Монголууд аймаг сумаараа талцах дуртай ч сүүлийн үед Хэнтий аймагт төсвийн мөнгө асар ихээр цутгагдахаас эхлэээд жалга довны сэтгэлгээ ажиглагдах болсон. Бэрхийн Ерөнхий сайдыг олосвролтой бэрх ухаантай байх болов уу гэж бодсон ч бэлчээрээсээ гарч чадахгүй байгаа бололтой хэмээн ам уралдан хэлэлцгээж байна. Хамгийн чухал, бодлогын хөшүүрэг хэрэгтэй стратегийн салбарын дэд сайдаар амны салиа нь арилаагүй хүүхэд тавьчихлаа. Улс орныг толгойлно гэдэг үзэмжээрээ чиглүүлдэг сайн дурын байгууллагын тэргүүн байхаас арай л өөр баймаар. Аймгийн засаг дарга нарыг ч өөртөө таалагдахгүй байвал суудлаас нь дураараа авч хаядаг тогтолцооны хямрал ужиг гажуудлын эхлэлийг тавьж мэдэх эрсдэлтэй.

Орон нутгийн бие даасан байдал, засаглалын тогтворжилт, иргэдийн сонголтод хүчирхийллийн аргаар шийддэг байдал хэвийн үзэгдэл болох нь. Аман дээрээ ардчилал ярьж ачир дээрээ дарангуйлалд бага багаар дасгаж байгаа эрх баригчдын үйлдлүүд цааш хэрхэн өрнөхийг ч таашгүй.

Хэнтийгээс Гантулга гэж цэл залуу гишүүн сонгогдоод л МАН-ыхан амаа олохгүй магтаж байгаад гэнэт л өнөөх нь хүчингийн хэрэгээр ял сонсож байсан нь саяхан. Төрийн алба гэдэг хэн дуртай нь хэний ч хамаагүй татаасаар дураараа орж ирээд сандайлаад суудаг ашиг сонирхлын шинжтэй хувийн компани мэт болох нь уу. Залуусыг басах, дорд үзэхдээ бус төрийн албаны зангараг, зарчим гэж заавал байх учиртай. Туршлага ямар ч боловсролоос илүү хөнгөн хуумгайгаас үүдэх эрсдэл, алдагдлыг хазаарлаж байдаг найдвартай өгөгдөл. Шинээр томилогдосн ХХААХҮ-ийн яамны шинэ дэд сайд М.Ганхүлэг гэх залууг Ерөнхий сайдын хуурай дүү гэж эх сурвалж мэдэгдэж байна.

Даргын ивээлд багтсан л бол хүнс хөдөө аж аухй хөнгөн үйлдвэр байтугай ямар ч салбарын дэд сайдын суудал ойрхон бололтой. Суга татаж дээш нь гаргаад няц гишгэдэг түүх л бүү давтагдаасай. Золиосонд нь салбарын бодлого гуйвах юм бол залуу сайд хариуцлагын тухай бодох ч үгүй л замхарна.

Төрийн албаны шатлан дэвших зарчим гэх мэт ойлголтууд хаана гээгдэж хоцорсон юм бүү мэд. Хэчнээн боловсрол мэдлэгтэй байлаа гээд МАН-ынх биш бол гудамжинд үлддэг байдал даамжирч Хэнтийнх биш бол хэн ч биш болдог болох нь. Саяхан Хэнтийн нутгийн зөвлөлийн уулзалт нэртэй нэг бүр нь 60 мянган төгрөгийн үнэтэй тасалбар Хэнтийнхэнд тарсан. Ерөнхий сайд Хэнтий аймгийн уугуул байлаа гээд Хэнтийнхэн хаанчлах үндэслэл нийгмийн ч улс төрийн тогтолцоонд ч боломжгүй.