өмнөх он угтаж дахиад сонгогдох, хуудуу, хулгайгаа булахаар бужигнаж ингэсээр байтал төрийн үндсэн ажил мартагдах шахам эзгүйрдэг тогтолцооны гажиг дээр нэрмээслэж УИХ-ын гишүүн хууль санаачлах эрхээ давхар хууль хэрэгжүүлэх үүрэгтэйгээр бантагнуулан хүссэнээрээ хүүдийлэх арга зам гэж нэрлэж болохоор давхар дээл нөмөрч байна.

Давхар дээлийг дэлхийн практикт ёс зүйн хувьд ч төрийн тогтолцооны менежмэнтийн хувьд ч тохирохгүй, авилгал цэцэглэх, төрийн өндөр албан тушаалтнуудын халаасаа түнтийлгэх боломж болдог хэмээн хуучруулсан юм. Гэтэл залуу үе, залуу улс төрчид хэтэрхий залуугаараа албан тушаалын хэнээрхэлд цангаж “шатаж” байна даа. Т.Аюурсайханыг арай өөр нүдээр харах иргэд байсан. Харин өнөөдөр тэрээр хэдийнээ шударга-5 бус шударга бусын эгнээнд орлоо.