Ядуурлыг арилгах гэдэг нь зөвхөн уриа төдий биш, бодлогын ядууралд үзүүлэх нөлөөллийг шинжлэн дүгнэж, үүнийгээ үйл хэрэг болгох, ялангуяа цаг хүндэрсэн үед ажил хэрэг болгох туйлаас чухал. Бодлого цаасан дээр буух амархан ядуу өрхүүдийн амьжиргааг огцом өөд нь татна гэдэг хэцүү. Дэлхийн судалгааны байгууллагуудын үзэж байгаагаар ядуурлын үйл явцыг бууруулах гол арга зам хүн амыг тогтвортой ажлын байраар хангаж, хангалттай цалин орлогын эх үүсвэр бий болгох, хөдөлмөрийн зах зээлд шаардлагатай ур чадвартай ажилчин болгож бэлтгэх хөрөнгө оруулалт хийх зэрэг шаардлагатай оновчтой үр дүнтэй шийдлүүдийг санал болгож байна.

Харин нэг сайд гарч ирээд огцом бууруулах тухай ярихаар ядуурал гэнэт айгаад түвшин нь буурна гэдэг үлгэр. Сайд салбараа судалсан, судалгааны үндэслэлээр мэдэгдэл хийсэн гэж найдах үлдлээ.

Хүн амын тэн хагас нь ядуу, ядууралд өртөх өндөр эрсдэлтэй үед хамгийн чухал нь лоозогнол биш бодит ажил хэрэг үр дүнтэй шийдлүүд гэдгийг ойлгох хэрэгтэй. Ядууралтай тэмцэх гол хүч нь ажлын байр. Гэтэл манай улсад нийгмийн даатгалын сангаас өнгөрсөн сарын байдлаар нийт 676.8 мянган хүний тэтгэвэр, тэтгэмж, төлбөрт 2.5 их төгрөг олгосон байна. Мөн ажилгүй болсон даатгуулагчийн ажилгүйдлийн тэтгэмжид 53 тэрбум төгрөг олгожээ. Цаашид ядуурлыг огцом бууруулая гэвэл олон мега төсөл хэрэгжүүлж, үйлдвэр бас дахин үйлдвэр барих хэрэгтэй.